- Piviusorsiortariaqarpusi

Piviusorsiornerusariaqarpusi
Allattoq Kommune Qeqertalimmi borgmesteri Simigaq Heilmann

Kommune Qeqertalimmi borgmesteritut pisussaavunga Ilulissani GUX-liornissamik takorluuinermut qisuariaateqassallunga. Isumaqataavunga nunatsinni ilinniarnissamut periarfissat amerlanerusariaqartut, tamanna ataatsimoorfigisinnaalluarparput. Taamaattoq Aasianni GUX-qareersoq qaavatigut Ilulissani GUX-mik pilersitsinissaq kommunitsinnut annertuumik eqquinerluttussaammat ernumassutigaara. Kommune Qeqertalimmut aningaasatigut, suliffissaqarnikkullu eqqorneqartussaavoq, pinngittoorani ilinniartukkillippat sulisussat atorfissaqartinneqartut ikilissapput. Qarasaasiatigut atuarneq periarfissanngormat ilinnialerlutik tikittartut ikilereernikuupput, tamannalu innuttaqassutsikkut aningaasaqarnikkullu malugineqareernikuuarput taamaattumik pissutissaqarpunga uparuassallugu. Piviusorsiortutut isiginngilara nunatsinni ilinniarnertuunngorniarfiit sisamaareersut, qarasaasiatigut ilinniarsinnaanermik periarfissaqareersoq, ilinnialertartullu ikiliartortut ilinniarnertuunngorniarfiit tallimanngortinneqarnissaannik suliniarneq. Allatut eqqarsartoqartariaqarpoq.
Nunarput tamaat isigalugu ilinnialernissamut kajumissaarineq periarfissanillu amerlanerusunik ujartuinissaq aqqutissiortariaqarparsi. Inunngortartut amerliartunngillat, GUX-mullu qinnuteqartartut ikaliartoratik, taamaattoq kikkut tamarmik ilinnialernissaminnut inissaqartuaannanngimmata teknologi ineriartuinnartoq atorluartariaqarpoq. Ullumikkut qarasaasiatigut najugaq qimanngikkaluarlugu ilinniarsinnaaneq periarfissaavoq, isumaqarpunga iluliarmiut kisiisa pinnagit nuna tamaat innuttaasunut ilinniarnikkut periarfissiinissaq sulissutigineqartariaqartoq. Nunattami ilinniarsimassutsikkut qaffassarnissaa pisariaqartipparput.
Ullumikkut killiffipput qiviartariaqarparput, pissutsit piviusut atukkagut imaannaanngissiartorput, inuuniarneq akitsoriartorpoq, imigassamik ikiaroornartumillu atuineq ajornartorsiutaapput. Taamaammat kommunitut siuarsaaqataajumalluta inuussutissarsiorneq takornariaqarnerlu siuarsarusupparput, mittarfissuit sanaartorneqartut naammanngillat, illoqarfiit minnerusut talittarfeqarnikkut silaannakkullu angallassinerit siuarsaavigisariaqavippagut ineriartornermut kivitseqataajumalluta, tassungalu iliuuseqaqataasariaqarpusi. Aasianni ilinniartuunissaq kajungernarsarnerorusoqaarput, ilisimavarput ilinniartunut sammisassat pitsaanerusut, peqqinnarnerusullu kissaatigineqartut tamakkununnga aqqutissiuusseqataarusuppugut. Taamaammat kaammattorumavassi GUX-mik allamik pilersitsinngikkaluarlusi ullumikkut pioreersut pitsanngorsarnissaannut suliniaqqullusi.
Ilinniartitaanermut, kulturimut, timersornermut ilageeqarnermullu Naalakkersuisoq Nivi Olsen Ilulissani GUX-qalernissaq pillugu piffissami qaninnerpaami oqaloqatigiumallugu saaffiginikuuara.