Suliassaqarfiit akimorlugit suleqatigiinneq, killiffik november 2020. Kommune Qeqertalik.

5. marts 2021

Kommune Qeqertaliup aallartinneranit killiffik pillugu kommunimi sulisut innuttaasullu naliliineri allaatigisap naalernerani isiginnaagassiat takusinnaavatit. 

Kommune Qeqertalik pilersinneqarmat kommunalbestyrelsi allanit assigineqanngitsumik aaqqissuussaanermik pilersitsivoq.

Kalaallit inuusaatsitsinnut tulluuttumik aaqqissuussaanermi anguniagaavoq allaffissornikkut pisariitsumik innuttaasunut qanilaartumik ingerlatseriaaseqarnissaq kiisalu piorsarsimassutsitsinnut kinaassutsitsinnullu nunarsuarmioqataanitsinnullu naleqquttumik suleriaaseqarnissaq.

Kommune Qeqertalimmi kommunalbestyrelsip isumaqatigiissutaasa ilagivaat innuttaasunik sullissinermi patajaassuseq, unneqqarissuseq minnerunngitsumillu tamat oqartussaaqataanerannik ingerlatsilluarnissaq tunngavigineqassasut innuttaasunut sullissinermi.

Aaqqissuussaaneq immikkut ittoq:

Naalakkersuinermik suliallit aaqqissugaaneri aamma allaffissornerup aaqqissugaanera:

Aaqqissussaaneq allaffissornermi aamma naalakkersuinermik suliallit aaqqissugaanera qiviaraanni aaqqissuugaanermi inunngornermiik utoqqalineq tikillugu ataqatigiissumik suleqatigiiffiusussamik ilusilerneqarsimavoq. Taamaasilluni politikkikkut ataatsimiititaliat aamma allaffissornermi suliassaqarfiit akimut suleqatigiinnermik eqaatsumik innuttaasunik sullissisinnaalerlutik.

Aaqqissugaanermi forvaltninngeqanngilaq, kommunip aaqqissugaanerani politikkikkut anguniakkat kommunalbestyrelsi sinnerlugu borgmesteri siulersortigalugu aqutsineq ingerlanneqarpoq. Allaffissornermi qullersaqarfimmi pisortaaneq pisortaralugu, pisortaanerup tullia aningaasaqarnermut pisortaq, illoqarfiit sullissiiviini pisortat peqatigalugit aalajangiinerit ingerlanneqartarput, Suliassaqarfinni ataqatigiissaarisut siunnersortigalugit. Aalajangikkat suulluunniit sumiiffinni tamani suliassaqarfinni akisussaasunut, immikkoortortaqarfinni aqutsisunut, suleqatigiinni aqutsisunut aamma sullissisunut ingerlateqqinneqartarput. Aamma suliassaqarfik akisussaaffik sumiikkaluarpat suliassamik aaqqitassaqartillugu suliat aallaavigalugit akimut suleqatigiilluni suleriutsinik inerisaasoqartarpoq.

Iikkat uppikaatinneqarput.

Aaqqissuussaaneq nutaajusoq eqaannerusumillu sullissinissaq anguniarlugu illoqarfinni kommunip allaffiini iikkanik uppikaatitsinerit ingerlanneqarnikuupput, allaffeeraasimasut inerujussuanngortillugit. Siornatigut kommunimi sulisumik sulinngittoqartillugu suliat uninngaannartartut iikkat uppikaatinneranni anguneqarpoq susassaqarfiit akimorlugit qanimut suleqatigiinnerulerneq taamatullu inunnik sullissinermi eqaannerusumik sullissisalerneq.

Tassa imaappoq suliassaqarfiit susassaqarfii akimorlugit aamma suleqatigiinneq ingerlanneqarluni, Suliassaqarfik Timi Tarnilu innuttaasut assigiinngitsutigut siammasissumik sammisassaqartinneqarnissaasa isumagineqarnissaat aamma innuttaasut minnerunngitsumillu meerartagut inuusuttagullu timikkut tarnikkullu nukittunerullutik peqqissunngorlutillu peroriartornissaannik qulakkeerinneqataasussaq.

Suliassaqarfik Inoqarfik akisussaaffia ilaatigut tassaavoq illoqarfiuguni, nunaqarfiuguniluunniit pitsaasumik sinaakkutaqarlutik ineriartorluassasut, sanaartornikkut, avatagiisit mianerineqarnissaat, inuussutissarsiortut, sulisartut, ilinniartut, innuttaasut pisariaqartitaannik naammassiniaasussat.

