Hotel SØMA Aasiaat allilerneqalerpoq
Pingasunngorneq novembarip ulluisa 16-ianni nunatsinni Sømandshjemmenik piginnittuusut Danmarkimeersut aamma Kommune Qeqertalimmi ataatsimiititaliaq INUA siullermeerlutik naapeqatigiipput, tamannalu pivoq Kommune Qeqertaliup ataatsimiittarfiani.
Naapeqatigiinnermi eqqartorneqarpoq Hotel SØMA Aasianni allilerneqarnissaa.
Kommune Qeqertaliup akuersinissaa pisariaqartipparput
- Hotel SØMAp ineriartortinnissaanut kommunip tapersersuinissaa pisariaqartipparput. Siunissami Aasianni kissaatinut pisariaqartinneqartunullu naapertuunnersoq erseqqissumik politikerinit oqaatigineqarnissaa pisariaqarmat. Taakkununnga ilanngullugu siunissami ineriartornermi suleqatigerusuppagut umiarsualiveqarneq sunngiffimmilu sammisassat eqqarsaatigalugit, kiisalu pilersaarutinut tulliuttunut kissaatit piviusut eqqarsaatigalugit. Inuussutissarsiorneq, takornariaqarnermi ineriartortitsinermi illoqarfiullu innuttai peqatigalugit kommunip suleqatiginissaa qilanaarisorujussuuarput. Taama oqarpoq Erik Ramballe Hansen, ingerlatsinermi pisortaq.
Alliliinissaq annersaavoq
Hotel SØMA Aasiaat allileriffigineqarnissaa suliniutaasartuni annersaavoq. Tamannalu kr. 150 mio. aningaasaqartaqassaaq. Tamannalu namminneq aningaasatigullu suleqatigisartakkatik peqatigalugit suliniut aningaasalersussavaat. Taama oqaluttuarpoq Erik Ramballe Hansen, ingerlatsinermi pisortaq.
Aasaq 2023 suliaq aallartisarneqassaaq
Hotel SØMAp allilerneqarnerata suliarineqarnera aallartisarneqassaaq aasami 2023. Polaroilip tungaanut aqqusineq allanngortinneqartussaammat qaqqaq qaartinneqassaaq. Hotel SØMAmilu pisortap illua allamut nuunneqassalluni. Sanaartornertaa 2024-mi aallartinneqassaaq. Naatsorsuutaavorlu allissutip 2026-mi naammassineqarnissaa.
Naammassineqaruni ineeqqat 22-t, ataatsimiittarfiit inunnut 60-inut naammattut, neriniartarfik aamma igaffimmi- kiisalu toqqorsiveqarnikkut atortorissaarutit nutaat pilersinneqassapput.
