Aqutsinermut Ileqqoreqqusaq

Kommune Qeqertalimmi Aqutsinermut ileqqoreqqusaq

Kommunit aqunneqarnerat pillugu Inatsisartut Inatsisaat nr. 29, 17. novembari 2017-imeersumi 1, imm. 3 naapertorlugu aalajangersarneqarpoq:

Kommunalbestyrelsi

§ 1. Kommunalbestyrelse 15-inik ilaasortaqarpoq.

Imm. 2. Kommunalbestyrelse inatsisartut peqqussutaanni nr. 29, 17. novembari 2017-meersumi 6,

imm. 4 naapertorlugu (tulliuttuni aqutsinermut inatsimmik taaneqartartussaq) ilaasortami akornanni Borgmesterimik, tullissaanik siullermik aappaanillu toqqaassaaq.

§ 2. Piareersarnermut, ataatsimiigiaqqusinermut kommunalbestyrelsillu ataatsimiisinneqarnerinut malittarisassat kommunalbestyrelsip suleriaasiani aamma aalajangersarneqarput, taamaaliortoqartarporlu aqutsinermut inatsimmi Aqutsinermi inatsit 1 imm. 3 naapertorlugu.

§ 3. Kommunalbestyrelsip ataatsimiittarneranut atatillugu Borgmesterip suliassaanut malittarisassat erseqqinnerusut, suleriaatsimi aalajangersarneqarput.

Ataatsimiititalianik pilersitsineq aamma ataatsimiititat taakkua suliassaannik nalinginnaasumik maleruagassat il. il.

Ataatsimiititaliaq Inua

§ 4. Aqutsinermut inatsimmi 24 naapertorlugu aningaasaqarnermut ataatsimiititaliaq, taaneqartoq Inua, pilersinneqassaaq.

Imm. 2. Ataatsimiititaliaq Inuami ilaasortaapput Borgmesteri, aamma ataatsimiititaliami siulittaasuusoq kiisalu kommunalbestyrelsimi ilaasortat arfinillit.

Imm. 3. Ataatsimiititap suliassat aqutsineq pillugu inatsimmi 25 naapertorlugit tassunga suliassarititaasut ingerlanneqarnissaat isumagissavai. Aammattaaq Ataatsimiititaliap Inuap makku suliassarivai:

• Akileraarutit akitsuutillu

• Inuit naalakkersorneqarnerat aamma tamat oqartussaaqataanerat

• Sullissivik/ Borgerservice

• Aningaasarsiaqarnermut sulisoqarnermullu tunngasut

• Nunaqarfinnik isumaqatigiissuteqarluni aqutsineq

• Illuutinik najugaqarfiusunik imaluunniit isatigassanik pisortorneq, tuniniaaneq aamma qularnaveeqqusiineq, kiisalu illuutinik attartorneq - Kommunip sillimmateqarnikkut inissisimanera

• Pisinniarnermi aamma isumaqatigiissuteqarnermi politikki, ataqatigiissaarineq taakkulu aaqqissuussaaneri ilanngullugit

• Kommunip allagaatinut toqqorsivia

• Kommunip suliffeqarfiutaanik piginnittutut soqutigisaqarneq

• Qarasaasiaqarneq

Imm. 4. Ataatsimiititaliaq Inua Kommunalbestyrelsimut siunnersuusiortarpoq aamma inassuteqaasiortarpoq ukununnga attuumassuteqartunik:

• Missingersuutissatut siunnersuutit aamma kommunip naatsorsuutaanik saqqummiinerit

• Karsimut naatsorsuutinut malittarisassat

• Ataatsimiititaliat ataavartut suleqatigalugit kukkunersiuisut nalunaarutaasa akissuteqaatissaanik Kommunalbestyrelsimut siunnersuusiornerit

Imm. 5. Suliaq sunaluunniit, kommunip aningaasaqarneranut, allaffissorneranut pilersaarusiorneranulluunniit attuumassuteqartoq aamma ataqatigiissaarinermut attuumassuteqartoq
Kommunalbestyrelsimut saqqummiunneqartigani ataatsimiititaliamut Inuanut saqqummiunneqaqqaartussaavoq.

