Naalakkersuisut Siulittaasuat Aasianni
Tallimanngornermi januaarip ulluisa arfernanni 2023 Naalakkersuisut Siulittaasuat Múte Bourup Egede Aasianni innuttaasunut ukiortaami ilassinnippoq nal. 16-18.
Tamassumallu pinnginnerani Kommune Qeqertalimmi borgmester Ane Hansen atorfilittanilu (Naalakkersuisut Siulittaasuata allattaa Niels Dorph aamma Namminersorlutik Oqartussat Pisortaanerat Hans Peter Barlach Christensen) ullup qeqqasioqatigaat.
Katersortarfimmi ukiortaami innuttaasunut ilassinninnermi Múte Bourup Egede qanimut issiaqatiginera oqaloqatigineralu innuttaasunit nuannarineqarluarpoq.
Ulloq taanna Kunngit Pingasut Ullorimmassuk, tassa avannaani ukiutoqqamiit ulloq taanna ilanngullugu mitaartoqartarpoq – tamannalu marlunnartinniarlugu ASP-miit mitaartut katersortarfimmut iserput aliikkusersuillutillu. Mitaartullu kinaassusertik isertorluinnartarnerat pissutigalugu paasineqanngilaq kikkut mitaartuunersut.