Suliassaqarfik Inuit akisussaaffia tassaavoq Inoorlaaniit utoqqanngorluni kommunitsinni inooqataasunut sullinneqanrerminni pitsaanerpaamik sullissinissamut piareersimasut. Tassaniilluni aamma meeqqeriviit, meeqqat atuarfiat, utoqqaat innarluutillillu isumagineqarneri.

INUA atuuffia tassaalluni allattoqarfik/ ineriartortitsivik, Ataatsimut aningaasartuutit, allaffik. Akileraarutitigut tapiissutit aamma nalimmassaanerit. Erniat (aningaasaqarneq pillugu periusissat). Eqaannerusumik oqimaaqatigiisitsinerit (aningaasaatit aamma akiitsut). Aningaasaqarneq (aqutsineq aamma aaqqissuussaaneq). Sulisoqarnermut immikkoortortaqarfik (aqutsineq aamma aaqqisuussaaneq). IT (akuulersitsineq aamma ingerlatsineq). Illuutit. Pisiniartarneq.

(Suliassaqarfiit qulaani aaqqissuussaaneq immikkut ittumi suliassaqarfii takuneqarsinnaapput

Suliassaqarfiit akimorlugit suleqatigiinneq: Suliassaqarfiit arlaanni sulisut, suliassaqarfimmiinnaq suliaqartanngillat, sullitat atugaat aallaavigalugit suliassaqarfinni assigiinngitsuni suleqataasarput sullissisoq tassaammat sullinneqartumut ilisimasaqarnerpaaq, taamaattumik suliassaqarfiit allat suleqatigalugit sullitat atugaasa pitsaanerulernissaat qitiutillugu suleqatigiinnerit ingerlanneqartarput.

Assip takutippaa assersuutitut sullitaq qitiutillugu sullissinerup ilusilernearsimanera:

Kommune Qeqertalimmi suliassaqarfiit akimorlugit suleqatigiinneq.

Arne Sandgreen Reimer.
Kommunip Sullissiviini Pisortaq, Aasiaat.

” Maanna suliassaqarfinni tamani aqutsisooqatigiit iluminni sulisunik sulinngitsoqartillugu, sulisunik amigaateqartoqassatillugu kivitseqatigiittalernikuupput, assersuutigalugu meeqqeriviit tallimaasuni ataaseq sulisutigut amigaateqalerpata meeqqerivimmiit aallamiit suliartortoqartarpoq, taamaalilluni meeqqerivinni meeqqanut sullissineq vikarilersunngikkaluarluni ingerlanneqarsinnaalluni. Nunaqarfinni aamma suliassaqarfinni suleqatigiinneq ingerlalluarnerulernikuuvoq. Soorlu assersuutigalugu nunaqarfimmi Kitsissuarsunni meeqqerisumik amigaateqartoqaleraangat Sullissiivimmi allaffimmi sulisoq paarlattaasinnaasarpoq, allaffillu inoqartussaammat nunaqarfimmi sulisumik allaffissornermi ilisimasaqartoq allaffimmi paarlattaasinnaasarluni. Taamaalilluni aamma nunaqarfinni ikioqatigiinneq aammalu vikarinik atuinngikkaluarluni sulisut nunaqarfimminni aaqqeeqatigiittarlutik. Massakkut Akunnaami Ikamiunilu aamma tamanna atulerneqaleriartorpoq iluatsilluartumik.” – Taama oqaaseqarpoq Arne Sandgreen, Kommunip Sullissiiviini Pisortaq, Aasiaat.

Søren H. Lange.
Kommunip Sullissiivi Pisortaq, Qasigiannguit.

”Suliassaqarfiit akimorlugit suleqatigiinnerit pillugit Qasigiannguani sulisut 80-it missaaniittut Katersortarfimmi naapeqatiginnerat ingerlanikuuvoq, tamatumalu kingunerisaanik maannamut kommunip suliffeqarfiini suleqatigiilluarneruneq sunniukkiartulersoq malunnarsinikuulluni.Sunniutai pillugit suleqatigiit kingorna naapeqqipput tassani suliassaqarfiit akornanni eqimattanngorluni suleqatigiinnerit siumut isigisumik eqqartorneqarlutik- Taama oqaaseqarpoq Søren H. Lange, Kommunip Sullissiivini Pisortaq, Qasigiannguit. 

Assit: Qasigiannguani suliassaqarfik INUIT allaffiat.
Qasigiannguani iikkanik uppikaatitsineq innuttaasunik sullissineq unitsinnagu ingerlanneqarnikuuvoq, sulisut namminneq init asanneqarnerinut ikiuunnikuullutik.

