Kiffartuussinissamut Isumaqatigiissut sivittorneqarpoq
Kommune Qeqertaliup Qeqertalik Business Councilip kiisalu Destination Diskobayip kommunemut Kiffartuussinissamut Isumaqatigiissutaa, januaarip aallaqqaataaniit 2024-miit decembarip 31-anut 2027-mut atuuttussaq oktobarip 26-ani kommunalbestyrelsemit akuerineqarpoq.
Tamannalu isumaqarpoq Inuussutissarsiutitigut Takornariaqarnikkullu Siunnersuisoqarfiup Qeqertalimmi siuarsaaqataanissaa ukiuni sisamani tulliuttuni ingerlaqqissasoq. Taassumalu saniatigut Siunnersuisoqarfiup Periusissiassaa nutaaq 2024-miit 2027-p naanissaata tungaanut atuuttussaq kiisalu 2024-mi Inuussutissarsiutitigut Takornariaqarnikkullu Pilersaarusiaat aamma akuerineqarlutik.
Kommune Qeqertalimmi inuussutissarsiuteqarnermik takornariaqarnermillu ukkatarinninnerulernissamik politikkikkut piumasaqaatit naapertorlugit, kommuni takornariaqarnikkut suliffeqarfittullu najoruminartuunissaa anguniarlugu Inuussutissarsiutitigut Siunnersuisoqarfik ukkatarinnilluni suliniuteqarnini ingerlateqqissavai.
”Assorsuaq nuannaarutigaarput ukiuni kingullerni sisamani kommunimi inuussutissarsiuteqarnikkut takornariaqarnikkullu suliniutigisimasagut kommunimit iluarisimaarneqarsimasut, maannakkut sullisigut ateriarlugit ukiuni tulliuttuni sisamani suliassagut nutaat pissanganartorpassuit qilanaaralugit aallutissuagut”. Taama Qeqertalik Business Councilimi Siulersuit Siulittaasuat Hanne Kristiansen oqarpoq.
Periusissiaq nutaaq 2024-miit 2027-milu atuuttussaq suliniutinik nutaanik 29-nik ilassuteqarpoq, siornatigut suliniutit 2020-2023-milu ingerlatat 42-ruusut saniatigut, taakkunanilu sammisat ilaatigut inuussutissarsiutitigut aaqqissuusseqqinnissamiit geoturismemut tunngassuteqarsimapput.
Periusissiami nutaami immikkut ukkatarineqartussatut qulequtsersukkat imaapput:
• Sukumiinerusumik aallarnisartunut siunnersuinerit
• Aningaasaliisussarsiullaammaat
• Takornarissanut toqqaruminarsaaneq
• Piujuaannartitsineq
Kiffartuussinissamut Isumaqatigiissut Qeqertalik Business Councilip Siulittaasuanit Hanne Kristiansenimit kiisalu Borgmester Ane Hansenimit decembarip aallaqqaataani 2023-mi kommunip allaffiani naapeqatigiinnermi atsiorneqarpoq.
Periusissiamut imaluunniit Kiffartuussinissamut Isumaqatigiissummut tunngatillugu annerusumik paasisaqarusukkuit, Siunnersuisoqarfik.