2020-p upernaakkut nunami isumaginninnikkut pisortaanerit tamarmik akuersissuteqarnerisigut isumaginninnikkut inatsisilerituut attaveqartarfiat pilersinneqarpoq. 2020-mi decembarimi Nuummi Isumaginninnermut aqutsisoqarfiup aaqqissuussineratigut siullermeertumik naapinneq ingerlanneqarpoq, peqataasussat 2020-mi aasakkut toqqarneqarput.
Siunertaq
Attaveqartarfiup siunertaa tassaavoq nunatsinni kommunit isumaginninnermut inatsisitigut ammasumik siunersiueqatigiinnissaminnut periarfissaqarnissaat. Ullormut oqaluuserisassanut tunngatillugu peqataasut tamarmik sunneeqataasinnaapput.
Tunngaviatigut eqqarsaataasoq tassaavoq nunatta isumaginninnikkut inatsisilerituunut suliatigut siunersiueqatigiissinnaaneq, tassani oqaluuserisassat eqqartukkallu nakkutilliinissamut suliamik kinguneqartitsisussaassanngillat.
Siunertaa tassaavoq oqaluuserisassat tusarniaanermut akissuteqaatissamut tunngaviliinissaat, Isumaginninnermut Naalakkersuisoqarfimmi inatsisiliornermut kiisalu Kalaallit Nunaanni Isumaginninnermut Aqutsisoqarfimmit suliniuteqarnissaannut paasissutissiinissaq il.il.
Peqataasut suliffeqarfimminnit sinniisutut aallartitaassanngillat, inatsisilerituutulli atuuffeqarnermisut peqataassapput.
Piumasaqaatit
Peqataasut inatsisilerituujussapput ilinniarsimasut aamma Kalaallit Nunaanni isumaginninnerup suliassaqarfiata iluani sulisuussapput.
Kommunit inatsisilerituumik atorfeqartitsinngitsut oqaluuserisassanut immikkoortunik nassiussinissaminnut kingornalu ataatsimiinnermi imaqarniliamik nassitsiffigitinnissamut periarfissaqarput.
Kommunit inatsisilerituumik atorfilittaqanngitsut attaveqartarfiup saaffigisartagassaanik attaveqaataasussamik toqqaassapput.
Siunertaavoq kommunit tamarmik attaveqartarfiup piginnaatitsineranik naligiissumik atuisinnaasarnissaat.
Nakkutilliisutut inissisimasut soorlu Det Sociale Ankenævn, Tilsynsenheden il.il. attaveqartarfimmi peqataasinnaanngillat, peqataasut ataasiakkaat illersorneqarnerat eqqarsaatigalugu, kiisalu attaveqarfimmi naammaginartumik siunersiueqatigiissinnaaneq anguniarlugu.
Unamminartitanut aalajangersimasunut tunngatillugu tikeraarlutik peqataasunit saqqummiisoqassagaangat ilanngussinissamut isumaqatigiinneqaqqaartassaaq.
Peqataasut attaveqartarfiup naapiffissaa ulloq ullut 14-it sioqqullugit ullormut oqaluuserisassatut ilanngussassaminnik nassiussisassapput. Naapinnissaq sapaatip-akunneranik sioqqullugu ullormut oqaluuserisassat nassiunneqartassapput. Attaveqartarfiup ataatsimiinnissaa ingerlanneqassappat ullormut oqaluuserisassat ullormut ataatsimut naammattumut sammineqarsinnaasariaqarput.
Peqataasut ajornartorsiutinut/unamminartitanut tunngatillugu assersuutaat inuit paasissutissartaannik imaqarpata, taakku attaveqartarfimmut avitseqatigiissutiginnginnerani kinaassusaat ilisarnarunnaarsarneqassapput.
Attaveqartarfimmi sulianik ataasiakkaanik suliaqarnissamut periarfissaqanngilaq.
Nalinginnaasumik ajornartorsiutinut siunnersorneqarnissamut ilitsersorneqarnissamullu periarfissaqarpoq kiisalu kommunimi ajornartorsiutinik piusunik isumaginninnissamut atatillugu isumasiueqatigiinnissamut periarfissaqarluni. Kommunit ajornartorsiutip ersarissarneqarnissaa pillugu assersuutinik ilisarnarunnaarsakkanik ilanngussinissaminnut periarfissaqarput, kisianni siunertaanngilaq attaveqartarfiup ajornartorsiut tamaat aaqqiissuteqarfigissagaa. Aaqqiissutaasinnaasunik ammasumik oqallittoqarsinnaavoq tassanili kommunip pineqartup nammineq suliamik suliarinninneq isumagissavaa.
Ataatsimiinnermi ornigulluni aamma attaveqaatit aqqutigalugit peqataanissaq periarfissaassaaq.
Peqataasut peqataanerminni ingerlatsisussatut pisussaaffimmik tigusisarput. Ima paasillugu attaveqartarfiup ataatsimiittarfittut inissisimaffii sumiiffimmiit sumiiffimmut nikerartassapput. Ukioq mannalu Kommune Qeqertalik qaaqqusisuuvoq. Ingerlatsisoq ataatsimiiffiusumik ullormik ingerlatsisassaaq, sumiiffissamik inniminniisassaaq, teknik isumagisassavaa, ataatsimiiffissami ullormi ullup qeqqasiutissat, ullormut oqaluuserisassat suliaralugit aamma ullormit imaqarniliaq suliarisassavaa. Ingerlatsinissamik pisussaaffik kaaviaartumik pisassaaq.
Peqataasut suliffiata angallassinermut, ineqarnermut aningaasartuutit, sulisorisamullu aningaasartuutit allat isumagisassavai.
Attaveqartarfimmi tatiginninneq, eqqartuineq aamma qanilaarneq eqqarsaatigalugu ornigulluni peqataasarnissaq orniginartinneqarneruvoq.
Paasissutissat
Peqataasut tamarmik ullormut oqaluuserisassanut nassiussinissaminnut naligiimmik inissisimapput. Naatsorsuutigineqarpoq attaveqartarfiup naapinnginnerani atuagassiat atorneqartussat atuarneqartarsimanissaat. Piareersarnissaq pisariaqanngilaq. Attaveqartarfik oqalunnikkut siunersuilluni attaveqartarfiuvoq, aamma peqataasunut annertunerusumik suliakkiissuteqarfiusussaanngilaq, kisianni peqataanissamut sulinermut piffissamik atuineq. Ataatsimiinnissaq sioqqullugu sivisunerpaamik akunnermik ataatsimik sivisutigisumik ullormut oqaluuserisassat atuarneqarsinnaanerat nalilerneqarpoq, tamatuma kingorna ingerlatsisup akisussaaffigaa ulloq ataatsimiiffiusup isumagisassartai suliarissallugit aamma imaqarniliussalluni.
Aallaavittut attaveqartarfik ukiumut marloriarluni ataatsimiittassaaq.