Kangaatsiaq nunaqarfiinilu najukkami pinaveersaartitsineq.

Najukkani pinaveersaartitsinermut ataatsimiisitaliat pillugit Namminersornerullutik Oqartussat nalunaarutaat nr. 18, 18. maj 2001- imeersoq malillugu inoqarfinni pinaveersaartitsineq ingerlanneqartussaavoq. Peqqinnissaqarfik, Kommuni, kingutileriffiit, atuarfiit sociali, kriminalforsorgen ataatsimut aallartitaqarlutik paasititsiniaanerit ingerlanneqartassasut pilersaarusiornikkut.

Iginniarfimmi Najukkami pinaveersaartitsinermi ataatsimiititaliami ukiumut iliuusissatut pilersaarutit malillugit najukkami pinaveersaartitsisut ataatsimiittarnerminni innuttaasunut paasisitsiniaanermi ingerlanneqartartussat pilersaarusioreerneranni timitaliinissamut ataatsimoorlutik, kaammattoqatigiillutik ingerlattarpaat.

Dorthea Isaksen.
Sullissivik Iginniarfik.

”Innuttaasut suleqataalluarneranni ukiumut iliuusissatut pilersaarutit uniorpallaarnagit ingerlavugut. Ilaatigut uniortitsisarpugut aamma allatuulli innuttaasut peqqissusaat apeqqutaatikkatsigu Iginniarfimmi nunaqqatigut amerlanngimmata ataatsikkuupajaartumillu napparsimmattarlutik, taamaalineranni pilersaarutigut ilaatigut eqikkarlugit ingerlassinnaasarlutigit, innuttaasunut paasisitsiniaanerit ingerlalluassagutsigit peqataasoqarluarnissaa angorusuttaratsigu. Soorunami amerlanerpaartaat pilersaarutit malillugit ingerlasarput, sammisaqartitsinermi tulliani sammisaqartitsinissamut innuttasut erinisuttaqaat peqataalluartaramik.”
- Taama oqaaseqarpoq Dorthea Isaksen, Sullissivik, Iginniarfik.

Attumittaaq Najukkami pinaveersaartitsinermi ataatsimiititaliaq ingerlanneqartarpoq peqatigiiffiit innuttaasullu suleqataarusuttut suleqatiginerisigut.

Assi: Iginniarfimmi innuttaasut ataatsimoortut.

Qeqertarsuarmi illoqarfiup assiga atorlugu pilersaarusiorneq.

Qeqertarsuarmi Kommune Qeqertaliup aaqqissuunneqarneranut tulluuttumik innuttaasunut qanilaartumik ingerlatseriaaseqarnissaq anguniarlugu suliassaqarfiit akimorlugit suleqatigiinnermi Qeqertarsuup illoqarfiata qulaaniit assinga atorluarneqartarpoq:

Benedikte Mølgaard. Kommunip Sullissiviini Pisortaq, Qeqertarsuaq.

“Sulinitsinni assi qulaaniit qimerloorneratigut isigisarparput tassa taannaasoq illoqarfipput, innuttaasut inuuffigisaat. Tassa imaappoq illoqarfitsinni Suliassaqarfik Timi Tarnilumi ilaatigut suliassaat tassaavoq, innuttaasut assigiinngitsutigut siammasissumik sammisassaqartinneqarnissaasa isumagineqarnissaa, Suliassaqarfik Inoqarfiup ilaatigut suliassaat tassaavoq illoqarfitta najoruminartuunissaanut isumaginninneq kiisalu Suliassaqarfik Inuit ilaatigut suliassaat tassaavoq innuttaasut pitsaasumik inuttut atungaqarnissaannik isumaginninneq, assersuutigalugu innarluutillit sulliviani sullissisuuguit imaaginnanngilaq tassaniinnaq suleqataassasutit kisiannili sullitat innarluutillit illoqarfimmi atungaasa pitsaanerulernissaanik suleqataassaatit, tassami innarluutilinnik sullissisoq tassaavoq innarluutillit atugarisaannik ilisimasaqarnerpaaq.Illoqarfiup assiga qimerloorlugu pilersaarusiorlutalu suleqatigiittarnerput assorujussuaq iluarpoq ”- Taama oqaaseqarpoq Benedikte Mølgaard, Kommunip sullissivini pisortaq, Qeqertarsuaq

Allaffissornermi attaveqatigiinneq pisariitsoq.

