Akilersuut immikkut ittoq tassaavoq aningaasatigut tapiineq, ataasiartumik aningaasanik tunniussinertut ilusilik, angajoqqaajusup aappaata (akilersuutinik akiliisartup) angajoqqaaqatiminut (akilersuutinik tigusisartumut) akiligaa, taannalu immikkut ittumik pisuni akilersuutaavoq.
Pisuni tulliuttuni taamaaliortoqarsinnaavoq:
• Meeqqap inunngornera. Anaanaasup qinnuteqarneratigut, meeqqap inunngornerani aningaasartuunitut, kiisalu anaanaasup meeqqap inunngornera qaammatinik 2-nnik sioqqullugu aamma meeqqap inunngornerata kingorna qaammammi 1-mi pilersorneqarnissaanut, ataataasup akilersuutinik akiliinissaa Naalagaaffiup Sinniisoqarfiata naalakkiutigisinnaavaa.
• Meeqqap kuisinnera. Meeqqap kuisinnerani imaluunniit atertaartinneqarnerani, qinnuteqarnikkut angajoqqaamit, kuisitsinermut atertaartitsinermulluunniit akiliinngitsumut, akilersuummik akiliinissaq Naalagaaffiup Sinniisoqarfiata naalakkiutigisinnaavaa.
• Meeqqap apersortinnera/apersortittut ukiuinik angusinera. Meeqqap apersortinnerani, Naalagaaffiup Sinniisoqarfiata akilersuummik aalajangiinissaa qinnutigisinnaavat. Meeqqap apersortinnissaa siusinnerpaamik qaammatit 3 sioqqullugit aamma kingusinnerpaamik ulloq 1 sioqqullugu, apersortinnermi akilersuutinik qinnuteqassaatit. Meeraq apersortissanngippat, meeqqap ukiunik apersortiffinnik angusineranut atatillugu, akilersuummik Naalagaaffiup Sinniisoqarfia aalajangersaasinnaavoq.
Pisuni allani, assersuutigalugu meeqqap napparsimanerani aamma ilisaanerani, akilersuutinik immikkut ittunik aamma qinnuteqartoqarsinnaavoq.
Akilersuutinik immikkut ittunik tigusiniaaraanni piumasaqaataavoq:
• meeraq Kalaallit Nunaanni kommunimi angerlarsimaffeqassasoq
• meeraq imaluunniit akilersuutinik tigusisartoq qallunaat naalagaaffianni innutaasutut pisinnaatitaassasoq, imaluunniit, allakkut, Kalaallit Nunaanni oqartussaasunit akilerneqartunik akilersuutinik tapiissutinilluunniit tigusinissamut pisinnaatitaasoq
• meeraq inuusuttorluunniit pisortanit pilersorneqassanngitsoq
• meeraq meeravissiartaarineqarnissaq siunertaralugu paarineqassanngitsoq
• meeqqap angajoqqaavi najugaqatigiissanngitsut
• angajoqqaap aappaa meeqqap pilersorneqarneranut siulianili akilersuieriissanngitsoq
- Meeqqap inunngornerani aningaasartuutinut ataasiartumik aningaasanik tunisinneq: 612 kr.
- Meeqqap inunngornera sioqqullugu qaammatini 2-nni akilersuutit aamma inunngornerata kingorna qaammatini marlunni akilersuutit qaammammut: 646 kr.
- Kuisitsinermi ataasiartumik aningaasanik tunisinneq: 816 kr.
- Meeqqap apersortinnerani imaluunniit pisuni assigisaanni ataasiartumik aningaasanik tunisinneq: 3.241 kr.
Akilersuutinut immikkut ittunut akigititat ukiumoortumik Kalaallit Nunaanni Namminersorlutik Oqartussanit aalajangersarneqartarput.
Akilersuutinik immikkut ittumik qinnuteqarniaruit internettimut attaveqarneq atorlugu attataasaq quppernerup uumap qulerpiaaniittoq sungaartoq “Uani qinnuteqarit” atorlugu qinnuteqassaatit. Imminut kiffartuussivimmik aaqqiineq atorniarukku, illit inuttut MitID-t atorlugu qupperneq pulaffigissavat.
