Jens Karl Broberg inuusoq Qeqertarsuarmi 28.juli 1954 – toqusoq Qeqertarsuarmi 3. august 2025
1. AQQUTISSAQ NALUNARTOQ
GUUTIP AQQUTISSIAA
UKIOQ NUTAASSAMIITTOQ
MAANNA ORNILERPARPUT.
2,3,4,5,6...
7. NAALAGAQ AGGEQQUGUMMA
TUNNIUSIMAVUNGA
ANGEREERAMA ILINNUT
KUISIMASUUGAMA.
Taama aallartippaa, naggaserlugulu erinniorlugulu taalliani, sineriassuatsinni nuannarineqaannarani pingaartutut erlinnartuutitullu atorneqartuartoq, tamatsinnut qamuuna attortiffiusartoq.
Kommune Qeqertalik inummik immikkuullarilluinnartumik annaasaqarpoq. Inuk peqqinnermini inoqatiminut akuliussuuttorsuunngikkaluarluni, anersaakkut annertuumik sineriassuatsinnut tunniussaqartoq.
Inuugallarnermini aqqusaagai, aammalu inuttut assigiinngitsunik ilinniagaqarluni nunaminut asasaminut puigugassarinngisatsinnik, qaqugumullu eqqaajuarlugillu tusarnaartuagassatsinnik inuiaqatigiit kalaallit qimatsivigai.
Nalunaarasuartaatilerisutut Qaqortumi ilinniagaqarpoq. Telegrafistitut – nalunaarasuartaatilerisutut – illoqarfiit Qaqortoq aamma Nuuk suliffigisimavai. Inuttaatalu quiagalugu eqqaasarpaa iliniakkaminik naammassisorlu inunngorfimmini Qeqertarsuarmi nalunaarasuartaatilerivik matusimasoq, allamullu nuunneqarluni. Qeqertarsuarmi STI, maanna Majoriamik taagugaq aallartisaaqataaffigisimavaa. 1990-ikkunni Ilinniarfissuarmi iliniartitsisunngorniarneq aallartikkaluarpaa, siutimigulli ajornartorsiuteqarami allatut ajornartumik nuannarigaluaqalugu taamaatiinnartariaqarsimavaa.
Aamma kommunimi sinniisutut Atassut sinnerlugu issiasarpoq. Angumminit Isajas Brobergimit piniarneq, aammalu qajartorneq ilinniagaralugit nuannarilluarlugit aallutarisarisimavai. Tamakkulu kingorna angallammik aalisariummik piginneqataavoq.
Jens Karl Brobergip takutippaatigut inuunermi peqqitsilluni saaffissaleqineq aqqutaanngitsoq. Qularutissaanngilarlu kinguaajusut angummik ingerlaasaa arajutsisimanngikkaat, inersimalernerminni namminersorsinnaaneq namminerlu pilersitserusunneq kinguaavisa ingerlateqqimmassuk. Kissaataasalumi annersaasa ilagisimavaat kinguaami sumilluunniit ilinniagaqalernissaat.
Taamatuttaaq nuannarilluakkaminik inuunermini sulinermini timmisartulerisutut illoqarfiit arlaqartut sullivigisimavai, Qeqertarsuarmi inunngorfimmini naggasikkaminik. Toqussi tikillugu Blue Water Qeqertarsuaq ingerlappaa.
Angut inooqataanermini nuimaniartuunngitsoq soqutigisamigulli immikkuullarilluinnartoq.
Soqutigisarilluinnagaasa ilagaat kangerlunni sinerissatsinni arlalinnik – qularnanngitsumik – inuunermini immiivigilluarfigisartakkaminik illuaraateqarpoq. Sunngiffimmini nulii, meeqqatik ernguttatillu peqatigalugit qasuersaarfigisarlugillu tarnimigut immiivigilluinnartakkaminik. Illuaraataasa ilaannut iseraanni – misigitinneqartarpugut – tikilluaqqusaaneq pattappalaarnermik ilaqartittagaa.
Jens Kaalip soqutigisaasa ilagilluinnarpaat oqaatsitta, aammalu nunap aqqisa eqqortumik atorneqarnissaat. Taamaattumillu naqqissuisarneri maqaasisaassapput.
Imminut nammineerluinnarluni pattanneq, aammalu kingusinnerusukkut nuusersorsinnaaneq ilinniarsimavaa.
Aperineqaraangami taalliortuunersoq akissutigisarpaa: “Naamik erinniortuuvunga, ullulli ilaanni tassanngaannaq, imaluunniit ukioq sinnerlugu aatsaat taallartassaa takkuttarpoq”!
Taama oqareerluni eqqaasarpaa ulloqartartoq/ unnuaqartartoq “pattagissami tungaanut ajattarneqartarnini”. Oqartarporlu erinnat takkuttut immiutinngikkaangamigit puigorneq ajorlugit, qaratsaminiilli katassinnaaneq ajormata immiuteqqaarlugit sininniarsinnaanngortarluni aatsaat.
Qularnanngilaq taalliortorsuavut/ erinniortorsuavut ilisimasagut assigalugit, qamuuna piginnaaneqartoq noqissinnaanngisaminik piviusunngortittakkaminik.
Erinniorlugillu taalliarpassui sinerissatsinni aammalu Qallunaat Nunaanni, erinarsoqatigiippassuarnit nuannarineqarlutik maanna atorneqartualerput, qaqugumullu eqqaamaneqartuarnissaa matumuuna naqissuserneqarluni. Taamatuttaaq taallat ataasiinnaanngitsut allanit taalliaasut – tusagassiuutitigullu nalliuttuni nuannarilluarlugillu tusartuakkagut - erinniarigai ilisimalluarparput.
Suliarpassuani minnerunngitsumillu erinniarpassuani taalliorneqareersut taalliorneqanngitsullu nuliaminut kinguaaminut qimataasa ilagaat.
Jens Karl Brobergip erinarsoqatigiit “Nikanaq” pilersillugu, ukiorpanni erinniani taallianilu taakkunatigut tusarnerluinnartunik, nalliuttuni ulluinnarnilu tusarnaartittarpaatigut puigugassarinngisatsinnik.
Qularnanngilarlu, pinngortitsisini pillugu erinniorlugillu taalliarpassuarmigut nersorinnissuterpassuarmigullu inuunermi killissani eqqissilluni ornissimassagaa.
Jens Karl Brobergip qimatarai nulii Hansigne, meeqqatik arfinillit, ernuttatillu qulaaluat.
Jens Karl Brobergip eqqaaneqarnera ataqqinartuuli.
Qeqertallip Kommunia sinnerlugu
Borgmester
Simigaq Heilmann