Imm. 6. Ataatsimiititaliaq Inua kommunip pilersaarusiornerani aamma aningaasaqarneq pillugu suliassanik ataqatigiissaarissaaq ataatsimoortumillu aaqqiissummik nassaassalluni.

Imm. 7. Ataatsimiititaliaq Inua ukununnga malittarisassiussaaq:

• Missingersuutinik aningaasaliissuteqartarnermullu nakkutiginninnerit, allaffissornermik suliallit nalunaarusiortarneri ilanngullugit

• Kommunimi sulisorisat pillugit suliassat isumagineqarnissaat

• Kommunip naleqartitaanik qulakkeerinninneq

• Inunnut paasissutissat

Ataatsimiititaliat ataavartut

§ 5. Ataatsimiititaliat ataavartut makkua pilersinneqassapput:

1. Ataatsimiititaliaq Inoqarfik, tallimanik ilaasortalik.

2. Ataatsimiititaliaq Timi Tarni, tallimanik ilaasortalik.

3. Ataatsimiititaliaq Inuit, tallimanik ilaasortalik.

Imm. 2. Aqutsinermut inatsimmi 27 naapertorlugu ataatsimiititaliat namminneq siulittaasussartik toqqassavaat.

Imm, 3, Ataatsimiititaliat nammineerlutik suleriaasissatik aalajangersassavaat.

Ataatsimiititaliaq suleriaasissaqanngippat, Kommunalbestyrelsip suleriaasissaa atorneqassaaq.

Imm 4. Ataatsimiititaliap ataatsimiinnerini tamani aalajangiineq pillugu imaqarniliortoqartassaaq imaqarniliarlu ataatsimiinnerup naanerani ilaasortanit, ataatsimiinnermi peqataasimasunit, atsiorneqartassalluni. Ilaasortat tamarmik isummaminnik aalajangiinermit allaanerusumik imaqarniliamut ilanngussisinnaatitaapput, sulianilu ataatsimiititamit oqartussaasunut allanut nassiunneqartussani imaqarniliap imaanik ilisimatitsisoqarnissaa piumasarisinnaallugu.

Imm. 5. Ataatsimiititat Kommunalbestyrelsip ukiumoortumik missingersuutitigut akuersissutigisai naapertorlugit, suliassaqarfittut akisussaaffigisaminni isumaginnissapput. Ataatsimiititaliat akisussaaffigisaminni akuersissutitaqanngitsumik aningaasartuuteqaraniluunnit isertitaqartoqannginnissaa nakkutigissavaat, aningaasaliissutissanillu kissaatiginartunik pisariaqartunilluunniit Ataatsimiititaliaq Inua aqqutigalugu Kommunalbestyrelsimut inassuteqassallutik.

Imm. 6. Ataatsimiititaliamut allamut attuumassutilimmik pingaarutilimmillu suliassaqartillugu, ataatsimiititaliap suliassamik aallartitsinnginnermini ataatsimiititaliaq alla suliamut attuumassuteqartoq isumaqatigiinniarfigeqqaassavaa, pisariaqartitsisoqartillugulu Borgmesteri suliamut akuliutsinneqartassaaq, aqutsinermut inatsimmi 29 naapertorlugu.

Ataatsimiititaliat Inoqarfik

§ 6. Ataatsimiititaliaq Inoqarfiup akisussaaffiit makku aquppai isumagalugillu:

• Inuussutissarsiutit aamma Aatsitassat

• Aalisarneq Piniarnerlu

• Teknikkeqarnikkut suliassaqarfik

• Pilersaarusiornikkut suliassaqarfik

• Pinngortitaq, Silap pissusia Avatangiisillu

• Attaveqaasersuutit

• Pilersuineq

• Upalungaarsimaneq

• Kommunip illuutai aamma illuutinik ingerlatsineq

• Inissialiornermi aningaasalersuineq inissianillu pilersuineq

Imm. 2. Ataatsimiititaliap Inoqarfiup suliassat, imm. 1 naapertorlugu ataatsimiititaliamut suliassanngortinneqarsimasut, aalajangiiffigisassavai.

