Qasigiannguit Katersugaasiviat "Nunaqarfik Uumassusilik" DR oqaluttuarisaaneq pillugu Nuummi nangeqattaartumik filmiliornerani peqataavoq.

Hans Egedep Neriunnerup Qeqertaanut tikinneraniit ukiut 300-nngornerat tunngavigalugu Kalaallit Nunaata Danmarkillu ataatsimoorussamik oqaluttuassartaat pillugu DR nangeqattaartumik suliaqarpoq. Nangeqattaartuliat nalunaaquttap akunneranik ataatsimik sivisussuseqartut immikkoortut sisamaapput, takkulu 2022-mi upernaakkut DR1-imi aamma KNR-imi aallakaatinneqassapput. Suliniut annertooq pimoorussaasorlu Kalaallit Nunaanni Danmarkimilu pisimasuusaartitaavoq, nunani taakkunani marlunni isiginnaartitsisartunit ilisimasalinnillu peqataffigineqartoq. Nangeqattaartumi Lars Mikkelsen aamma Nukâka Coster-Waldau oqaluttuussapput.

 Suliniutip ingerlanerani Qasigiannguit Katersugaasiviat DR-imit suleqatigineqarpoq. 1700-kkut aallartilaarneranni pisartut takutinneqarneranni ingammik atisanut aamma atortunut tunngasutigut suleqatigiinneq tunngavoq. Amernik atisaliat aamma atortut atorneqartut, amernik atisalianut, illumi atortunut (igaffimmi atortunut), atortussianullu allanut kiisalu sakkut 16-1700-kkunni nunatta kitaani atorneqartartunut assigusunngorlugit sananeqarsimapput.

Assiliisoq:Morten Krüger, 2021
Filimiliornemit assi Kalaallit Qallunaallu oqaluttuarisaanerata immiunneqarnera siullermi.

Aallakaatitassiat siulliit marluk Nuummi septemberip aallartilaarnerani immiunneqarput. Nunaqarfik Uumassusilimmeersut amernik atisaliat, atortut, kiisalu tupeq amiusoq 2008-miit ullumikkumut Qasigiannguani Nunaqarfik Uumassusilimmi kajumissutsiminnik sulisunit kiisalu katersugaasivimmi sulisunit suliarineqarput, taakkulu Qasigiannguaniit aatsisartunit Nuummi immiussinermut assartorneqarput utertinneqarlutillu. Aammattaaq aatsisartut immikkoortuni siullerni marlunni immiussinerni peqataapput, soorlu aamma misilitsinnerit immiussinerillu nalaanni aamma amernik atortunillu passussinermi ikortaasut.

Suleqatigiinneq Nunaqarfiup Uumassusillip sulisuinut aamma kajumissutsiminnik sulisuinut unammilligassanik nutaanik pilersitsivoq, taamaattorli aamma misilittakkanik pissangartunik pissarsiviulluni. Taakku tamarmik Qasigiannguani aasaanerani asimi oqaluttuarisaanikkut ingerlatitseqqiisarnerminniit filmiliortunik suleqateqarnertik allaanerusoq annertuumillu misigisaqarfiusoq oqaatigaat.

Qasigiannguit Katersugaasiviat "Nunaqarfik uumassusilik" & DR