Arnaaraq iggavimmi
Arnaaraq Sandgreen 27-nik ukioqarpoq. Inunngoramili niuani saamerlermi kanaavata saarnga qituttuuvoq. Arfineq-pingasunik ukioqarluni siullermik niuusalertippoq. Ukioq 2022 manna apriilimi kipineqaqqippoq saaneq atunngitsoq ujallunik kiggitsitsisartoq peerlugu. Aggustimi nutaamik niuusalertippoq, taanna ippinnarpoq sungiusarniarneralu oqimaannerulluni. Tamannali aporfiginagu qiimasuugami illarumatuujullunilu inuuneqarpoq.
Inussutissalerinermi assistentitut ilinniarsimasuuvoq, 2015-imiillu meeqqerivimmi Kullumi sulilerluni.
Arnaaraq suminngaanniit sulerusussuseqarneranik aperiganni ima akivoq: - Iggavimmiuuneq nuannarigakku, ilaqquttannit kammalaatinnit suleqatinniillu tapersersorneqarama maani sulinera nuannareqaara.
Arnaaraq aamma timersoqatigiiffimmi ASP (Aasianni sisorartartut peqatigiiffiat - ujakkaartartutut) aqqutigalugu aamma timersortarpoq, meeqqanullu sungiusaasuusarluni. Tamannalu pillugu oqaluttuarpoq: ASP-mi sungiusaraangatta nukissamik nuannaarnermillu tunisisarpoq. Tassani timersortartoqatinnit tapersersorneqarluartarpunga. Meeqqanulli sungiusaasarnera uninngatikkallarpara, uatsilaaq taanna aalluteqqilissavara, Arnaaraq naggasiivoq
Arnaaraq suleqatinilu Sara Abelsen
Suliaminut pikkorimmat iluatigeqaara
Kullumi ningiu Arnâránguak´ Reimer suliffeqarfittut illuanik nioqanngitsumik sulisoqarneq pissutigalugu arlaatigut ikiorsiissutinik pisariaqartitsisimanersut, imalu akivoq: Arnaaraq sulilermalli inuttut allatuulli isigigatsigu tamakkuninnga atorfissaqartitsinngilagut.
Imalu aperaara: Danmarkimut niuni suliaritikkiartormagu piffissaq sivisooq atorneqarpoq. Tamanna pillugu immikkut iliuuseqarpit? Arnâránguarlu ima akivoq: Ukiumut ullut 120-t napparsimasinnaatitaavugut. Kisianni Arnaaraq iluatigeqigakku, suliaminullu pikkorimmat aalajangerpunga ullut taaneqartut qaangeraluarpagilluunniit soraarsinniarnagu tapersersorusunneruara. Suliaminut pikkorimmat meeqqanillu tiguaasinnaalluni. Inunnguuseralugu niua ajorami, taamaattumillu suliaritikkiartortariaqarluni, taamaammat isaasalerlugu “pissutissaqanngilanga” soraarsissallugu. Kisianni ullut taakku angunngilaarlugit suliartoqqippoq. Massakkullu siullermik ullup affaa sulisarpoq, kingusinnerusukkut allatut aalajangeeqqissalluta isumaqatigiippugut.
Arnaaraq ningiunilu Arnâranguak´ Reimer
Arnaaqqap sulileqqinnera pillugu aperaara: Suliartoqqikkavit suleqatitit meeqqallu qanoq ippat? Imalu akivoq: Meeqqat kipissimallutik takugaminnga nuannaarsuaarput suleqatikkalu. Qungujulluni Arnaaraq oqaluttuarpoq.
[Paasissutissat] Kulloq
Arnaraq Sandgreenip suliffia Kulloq meeqqeriviuvoq meeqqanut 70-inut inissaqartitsisoq. 1958-imi atulerpoq, ukiullu tulliani ukiuni 65-ini atuutilinerminiit angussallugit. Ullumikkut meeqqat 66-it Kullumittarput. Novembarip aallaqqaataaniit 67-68-inngussapput.
Meeqqerivimmi Kullumi iikkani qalipakkat tassa sulinermik piginnaanngorsartut qalipataraat.
