Piitannguaq Hendriksenimut eqqaaniut

Piitannguaq Hendriksenimut eqqaaniut

Piitannguaq inuusimavoq apriilip 16-ni 1935 Attumi anaanami illunnguani, uersagaasimavoq qitornatuaasimallunilu.

Piitannguaq meeraanerminiit taamanikkut pissutsit eqqarsaatigalugit qularnanngilaq ulluni imaannaanngitsuni atuisarsimassasoq, tassami marluinnarnik ukioqartoq,angaava piniartaat ajunaarsimavoq taamaalillunilu piniartaarullutik.

Piitannguaq ukioq 1937 marlunnik ukioqartoq Aqisserniamut nuussimapput, taamaalillunilu Aqisserniaq qaatuffigisimallugu.

Piitannguaq kisermaajunini aallaavigalugu suli meeraalluni illumi annertuumik akisussaaffimmik tigusilluni oqartarnikuuvoq ”iput artorunnaarakkuli umiaasamik angalalerpunga” inuussutissaqarniarnikkut pilersuisuulersimavoq, ilaatigut illuni peqatigalugu.

Piitannguaq poqersuunini suliamillu aallussilluartartuunini meeraanerminiit pigisimavaa, taamaalillunilu Nuummut ajoqissatut piukkunneqarluni ilinniariartoqqusaasimagaluarluni. Taamatut piumaffigineqarnera illuata  Emil Steenholdtip itigartissimavaa, qularnanngitsumik meeraaneraniit pinialoqatigisarnerani takoreeramiuk qanoq aalisarnikkut piniarnikkut allatigullu piginnaasaqartigisoq.  Oqarfigisimavaa ”qeqarsiivakkit angallatitaarniarama ikiortiginiarlutit”. Uggornaqisumilli Emiili Piitannguaq qeqarmat aappaaniatigut suli ukiuusoq aamma ajunaarsimalluni.

Piitannguaq inerikkiartornermini imaannaanngitsunik nalaataqartaraluarluni, ilaatigut anaanaminit asaneqaqaluni perorsarluarneqarnermigut uersagaagaluarluni taamanikkut uersakkanut pissusilersuutaasarsimasut eqqarsaatigalugit akisussaaffinnik assigiinngitsunik suli inuusuttunnguulluni pisortaniit tuniorarneqartarsimavoq, tassalu 1958-imi nuliaqalerluni ataatsimillu meeraqalerlutik, anaanani qimassinnaanngisani ilagalugit Attumut nuussimapput, taamaalillunilu aalisartuunermi piniartuunermilu saniatigut tatigisaalluni pinerluttaalisitsisutut atorneqalersimalluni, ukiualunni ingerlassimasaminik, taamaattorli ilaatigut inuussutissarsiutini aallunnerorusullugu nammineerluni tunuarniuteqarsimavoq, taamaattorli ukiualunnguit qaangiutiinnartut piumaffigineqaqqissimalluni kommunefogeditut atorfik tigoqqittariaqaraa tamannalumi aamma akuerisariaqarsimallugu.

Piitannguaq uersagaagaluarluni qularnanngitsumik anaanaminit tunngavilerluarsimaneqarnini nakooqqutigalugu 1960-ikkut qiteqqunneranniit angerlarsimaffimminniit kommunimi sulisut akissarsiassaat, kiisalu isumaginninnikkut ikiortariaqartut suliassartaat allaffissornikkut isumagisarisimavai,1977-imiillu 2010 tikillugu ukiuni 33-ni eqqartuusseqataasartutut inissisimasimavoq, taamatuttaarlu peqatigiiffilerinikkut annertuumik suliaqartarsimalluni, soorlu 1967-imi maannamut peqatigiiffik ingerlasoq ”iliveqarfilerisut” aallartinneqalermata annertuumik siuttunut ilaalluni pilersitseqataasimavoq, ataqqinaammillu ilaasortaaffigalugu. Taassuma saniatigut Attumi utoqqaat peqatigiiffiat aallarnisarneqarmat 2022-mi Kangaatsiami utoqqaat illuannut nuunnini tikillugu siulersuisoqarnikkut suleqataalluarsimalluni.

Piitannguaq maannakkut kommune Qeqertalimmi utoqqaanersarisimasarput 2022-mi ”ullormiit ullormut” timikkut pisinnaanerminik annertuumik nakkariaateqarnermigut nunani ilaquttanilu asaqisani qimallugit Kangaatsiami utoqqaat illuannut nuuppoq, tassanilu marlunngornerup unnuaani toqussi tikillugu najugaqarluni.

Piitannguaq annertuumik eqqaasassaqarnaraluartoq, soorlu qimussimik ukiuunerani piniarnikkut, nuannareqimmagumi oqartariaqarpunga Piitannguup kommune Qeqertalimmi utoqqaanersatta  inussiarnerlunilu ilakkuminartup, immikkoortitsisuunngitsullu toquneratigut,inummik inuiaqatigiinni suliniuteqarluarsimasup toquneratigut annertuumik annaasaqarpugut qarsupiinnarneqarsinnaanngitsumik.

Piitannguaq Hendriksen /Piitannguup eqqaaneqarnera ataqqinartuuli.

Piitannguup qimatarai ernini Kaaleeraq, ukussi ernuttani ernutaqqiutini soralussani allallu siuliminit qanigisarisani, tamassi uummammik pisumik, Kommune Qeqertalik sinnerlugu misiginneqatigalusi.

Kommune Qeqertalimmi