Qinnuteqaatinni ilanngussat tulliuttut ilanngutissavatit:
- Apersortinnissamut ilinniartinneqarnermi meeqqap peqataanut uppernarsaat (apersortinnermut akilersuutinik qinnuteqarnermi)
- Meeqqap napparsimaneranut, toquneranut imaluunniit pisunut immikkut ittunut atatillugu aninngaasartuutit aningaasartuutigineqarsimasut uppernarsaataat.
Takussutissiat pisariaqartinneqartut ilanngunneqarsimanngippata, Naalagaaffiup Sinniisoqarfiata qinnuteqaatit suliarisinnaanngilaa.
Toortagaq sungaartoq “Uani qinnuteqarit” toorlugu, digitaliusumik imminut kiffartuunneq aallartissavat.
Maluginiaruk:
Illit MitID-t atorlugu quppernermut pulaguit, qinnuteqaatit digitaliusumik taamaallaat nassiussinnaavat.
Qinnuteqaat Naalagaaffiup Sinniisoqarfiata tiguguniuk aamma suliaq naammassillugu suliarineqarpat, Naalagaaffiup Sinniisoqarfia aalajangiinermik suliaqassaaq.
Qinnuteqarnissamut piffissaliussaq eqqortinneqarsimanngippata, akilersuutit immikkut ittut pillugit
Angajoqqaajusup aappaata isumaqataanngikkaluarpalluunniit, akilersuummik immikkut ittumik qinnuteqarsinnaavutit.
Taamaattoqarpat angajoqqaajusup aappaa Naalagaaffiup Sinniisaata tusarniaaffigissavaa, taamaalilluni taassuma meeqqanut akilersuutinik qinnuteqarsimanerit ilisimalissavaa. Tamatuma kingorna taanna qinnuteqaammut oqaaseqaateqarnissamut periarfissaqarpoq.
Naalagaaffiup Sinniisoqarfiata aalajangiinera qinnuteqaatip itigartinneqarsimaneranik imaluunniit akuerineqarsimaneranik imaqassaaq.
• Kuisinnermut akilersuutit meeqqap inunngorneranut atatillugu qinnutigineqassapput.
• Meeqqap apersortinnissaa siusinnerpaamik qaammatit 3 sioqqullugit aamma kingusinnerpaamik ulloq 1 sioqqullugu, apersortinnermi akilersuutit qinnutigineqassapput.
• Meeqqap apersortittut ukiuinik angusinerani apersortinnertaqanngitsumi meeraq 13-inik ukioqalerpat aamma meeqqap 15-iliinissaa tikillugu akilersuutit qinnutigineqarsinnaapput.
• Kinguaattooruteqarneq naleqquttumik tunngavilersugaanngippat, assersuutigalugu meeqqap napparsimanerani ilisaaneranilu aningaasartuutit aningaasartuutigineqarsimanerisa kingorna kingusinnerpaamik qaammatit 2 qinnutigineqarpata, taamaallaat immikkut ittumik pisoqartillugu akilersuutit taamaallaat aalajangersarneqarsinnaapput.
Naammagittaalliornissamut ilitsersuut
Naalagaaffiup Sinniisoqarfiata aalajangiinera Social- aamma Boligministereqarfimmut naammagittaalliuutigineqarsinnaavoq. Naammagittaalliuut Naalagaaffiup Sinniisoqarfianut nassiunneqassaaq, taassumalu naammagittaalliuut suliallu takussutissat Social- aamma Boligministereqarfimmut ingerlateqqissavaa.
Naammagittaalliornissamut piffissaliussaq
Taassuminnga tigusinerpit kingorna sapaatit akunnerisa 4 iluanni Naalagaaffiup Sinniisoqarfiata aalajangiinera naammagittaalliuutigissallugu periarfissaqarputit. Taassuminnga tigusinernit sapaatit akunneri 4 sinnerlugit qaangiussimappata, taammallaat pisuni immikkut ittuni aalajangiineq pillugu naammagittaalliuutit suliarineqarsinnaavoq.