Borgmester Ane Hansen / Inoqarfiup siulittaasua Klaus Lundblad
Qeqertalimmi Siumut gruppiata nittartakkatigut aviisimi sermitsiaq.ag ulloq 6. marts kommunip illuutaanik Qeqertarsuarmiittumi illu B-17 tuniniarneqarnerata suliarineqarnera sungiussisimarpalunngitsumik assuarnartumillu suliarineqartoq naliliivoq.
Isornartorsiuineq paasiuminaatsipparput, suliamullu tunngatillugu erseqqissaarusuppugut.
Taamatullu Siumut gruppiata suliffeqarfimmik immikkoortitererusunnerat inatsisit malillugit unioqqutitsinerunersoq, immimut illersorsinnaanngitsoq taamatullu Kommune Qeqertaliup tunngavigisaanut naapertuutinngitsoq.
Ataatsimiititaliaq Inoqarfimmut inassuteqaataa (teknikkimut ataatsimiititaliaq) imaappoq, illuut B-17 tuniniarneqassanersoq imaluunniit kommunimit suli pigiinnarneqassanersoq. Illuut taanna kommunimit ingerlanneqartumit ammerivittut imaluunniit kommiunip silami sulisuisa sannaviattut maannalu toqqorsivittut atorneqarnikuuvoq.
Ataatsimiititaliaq Inoqarfik aalajangerpoq inassuteqaatigineqartoq avaqqullugu, illuut B-17 Qeqertarsuarmiittoq suliffeqarfik aqqa taaneqartumut attartorneqassasoq.
Ataatsimiititaliap aalajangiinissamut pisinnaatitaaffiata avataaniippoq, tassami kommunip illuutaanut allaffissornikkut ingerlanneqartussat kommunalbestyrelsip aalajangiiffigisussaammagit. Taamaakkaluartoq suliffeqarfiit allat avaqqutiinnarlugit suliffeqarfik aalajanagersimasup soqutigisai aallaavigalugit kommunimiit aalajangiisoqarniarpat nangaanartoqassaaq. Tamanna unammilleqatigiinnermut killilersuissaaq, tamannalu inerteqqutaavoq.
Ataatsimiititaliaq Inua (aningaasaqarnermut ataatsimiititaliaq) ataatsimiinnerminni ataatsimiititaliaq Inoqarfiup aalajangiinera atorunnaarsillugu aalajangerpoq. Illuli tamanut ammasumik neqerooruteqarluni tuniniarneqarnissaanut piareersaasoqassasoq aalajangiisoqarluni, taamatullu illup tunineqarneranut kommunalbestyrelsi akuersisuussasoq.
Inuami aalajangiisoqarnerata nalaani, ataatsimiititaliami ilaasortat arfineq marluusut, sisamaasut Siumumit tunuliaqutaqarlutik ilaasortaapput. Taamaammat Siumumit isornartorsiuneq tutsuiginartutut tigusinnaanngilara. Tamanut ammasumik neqerooruteqartitsilluni tuniniaanissaq ataatsimiititaliamit aalajangerneqartoq isumaqatigiissutigineqarpoq, tamannalu aalajangiineq Karl Thue Nathanielsen (S), Frantz Lundblad (S), Ole I Frederiksen (S) aamma Enok Sandgreen (S) peqataaffigaat.
Suliaq kommunalbestyrelsimiit ingerlanneqaqqullugu, illumik tuniniaanissamut tunngaviatigut isumaqatigiissusiorput. Tunngavissaq tassaavoq akisunerpaamik taasisumut tunineqarnissaa, illumullu neqeroortitsereernermi suliaq naammassineqaleruttorpoq.
Isumaqatigiissusiarineqartoq Siumut gruppianit isornartorsiorneqarnera paasiumiunaatsipparput, illu akisunerpaamut neqeroortumut tunineqassasoq. Illumut neqerooruteqarsinnaanermut kikkunnut tamanut ammasumik periuseqarneq ammaassivoq, taamatullu kommunimiit aningaasaqarnikkut imminut illersorsinnaasumik iliuuseqartoqarluni.
Suliffimmut arlaanulluunniit illu kommunimiit attartortitsisoqassagaluarpat, imaluunniit kikkunnut tamanut ammasumik neqeroortitsisimanngikkaluarpat, qanitanik salliutitsinermik kammalaatersornermulluunniit kommunalbestyrelsi aatsaat isornartorsiorneqarsinnaanngussagaluarpoq. Kommunalbestyrelsip taamatullu Siumup 2021-miit 2025-mut periusissiatut iliuusissaanut unioqqutitsisimassagaluarpoq, innuttaasunut eqqortumik iluamillu sullissisumik, partiimik apeqqutaatitaqanngitsumik maleruagassat iliuusissatullu malitassat eqqortut malillugit qulakkeerinnittumik sullinneqarnissaanut.
Taamaattumillu kommunip suliffeqarfimmik immikkoortitsilluni tapersersuisimaneranut oqaatiginninneq illersorsinnaanngilarput. Inuit nittartakkatigut naapittarfianni uatsinnut suleqatitsinnullu malersuinerup tamanna allanngortissinnaanngilaa.