Allaffissornermi Suliassaqarfiit akimorlugit taamatullu ataatsimiittoqartillugu “skype buisness” aamma “Microsoft teams” atorlugit imminut isigiutingaluni ataatsimiinnerit ingerlanneqartarput. Inoqarfinniit inoqarfinnut, nunaqarfinniit nunaqarfinnut ataatsimiinnerit pisariitsumik ingerlanneqartarlutik. Aamma Kommunalbestyrelsip ataatsimiinnera nittartakkakkut skype attaveqaat aamma oqarasuaat aqqutigalugit ingerlanneqartarput.

Assi: Skype aqqutigalugu ataatsimiinneq.

Akunnaami, Kitsissuarsunni aamma Ikamiuni oqarasuaatikkut aamma nittartagaq aqqutigalugu
Sullissivimmi sulisut attaveqatigiittarnerat.

Akunnaami, Kitsissuarsunni aamma Ikamiuni Sullissivinni sulisut oqarasuaat aamma nittartakkatigut ataatsimiittarfiit atorlugit attaveqatigiinneq pinngitsoorsinnaanngilaat.
Sapaatip akunneranut ataasiarlutik skypekkut naapillutik ataatsimeeqatigiittarput, nunaqarfinni Sullissivinni sulisut amerlanertigut allaffimmi kisimiillutik sulisarput, taamaasillutik ulluinnarni attaveqatigiilluarnerminni aamma sapaatip akunneranut ataasiarlutik ataatsimeeqatigiittarnerminni sulinerminni sutigut tamatigut avitseqatigiittarput.

Anna L. Nielsen. Overassistent Sullissivik Akunnaaq.

“Suliassaqarfeqatigiit nunaqarfiit naapittarnerput iluareqaarput, ulluinnarni oqarasuaat atorlugu aamma skype suliassat tungaatigut paarlaasseqatigiinnerit ingerlattarpagut aamma arlaatigut pinartunik suliaqartoqarsimagaangat akornatsinni annissuiffeqatigiittarpugut, taamaalilluta nunaqarfimmi allaffimmi kisimiikkaluarluta suleqateqarpugut attavigilluakkatsinnik.

Ataatsimut nalornissuteqaraangatta imaluunniit ikioqatigiissutigisinnaanngisatsinnik suliassaqartillugu Aasiannut saaffiginnittarpugut. Aasiannilu suleqatigut aamma oqarasuaatit, mail, skype aqqutigalugit attaveqarfigilluartarpagut” –  Taama oqaaseqarpoq Anna L. Nielsen Akunnaami Sullissivimmi Overassistenti.

Aaqqissuussat.

Kommunimi inoqarfinni tamani aaqqissuussinerit assigiinngitsut ingerlanneqartarput, aaqqissuussaaneq malillugu kommunimi aaqqissuussat, suliassat, inoqarfiit, suliassaqarfiit akimorlugit aamma ataatsimut suleqatigiilluartoqarluni.

Ilaatigut aaqqissuussat annertuut aamma aaqqissuussat, suliassat inoqarfinni tamani assigiissakkamik ingerlasussat, ullorsiornerit, unammisitsinerit illoqarfinni nunaqarfinni suliassaqarfinni sulisut suleqatigiinnerisut pilersaarusioqatigiinnerit, aamma suliaqaqatigiinnerit ingerlasalernikuupput tamanna sulisunit innuttaasunillu iluarisimaarinninnermik annertuumik kinguneqarpoq.

Innuttaasunut paasissutissiiviit.

Inoqarfinni tamani nivinngaaviit, tusagassiuutit, infoskærmit, Qeqertarpaat Tusaataat 93 Mhz aamma kommunip nittartagaa aqqutigalugu paasissutissat, nalunaarutit, pisussat innuutaasunut siammarterneqartarput.

Maannamut suli akimut suleqatigiinneq pitsanngorsarneqarlunilu ineriartorpoq, sulisullu tamanna suleriuseq ilikkarlualersimavaat aamma innuttaasunut nalunaartarneq pisussanik, paasissutissanik pitsanngorsaneqartut ilagivaat.

Kommune Qeqertaliup aallartinneranit killiffik pillugu sulisut sullitallu naliliineri ukunani isiginnaagassiani takusinnaavatit:

Attumi Sullissivimmi Isumaginninnermi ikiorti Oline Nielsen.

Linki toorlugu youtubemi takuuk: Oline Nielsen. Sullissivik, Attu.

Qeqertarsuarmi Sullissivimmi suliassaqarfik Inoqarfimmi aqutsisoq Ane-Sofie Mølgaard.

Linki toorlugu youtubemi takuuk: Ane-Sofie Møgaard. Sullissivik, Qeqertarsuaq.

