Ullumikkut novembarip ulluisa 15-ianni, Aalisartut Piniartullu Ulluanni, Aasianni angoqqaanniuutsitsisoqarpoq. Innuiattut ullorsiornermi angoqqaanniuutsitsineq ingerlanneqartaraluarpoq. Ukioq mannali Inuiattut ullorsiornermi sila imarlu angoqqaanniuutsitsinissamut tulluutinngimmata ullumut aalajangersimasumuunngitsoq kinguartinneqarnikuuvoq. Tassalu ullumikkut Aalisartut Piniartullu Ulluanni Aasianni Aalisartut Piniartullu Peqatigiiffianni aalajangerneqarsimavoq angoqqaanniuuttoqassasoq.
Angoqqaartut
Ullumikkut Aalisartut Piniartullu Ulluanni Aasianni piniartoq Miki Erik Brandt angoqqaartuuvoq Aasianni Aalisartut Piniartullu peqatigiiffianni siulittaasoq. Nal. 10:45 missaa tikiuppaa, Tasillup alannguani allattooq pisaraa. Inuttaata nammineq oqarneratuut: - Ungasiaruttortoq kiaana uniorniassuaa takoqqikkunnannginnakku. Taama oqarpoq Miki Erik Brandt. Miki Eriup pisani uullilaariarlugu tuniniassuaa.
Miki Eriup pinnattaarai: Qinngutitaq, puisinnguaq qiperugaq benzinalu 100 l.
Tulliulluni tikiussisuuvoq Ungaaq Andersen. Nal. 11.30 missaa tikiussisuulluni. Isuamiut Anaarsuillu avannaatungaanni aataarsuaq pisaralugu. Puiserujussuaq. Inuttaa oqaluttuarpoq: - Oqimaangaarmat qaqinneq ajuleraluarparput. Suulup umiatsiaanut qaqingajaqaarput qaqitsiviginnerummat. Qanormi aamma pisareriarlugu artussuaarpuullaataa qaqipparput. Qimmilinnut tuninissaa ilimanarpoq.
Ungaap pinnattaaraa benzinalu 50 l.
Malik Jensen pingajuulluni nal. 12.15 missaa allattooq aataannguutilersoq tikiuppaa. – Aamma nikillikareertoq tammaraluarparput. Maliup pisani Akunnaap eqqaani pisaraa. Taannalu oqarpoq pisani qimmiminnut nerliutiginiarlugu. Maliup pinnattaaraa benzinalu 50 l.
Puisiarannguaq qiperugaq (Pokal)
Puisiarannguaq qiperugaq tassa Kommune Qeqertalimmit angoqqaartumut pinnattaassaritinneqartalertussaq. Tassa Inuiattut Ullorsiornermi angoqqaartumut tunniunneqartartussaq. Massakkullu aasaq manna angoqqaarniuttoqarnikuunngimmat massakkut tunniunneqarpot.
Ullup sinnera
Ullumikkut 15. november 2022 Aalisartut Piniartullu Ulluanni Aasianni nal. 13.30 kajumissaasiisoqassaaq. Angoqqaartullu pinnattaassaannik agguaanneqarlutik. Kaffillerneq ingerlanneqarpoq nal. 16-17 tungaanut.
