§ 1. Ataatsimiititaliap inissitsiterluni ataatsimeeqqaarnissaanut ilaasortaq angajulleq (utoqqaanerpaaq) aggersaassaaq. Najukkami ataatsimiititaliap inissiiterluni ataatsimiinnerani ataatsimiititaliamut ilaasortanit amerlanerussuteqartunit siulittaasutut qinerneqartoq ataatsimiititaliami siulittaasunngussaaq.
§ 2. Ataatsimiititaliap sulinini ataatsimiinnerni ingerlatissavaa.
Ileqquusumik ataatsimiinnerit qaqugu sumilu ingerlanneqassanersut, najukkami ataatsimiititaliap aalajangertassavaa. Piffissaq sumiiffillu ullut 14-it sioqqullugit tamanut nalunaarutigineqartassapput. Ileqquusumik ataatsimiinneq nalinginnaasumik qaammammut ataasiarluni pisassaaq.
Imm. 2. Najukkami ataatsimiititaliap ataatsimiinnissai siulittaasumit piareersarneqartassapput ilaasortanillu ataatsimiigiaqqusisartussaalluni. Najukkami ataatsimiititaliami isumaqatigiinniarnerit taasinerillu siulittaasumit aqunneqassapput taassumalu aalajangerneri eqqortumik ingerlanneqarnissaat isumagissallugit.
Imm. 3. Suliat nakkutigineqartarneri siulittaasumit nakkutigineqassapput.
Imm. 4. Immikkut ataatsimiittoqartassaaq taamaaliortoqarnissaa siulittaasup pisariaqartippagu imaluunniit ilaasortat ikinnerpaamik pingajorarterutaasa tamanna piumasaqaatigippassuk. Immikkut ittumik ataatsimiinnerit qaqugu sumilu pissasut siulittaasumit aalajangerneqartassapput, tamakkulu sapinngisamik tamanut nalunaarutigineqartassapput.
Imm. 5. Oqaluuserisassat aammalu atortussat suliani oqaluuserisassanngortinneqartuni nalilerneqartussat pisariaqartut ataatsimiinnissap ulluinnarnit sisamanit sioqqullugu ilaasortanut nassiunneqarnissaat siulittaasumit isumagineqassapput. Suliaq kinguartinneqarsinnaanngippat, oqaluuserisassat atortussallu pisariaqartut piffissaasoq eqquutsinnagu nassiunneqarsimagaluartut, najukkami ataatsimiititaliaq aalajangiisinnaavoq. Oqaluuserisassat imaluunniit atortussat pisariaqartut piffissaasoq eqquutsinnagu nassiunneqarsimaneri oqaluuserisassanut allanneqarnissaa siulittaasumit isumagineqassaaq. Suliap nassiunneqarsinnaannginneranut /kinguartinneqarsinnaannginneranut tunngavilersuutit oqaluuserisassamittaaq allanneqassapput.
Imm. 6. Najukkami ataatsimiititaliami ilaasortat kikkulluunniit siulittaasumut saaffiginninnermikkut oqaluuserisassanngortitsisinnaapput.
Imm. 7. Suliat imarisai najukkami ataatsimiititaliap ataatsimiinnerani oqaluuserineqartussat, kiisalu aalajangiisinnaanermut najoqqutassiaq, nipangiussisussaatitaaneq pillugu inatsisitigut malittarisassaq malillugu, sapinngisamik tamanut saqqummiussinnaasat assersuutigalugu kommunip allaffiatigoorlugu saqqummiunneqartassapput.
§ 4. Ilaasortat ikinnerpaamik pingasut najuutsillugit najukkami ataatsimiititaliat aalajangiisinnaapput. Taasinermi naligiittoqassagaluarpat, siulittaasup taasinera aalajangiisuussaaq.
§ 5. Najukkami ataatsimiititaliap aalajangerneri aalajangernermi najoqqutassaqarluni pisassapput, ataatsimeereernerullu kingorna ilaasortat ataatsimeeqataasut atsiortassallutik.
Imm. 2. Ilaasortap kialuunniit piumasarisinnaavaa isummani allaasoq imaqarniliamut naatsumik allanneqaqqullugu, sulianilu pisortatut oqartussaasumut allamut ingerlateqqittassani piumasarisinnaallugu, taassuma aamma imaqarniliap imaanik ilisimatinneqarnissaa. Ilaasortap taassuma suliap nassiunneqarnerani suliaq ilaqartissinnaavaa nammineq isummaminut tunngavilersuutigisaminik.
Imm. 3. Ataatsimiititaliap tamatigut ataatsimiinneranit imaqarniliaq, siulittaasoq suleqatigalugu, allaffeqarfimmiit suliarineqartassaaq. Imaqarniliaq ataatsimiititaliap ataatsimiinnerata kingorna kingusinnerpaamik ullut tallimat qaangiuppata ilaasortanut tunniunneqareersimassaaq.
§ 6. Ilaasortat ilaat suliassami aalajangersimasumi inuttut ima soqutigisaqartiginersoq, suliassaq taanna pillugu ataatsimiititaliap oqaluuserinerani taasineranilu peqataanngitsoortariaqarnersoq najukkami ataatsimiititaliap aalajangiiffigissavaa.
Imm. 2. Ilaasortap ataatsimiititaliaq ilisimatissavaa pissutissaqarpat suliani aalajangersimasuni suleqataasinnaanermut apeqqutinngortitsisinnaasunik. Ataatsimiititaliami ataatsimiinnissaq sioqqullugu ilaasortap siulittaasoq tamanna pillugu nalunaaruteqassaaq.
Imm. 3. Suliamut najukkami ataatsimiititaliap ataatsimiinnerani oqaluuserineqartussamut tunngatillugu ilaasortaq attuumassuteqarpallaartussaasoq naatsorsuutigineqarpat, suliap oqaluuserineqarnissaanut sinniisoq siulleq siulittaasumit ataatsimiigiaqquneqassaaq.
§ 7. Najukkami ataasimiititaliap sumiiffimmi suliai pillugit pissutsinik paasissutissiinissamut kommunalbestyrelse najukkami ataatsimiititaliamit aqqutissiuunneqarlunilu nalunaarfigineqassaaq.
Imm. 2. Najukkami ataatsimiititaliaq kommunalbestyrelsellu aallartitai ikinnerpaamik ukiumut ataasiarlutik oqaloqatigiinnikkut ataatsimeeqatigiittassapput.
§ 8. Suleriaasissaq 1. januar 2019-imi atuutilerpoq.
Imm. 2 Suleriaasissamut allannguutit kommunalbestyrelsimit aalajangiiffigineqassapput, aamma najukkami ataatsimiititaliamit inassuteqaateqartoqarneranit aalajangiisoqarsinnaalluni.