Imm. 3 Ataatsimiititaliap Inoqarfiup Ataatsimiititaliaq Inua aqqutigalugu siunnersuusiortassaaq aamma Kommunalbestyrelsimut inassuteqaasiortassaaq makku pineqartillugit:

• Ataatsimiititaliap akisussaaffiata ataani malittarisassat

• Ataatsimiititaliap akisussaaffiata ataani kommunip sullissinerinut akigititat

• Ataatsimiititaliap akisussaaffiata ataani kommunip kiffartuussineranut kommunip politikkii iliuusissatullu pilersaarutai

• Periusissiorluni pilersaarummik pilersaarusiorluni suliaqarnermit Kommune Qeqertalimmi kommunimut pilersaarummut

• Kommunimut pilersaarummut tapiliussassatut siunnersuutit, Immikkoortunut pilersaarutit, sammiviliilluni pilersaarutit sanaartugassallu immikkut ittunik qinnuteqaatit, kiisalu nunaminertamik tunineqarumalluni Immikkoortumiluunniit pilersaarummi immikkut ittumik akuerineqarnissamik qinnuteqaatit

• Illuutinik eqqissisimatitsineq piujuartitsinerlu, kiisalu inoqarfinni nunaminertat sanaartorfigineqaqqusaanngitsut, kiisalu nuna asimiittoq - Immikkoortunut pilersaarutinik suliarinnittarnerit

• Inissialiortiternissamut sanaartorfissagissaanermullu pilersaarutit

• Kommunimi pisuinnaat aqqutaannik, aqqusinernik illoqannginnersanillu, kiisalu suliffeqarfiutaanik, atsiinerit

Ataatsimiititaliaq Timi Tarni

§ 7. Ataatsimiititaliaq Timi Tarnip akisussaaffiit makku aquppai isumagalugillu:

• Sunngiffimmi sammisassaqartitsineq

• Kultureqarnermut tunngasut

• Timersornermut tunngasut

• Katersugaasiveqarneq

• Atuakkanik atorniartarfeqarneq

• Katersortarfeqarneq

• Meeqqat pinnguartarfii

• Atualerneq sioqqullugu

• Atuarfik

• Misi

• Peqqinneq pitsaaliuinerlu

Imm. 2. Ataatsimiititaliap Timi Tarnip suliassat, imm. 1 naapertorlugu ataatsimiititaliamut suliassanngortinneqarsimasut, aalajangiiffigisassavai.

Imm.. 3. Ataatsimiititaliap Timi Tarnip Ataatsimiititaliaq Inua aqqutigalugu siunnersuusiortassaaq aamma Kommunalbestyrelsimut inassuteqaasiortassaaq makku pineqartillugit:

• Ataatsimiititaliap akisussaaffiata ataani malittarisassat, ilaatigut kulturikkut timersornermullu peqatigiiffinnut tapiisarnermut malittarisassat aamma Najukkami ataatsimiititaliat malittarisassaat

• Ataatsimiititaliap akisussaaffiata ataani kommunip kommunip sullissinerinut akigititat

• Ataatsimiititaliap akisussaaffiata ataani kommunip kiffartuussineranut kommunip politikkii iliuusissatullu pilersaarutai

Ataatsimiititaliaq Inuit

§ 8. Ataatsimiititaliaq Inuit akisussaaffiit makku aquppai isumagalugillu:

• Isumaginnittoqarfik

• Meeqqat

• Innarluutillit

• Atornerluisunik katsorsaaneq

• Ikiuutit

• Utoqqaat

• Angerlarsimaffimmi ikiorteqartitsineq

• Isumaginninnermi oqartussatut suliassat

• Suliffissaqartitsineq aamma Majoriaq

• Ilaqutariit illui, Qaammaavik

• Ulloq unnuarlu angerlarsimaffik Puilasoq

Imm. 2, Ataatsimiititaliaq Inuit suliassat, Imm. 1 naapertorlugu ataatsimiititaliamut suliassanngortinneqarsimasut, aalajangiiffigisassavai.

