Tallimanngorneq 5. November 2021 Paarisa, Kalaallit Nunaanni Timersoqatigiiffiit kattuffiat Elite Sport Greenlandilu Maligassiuisut Show 2021 ingerlanneqarnerani Kommune Qeqertalimmi innuttaasut marluk nersornaaserneqarput.
Kalaallit Nunaanni Timersoqatigiiffiit Kattuffianni sungiusaallammattut nersornaaserneqartoq:
· Aasianni Tae Kwondortartut ATK-92 sungiusaasuat Ole Kûitse. Sungiusaallammak
Imatullu oqaasertalerneqarsimavoq:
”2021-mi Sungiusaallammak peqataatitsilluartuuvoq, inoqatikkuminartuulluni tamatigoortumillu attaveqatigeeriaaseqarnermigut inuit assigiinngitsorpassuit ineriartortittarpai. Pineqartoq tunniusimasorujussuuvoq paasisimavaalu angusarissaarnissamut piumasaqaataasoq tassaasoq inuit ataasiakkaat ilivitsutut isigineqarnissaat inuillu tamarmik immikkuullarissuseqartuusut.
”Inuuvutit assigiinngissutsit akimorlugit peqatigiilersitsisimasoq. Meeqqatta inuusuttattalu toqqissisimanartumik peqatigiiffigisinnaasaat pilersissimavat akuersaartumillu anersaaqarnerit peqatigisannut pitsaasumik siammartertarpat. Naak aaqqissuussinerit amerlasuut kisimiillutit suliarisarsimagaluarlugit ilisimasannik misilittakkannillu ingerlatitseqqiisarnerit nersugassaavoq. Suliarisimasannut qujanarujussuaq pilluangaarillu”- Taama oqaaseqarpoq Michael Kleist, Siulersuisunut ilaasortaq Timersoqatigiiffiit Kattuffiat.
Linki toorlugu youtubekkut Maligassiusut Show-imi ilanngutassiaq takuuk Ole Kûitse pillugu:
Paarisamit Ukioq manna inuiaqatigiinni eqeersimaartutut nersornaaserneqartoq:
Ukioq manna inuiaqatigiinni eqeersimaartutut toqqarneqartoq kajumissuseqarluartuuvoq pinngortitarsuaq kulturerpullu aallaavigalugit meeqqanut inuusuttunullu ataatsimoorfinnik peqqinnartunik akuutitsisunillu siuarsaasoq.
Nersornaasiilluni tunniussisuuvoq Meeqqanut, Inuusuttunut Ilaqutariinnullu Naalakkersuisoq, Paneeraq Olsen .
Innersuussinermi imatut oqaasertalerneqarsimavoq:
Jens M. Larsen kattuffimmi Arfeq-85-imi siulittaasutut Attumi meeqqanut inuusuttunullu ukiup ingerlanerani amerlasuunik sammisassaqartitsinissamik sulissuteqartarnermigut aallussilluartuuvoq.Sammisassaqartitsinerit amerlasuut pinngortitarsuarmik kulturimillu aallaaveqartarput. Jens M. Larsen ukiup ingerlanerani ilaatigut meeqqanik inuusuttunillu ammassanniartitsisarlunilu eqalunniartitsisarpoq, aamma qimussersuarmik aaqqissueqataasarpoq. Tamatuma saniatigut nerrivimmi arsaararnermi, isikkammik arsarnermi arctic sportimilu sungiusaasuuvoq.Jens M. Larsenip meeqqanut inuusuttunullu timimik aalatitsiffiusunik, peqqinnartunik akuutitsiffiusunillu ataatsimoorfinnik pilersitseqataanikkut takutippaa innuttaasutut qanoq inuiaqatigiinni sunniuteqaqataasoqarsinnaasoq.
Linki toorlugu youtubekkut Maligassiusut Show-imi ilanngutassiaq takuuk Jens M. Larsen pillugu:
Ukioq manna inuiaqatigiinni eqeersimaartoq
“Tulluusimaarutigeqaavut Kommune Qeqertalimmi Maligassiuisoq Show 2021 ingerlanneqarnerani nersortaatit marluk pissarsiarineqarmata nunaqarfittatsinniit illoqarfimmiillu, taakkua takutippaat timersornerni Kommune Qeqertalimmi siammasissumik ingerlatsisoqartoq nunaqarfimmiikkaanni, illoqarfimmiikkaannilu timersornermik pimoorussineq pingaartinneqartoq.
Nersornaammik tigusisut Jens M. Larsen Attu aamma Ole Kuitse toqqarneqarnissinni pilluangaaritsi, qujanarujussuarlu timersuummik pimoorussinissigut meerartagut inuusuttagullu soqutiginartunik sammisaqartinnerannut isumaqaqisumik tunniusimallusilu sulilluarassi. “- Taama oqaaseqarluni pilluaqqusivoq borgmesteri Ane Hansen.
Ole Kûitse aamma Jens M. Larsen Maligassiuisut Show 2021-mi
nersornaaserneqartut Kommune Qeqertalimmi Timersortartut ulluanni
malunnartitsinermi aamma nalliussineqarumaarput.
Allattoqarfik INUA