Kangaatsiap Atuarfiata pisortaanera/ Suliassaqarfik Inuit aqutsisuugallartoq Sussi Adelholm.

Linki toorlugu youtubemi isiginnaaruk: Sussi Adelholm. Atuarfiup Pisortaarnera, Suliassaqarfik Inuit aqutsisuugallartoq, Kangaatsiaq.

Aasiaat, Kommune Qeqertalik killiffik november 2020.

Qeqertarsuarmi innuttaasut Abel Brandt, Johannes Mølgaard, Henning Dalager naliliinerat.

Linki toorlugu youtubemi isiginnaaruk: Qeqertarsuarmi innuttaasut.

Qasigiannguani utoqqaat ornittagaanni "Aliikku"-mi atuisut naliliinerat. (Kingusinnerusuukkut qallunaatut allagartalersorneqassaaq)

Linki toorlugu youtubemi isiginnaaruk: Qasigiannguani utoqqaat ornittagaani atuisut naliliinerat.

Kommune Qeqertalimmi maannamut killiffimmi angusat ilai:

Sanaartorneq

Inoqarfinni tamani sanaartornermut aningaasaliissutinik pissarsisoqarnissaa kommunalbestyrelsimit pingaartinneqarsimavoq, tamannalu innuttaasunit sanaartornermillu suliaqartunit annertuumik maluginiarneqarsimavoq. Kommune Qeqertalinngormit sanaartornerit iluarsaassinerillu piareersimasut aammali suli ingerlanneqartut ilaatigut tassaapput, atuarfiit, meeqqeriviit, umiatsialeriviit, inissiat, utoqqaat illui, puttasut talittarfiit, kommunip allaffii, ilaqutariit illui allallu.Taakku saniatigut pilersaarusiornerit annertuut ingerlanneqarput soorlu kultucenteril immikkut taasariallit ilangivaat.

Eqqaaveqarneq

Kommune Qeqertalimmi eqqaavissuaqarnikkut ukiorpassuarni ajornartorsiutaasup aaqqiivigineqarnissaa siunertaralugu, kommunit allat peqatigalugu eqqagassalerinermik selskabimik ESANI a/s pilersitseqataavoq.

Aqquserngit

Ukiorpassuarni aqquserngit putorpassuallit iluarsartuunneqarsimanngitsut, Kommune Qeqertalimmit immikkut aningaasaliiffigineqarlutik illoqarfinni aqquserngit asfaltiterneqarput innuttaasunit aammalu biiliutilinnit malunnaatilimmik.

Qeqertalik Business Council aamma Destination Disko Bay

Kommune inuussutissarsiornermi suliffeqarfinnik namminersortunillu qanimut suleqateqarluni takornariaqarnermi inuussutissarsiutinillu siuarsaalluni piareersarneqartut tunngavigalugit suliffeqarfimmik pilersitsisoqarpoq.

Pingaartitat aamma politikkit

Kommunalbestyrelsimit pingaartinneqarpoq innuttaasut pitsaasumik sullinneqarnissaat, taamaattumik Kommune Qeqertalimmi pingaartitaliorpoq qulequtaqartunik; Kivitseqatigiinneq, Ataqqeqatigiinneq, Attaveqatigiinneq aamma Suliamut tunniusimaneq. Kiisalu politikkit akuerineqartut tassaapput; Inuit politikkit, Meeqqanut- Utoqqarnut- Innarluutilillu politikkit.

Atuarfinni socialrådgiverit aamma Ipad

Kommunalbestyrelsimit anguniarneqarpoq aamma pingaartinneqarpoq meeqqat atuarfiini angusat pitsanngorsartinnissaat, taamaattumik atuarfinni socialrådgiverinik atorfinititsinissamut immikkut aningaasaliivoq, taamaalilluni meeqqat pisariaqartitsisut pilertortunik ikiorneqartarnissaat angujumallugu. Taamatuttaaq atuartitsinermut atugassanik Ipadinik pisinissamut aningaasaliivoq.

Peqqissuunissaq

Kommunalbestyrelsimi pingaartinneqartunut ilaavoq peqqissuunissaq. Taamaattumik nunaqarfinni illu sullivinni uffartarneq akeqarunnaarsinneqarpoq kiisalu angerlarsimaffeqanngitsut kialaarfissaannik unnuiffissaannillu inoqarfiit ilaanni pilersitsipput. Aammattaaq timersoqatigiiffinnut timersortarfinnik atuisunut unammiarlutillu angalasussasut annertuumik tapiissuteqartarluni.

Tusagassiivik & Illoqarfiit Sullissiviini pisortat.