Taxa-nut akuersissuteqarneq tassaavoq, taxa-nik pigisaqarniaruit uppernarsaatitut pigisassat.
Taxa-nut akuersissut tigummiinnassagukku piumasaqaatit marluiit naammassisimasussaavatit.
Siullermik piumasaqaataavoq, taxa-t ataavartumik ingerlasussaanerat. Tamanna ima paasineqassaaq, piffissami sivisunerusumi uninngaannassanngilaq. Biilit ajutumeersimappat taamalu ingerlasinnaanani, piffissarlu sivisunerusoq qaangiuppat aatsaat iluarsineqarsinnaassalluni, najukkanni innuttaasunik sullissivimmut nalunaarutiginissaa pingaaruteqarpoq. Tamatumuuna pinngitsoortissavat taxa-nut akuersissummik kommunimit arsaarneqannginnissat, naak piffissami sivisunerusumi biilit ingerlasinnaanngikkaluartoq.
Aappaattut piumasaqaataalluni, Angallassinermi nalunaarsuiffimmi malittarisassat naammassissagitit. Angallassinermi nalunaarsuiffik tassaavoq qanoq ingerlasimanermik nalunaarsuiffik, tassanilu illit ullormut qassinik ilaasoqarsimanerit qanorlu isertitaqarsimanerit nalunaarsorsimassallutik. Angallassinermi nalunaarsuiffik immersoreerukku, taanna ukiup naatsorsuusiorfiup pineqartup naaneraniit ukiuni 5-ni paarissavat.