Aasiaat 16. Marts 2020
Kommune Qeqertaliup COVID-19 (corona virus) ingerlaavartumik malinnaaffigaa. Inuk siulleq Kalaallit Nunaanni manna nualluummik tunillanneqarsimasoq uppernarsarneqarpoq, taamaattumik immitsinnut inuiaqatigullu paarilluarniarlugit maanna suliniutinik arlalinnik sukaterinissamik pisariaqartitsilerpugut.
Inuiaqatigiinni utoqqartagut inuillu timimikkut akiuussutissakitsut sissuertigit.
Utoqqarnut aamma inunnut timimikkut akiuussutissakitsunut TAMANUT pulaarnerit ingammik kommunip utoqqaat illuutaaniittunut, sakkortunerpaamik innersuussutigineqanngillat, tamanna utoqqaat innuttaasunullu timimikkut akiuussutissakitsut angerlarsimaffiinut aamma atuuppoq. Eqimattat taakkua COVID-19-imik tunillaanneqassagaluarunik navianartorsiornerpaasussaaneri innersuussinermut tassunga tunngaviuvoq.
Kommunimi atorfillit angalanissaat unitsinneqarput
Naalakkersuisut angalanerit sapinngisamik ikinnerpaaffissamiitinneqarnissaannik innersuussipput, taamaattumik Kommune Qeqertaliup kommunimi sulisut angalaneri TAMAASA unitsippai, kommunip iluani, nunatta iluani, nunanilu tamalaani angalanerit matumani pineqarput. Nualluutip tuniluuttup killilersimaarniarneranik aamma sulisutta, kommunip inuiaqatigiinni pisarialinnik suliassanik pinngitsoorsinnaanngisatsinnik suliaqartartut, paarinissaannik tamanna tunngaveqarpoq. Sulisut atorfinittussat eqqarsaatigalugit aqutsisooqatigiit naliliipput atorfinilluni angalanerit kinguartinneqassanersut imaluunniit atorfinittoq nuunnermini angerlarsimaffimmi aneqqusaassannginnersoq nalilersuisoqartassaaq.
Angerlarsimaffimmi mattussaagallarnermi atugassarititaasut
Kommune Qeqertalik inissiigallarfissanik Aasianni pisariaqariaqartitsisoqalissappat qulakkeerinninnikuuvoq, aqqusaartut angerlarsimaffimmi mattussaagallarnissaat pisariaqarpat inigineqarsinnaasunik. Mattunneqarallartussat amerlassusaat naapertorlugit mattussaagallartunut inissat amerlassusilerneqartassapput. Efterskolertut angerlariartortut tamatuminnga pisariaqartitsillutik kissaateqassagaluarpata kommuni taakkununnga ikiuunnissaminut piareersimavoq.
Peqatigiiffiit aaqqissuussineri
Aaqqissuussinermi killigititaasut malinneqassasut kommunip siunnersuutigaa aamma utoqqaat peqataalluarfigisartagaannik aaqqissuussinerit, soorlu assersuutigalugu, bingortitsinerit eqqarsaatigalugit innersuussutaasut immikkut ittumik malugeqquneqarput mianersornissarlu eqqarsaatigalugu bingortoqartannginnissaanik Kommune Qeqertalik siunnersuivoq.
Kommunip pisunik malinnaajuarpoq aamma qanoq pisoqaratarsinnaanera aallaavigalugu nalimmassarnissatsinnut pilersaarusiorpugut, taamatuttaaq malittarissassatigut pisarialimmik nalimmassarnissaannut piareersimalluta.
Kommunimut saaffiginnilluni sullinneqartarneq
Sullissivimmut aamma inunnik isumaginnittoqarfimmut nittartagaq imaluunniit oqarasuaat atorlugu saaffiginninnissaminnut periarfissaqanngitsunut suli saaffigineqarnissaminnut ammatinneqarput, taamaakkaluartoq oqarasuaatikkut nittartakkakkulluunniit - taamatut periarfissalinnut - saaffiginnittoqartassasoq inassutigaarput.
Inussiarnersumik inuulluaqqusillunga
Thomas Holm Jensen
Pisortaanerugallartoq