Imm. 3 Ataatsimiititaliaq Inuit ataatsimiititaliaq Inua aqqutigalugu siunnersuusiortassaaq aamma

Kommunalbestyrelsimut inassuteqaasiortassaaq makku pineqartillugit:

• Ataatsimiititaliap akisussaaffiata ataani malittarisassat

• Ataatsimiititaliap akisussaaffiata ataani kommunip kommunip sullissinerinut akigititat

• Ataatsimiititaliap akisussaaffiata ataani kommunip kiffartuussineranut kommunip politikkii iliuusissatullu pilersaarutai

Nunaqarfinni aqutsisut

§ 9. Ataatsimoorussamik nunaqarfinnik aqutsisuni ikinnerpaamik ilaasortat pingasut amerlanerpaamillu tallimat toqqarneqassapput. Nunaqarfinni aqutsisut ukunani tassaapput:

1. Iginniarfik, Attu, pingasunik ilaasortalik

2. Ikerasaarsuk, Niaqornaarsuk, Kangerluk, tallimanik ilaasortalik

3. Kitsissuarsuit, Akunnaaq, Ikamiut, tallimanik ilaasortalik

Imm. 2. Nunaqarfinnik aqutsisut siulittaasussaminnik namminneq toqqaassapput, taamaaliortoqartassaarlu aqutsinermut inatsit 51 naapertorlugu. Imm. 3. Kommunalbestyrelsi nunaqarfinni aqutsisut ataasiakkaat tusarniareernerisigut kommunimi nunaqarfiit aqutsisuisa suleriaasissaannik aalajangersaassaaq.

§ 10. Nunaqarfinnik aqutsisut piareersartarneri, ataatsimiigiaqqusisarneri ataatsimiittarnerilu pillugit malittarisassat, nunaqarfinnik aqutsisuni siulittaasup suliassai ilanngullugit, nunaqarfinnik aqutsisut suleriaasianni aalajangersarneqarput, aqutsinermut inatsimmi 51-54 naapertorlugit,

§ 11. Aqutsinermut ileqqoreqqusami ilanngussatut ikkunneqarsimasumi kommunalbestyrelsip aalajangersagaani ersippoq, nunaqarfinni aqutsisuni ataasiakkaani aallartitassat qanoq toqqartorneqartassanersut. (Isumaqatigiissuteqarluni aqutsineq atorlugu ingerlatsineq).

Imm. 2. Ingerlatsineq pissaaq Kommunalbestyrelsip missingersuusiatut akuerisaasa iluanni, aamma maleruaqqusaasut Kommunalbestyrelsimit aalajangersarneqartut malillugit.

§ 12. Kommunalbestyrelsip nunaqarfinnik aqutsisut suliaqarfinnik ingerlatsinerat nakkutigissavai.

Atuutsitsilerneq aqutsinermilu inatsimmi allannguutit

§ 13. Malittarisassaq una atuutilissaaq ulloq 01.10.2026,

§ 14. Ileqqoreqqusami uani allannguutissatut siunnersuutit aamma ileqqoreqqusap ilassutissartai kommunalbestyrelsip ataatsimiinnerini marlunni, sivikinnerpaamik ullunik 14 nik akunneqarlutik
ingerlanneqartuni suliarineqassapput, aqutsinermut inatsimmi 1 imm. 2 naapertorlugu, allannguutissatullu ilassutissatullu akuerineqartut Naalakkersuisunut nassiunneqassapput, aqutsinermut inatsimmi 1, imm. 4 naapertorlugu.

Taamaalilluni Kommunalbestyrelsip ataatsimiinnerini ulloq 11.06.2026 akuersissutigineqarpoq.

Kalaallit Nunaanni kommunit aqunneqarnerat pillugu Inatsisartut inatsisaanni kapitali 3, § 18 naapertorlugu Borgmesteri ulloq 23. juli 2026 aalajangiivoq aqutsinermut ileqqoreqqusaq aatsaat 1.oktober 2026 atuutilissasoq.

Simigaq Heilmann                                  Alida C. Rafaelsen
Borgmester                                             Kommunaldirektør