Asasakka sulisartut, ilaqutariit inuusuttullu
Ullumi ataatsimoorluta nalliuttorsiortigaarput nunarsuarmi tamarmi sulisartut ulluat – ulloq, inuup imminut ilaquttaminullu pilersorsinnaaneranut inuunerissaarnissamullu toqqammaviusoq, sulisartut pingaaruteqassusiannik, inuiaqatigiit ingerlanissaannut qitiunerannik akisussaassuseqartumillu inuuneqarnermik eqqaasitsiffiusoq.
Ulloq tassaavoq kingumut qiviarfiusoq – sulinikkut qanoq ingerlasimanitsinnik – aammali siunissamut qanoq ataatsimoorluta ilusilersuinissatsinnut.
Ullumikkut piffissami unammillernartumiippugut. Kommunitsinni suliffeqarnikkut inissisimaneq eqqarsaatigalugu.
Siullertut Aasianni fabrikkip matuneqarnissaanik ernumaneq. Ilaqutariittut imminut napatinnissap nalorninartorsiortinneqarnera ernumanermik pilersitsimmat paasilluarpara, ilungersorpugut kommunitsinnut ilaqutariinnut inuussutissarsiortunullu kinguneri kingunerisassaalu pillugit oqariartuuteqarnikkut aammalu kommunitta siunissaa aningaasarsiorneq eqqarsaatigalugu qanoq ineriartortissanerlugu takorluugaqarnitsigut.
Inuussutissarsiornikkut siuariartuutaasinnaasut ilaatigut takornariaqarnikkut periarfissanut tunngassuteqarput, nunatsinni mittarfissuit sanaartorneqarlutik piareeraluttuarput, sulili kommunitsinni angallannikkut pissutsit pitsaanngillat, taamaakkaluartoq malugisinnaasatsinnik takornarissat ikiliartunngillat tassuunalu qanoq aningaasarsiorsinnaanerluta eqqarsaatigisariaqarparput, angallannikkullu atugassarititat pitsaanerulersinnissaanut suliassaqarluta. Pinngortitarput qanoq atorluarsinnaavarput? Pinngortitamik atueriaaserput attatiinnarlutigu qanoq aningaasarsiorfiginerusinnaavarput? Oqaluttuaatigut qanoq aningaasarsiutigisinnaavagut?
Taamaattoq illuanik allamik unammilligassaqarpugut: sulisussanik amigaateqarneq. Aamma sulerulunneq. Tamanna ullumikkut malugereerparput – soorlu utoqqaat illuanni sulisussanik pisariaqartitsineq annertooq piuvoq, sulilluartullu sulerulupput. Ukiuni aggersuni tamanna annertusiartuinnassanngippat immitsinnut aperisariaqarpugut: ullumi suna iliuuseqarfigisinnaavarput, aqagu inuiaqatigiittut nukittunerulerumalluta?
Akissut uatsinniippoq.
Suliffeqarfiit ilai sulisussaaleqipput, inuilli ilai aningaasaqarnikkut pitsaanerusumik kissaateqarput, imminerminnulli tulluartumik suliffissaaleqipput.
Inuit ilaasa atugarissaarneq sulinertut isigaat. Sulinermut akisussaassuseqarluartuupput, ullut tamarluinnaasa suliartortut, suleqatertik suliartunngittoorpat suleqqittartunik, imaluunniit suliffimminni sulereeraangamik allamut suliartortartunik.
Sulineq pisussaaffiinnaanngittoq, imminermulli pilersornikkut atugarissaarnissamut akisussaaffeqarnermik imaqarpoq, taamaammat inuusuttuaqqat siusissukkut sulinermut pulatittariaqarpagut, siusissukkummi aallutagut pigiliuttarpagut, taamaammat inuusuttuaqqat inuiaqatigiinni kivitseqataasinnaanerannik siusinnerusumi aqqutissiuuttariaqarpagut.
Oqariartuutigerusuppara una, siunissaq ornitarput pillugu suliffissatigut sulisoqarnikkullu killiffipput ammasumik eqqartorsinnaasariaqarparput.
Ilumoorsinnaava suliffissaaleqisoqartoq suliffeqarfiillu sulisussaaleqisut?
Sulinermut eqqarsartaaserput sumiippa?
Sulinikkut kommunerput pitsaasumik piujuartitsisumillu kinguaariinnut ingerlateqqitassarput ataqqeqatigiilluta, akisussaaqatigiinnermik imaqartillugu ataatsimoorluta oqaloqatigiissutigisariaqarparput.
Qujanaq sulinissinnut.
Qujanaq piumassusissinnut.
Qujanaq Kommune Qeqertalimmi siunissamik ilusilersueqataagassi.
Sulisartut ullorsiornissi pilluaritsi.