Sapaatip-akunnera kingulleq Naalakkersuisut siulittaasuat Jens-Frederik Nielsen Kommune Qeqertalimmut tikeraarpoq. Tikeraarneq Qeqertarsuarmi pivoq.
Qeqertarsuarmi kommunip ataatsimiittarfiani Kommune Qeqertalimmi borgmesteri Simigaq Heilmann aamma Naalakkersuisut siulittaasut JensFrederik Nielsen ataatsimeeqatigiipput. Ataatsimiinnermi kommunitsinni illoqarfiit sisamat nunaqarfiillu arfineq-pingasut ineriartornikkut periarfissaat, atugassarititat, anguniakkat, unammillernartitallu oqaluuserineqarput.
Tikeraarput pillugu borgmesteri ima oqaaseraliivoq: “Tikeraartorput alutorineqaqaaq, ataatsimiinnermi oqariartuut pingaarutilik apuussara tassaavoq illoqarfiit nunaqarfiillu tamarmik immikkoorutilimmik tunniussassaqartut, aningaasarsiornikkut kivitseqataalluarsinnaavugut angallanneq aaqqinneqarsinnaappat.” Naalakkersuisut siulittaasuata tikeraarnera iluatsillugu suliffeqarfiit namminersortut, Arktisk station kiisalu Najugaqatigiiffik Ikinngutit pulaarneqarput.