Kangaatsiami Majoriaq aqqutigalugu aktiverertunik marlunnik eqqaavimmi sulisoqarpoq. Sulisut angutit marluk aallartinnerminni maannamut assut malunnaataalluartumik siuariaataasumillu tunniussaqareerput. Tassuuna takutippaat qanoq suliffimmut tunniusimatiginertik aalajaatsuunertillu.
Naak suliassat oqitsuinnaanngitsoq aamma sullivik minguitsuinnaanngikkaluartoq suliallu oqittuinnaanngitsut nukersornartullu isumagisaraluarlugit naammagittaalliortuunngillat amerlanerpaatigullu takkuttuartuullutik.
Sulisut Luutsivik Jeremiassen aammalu Poul Brandt killiffiat angusaallu pillugit assut Kommune Qeqertalik Kangaatsiamit nersualaarinninnerput, qujamasunnerput aammalu tulluusimaarutiginninnerput suaarutigerusupparput.
Kangaatsiami eqqaavik August 2022 assilisaq
Taamatullu Niaqornaarsummi eqqaavimmik isumaginnittut aktiverertut eqqakkanik suliaqarluarnerat malunnarpoq. Eqqagassanik immikkoortiterineq aammalu poortuineq ingerlavoq pissusissamisut. Abel aammalu Mike saniatigut pedel-inik ikioqatigiillutik suliarisarpaat. Niaqornaarsummi innuttaasunut eqqaariaaseq atorneqalersimavoq soorlu qajukut nerisakullu immikkut eqqaavilersorneqartalerluni. Eqqaavilerilluni assut malunnaataalluarsimavoq, aammalu inoqarfinnut allanut innersuunnartuulluni.
Taakkununngattaaq qujamasunnerput suaarutigissallugu pissusissamisoorpoq.
Niaqornaarsummi eqqaavik Maj 2022 assilisaq
Eqqakkanik suliaqarnermi eqqakkat sisamanut agguataarneqartussaapput. Ikuallajasut, savimernit, eqqakkat ulorianartut aammalu elektronik-it. Eqqakkat ikuallariaannaat poortueriaatsit assigiinngitsut atorlugit poortorneqartarput piffinni assigiinngitsuni. Niaqornaarsummi poorsuarnut Bigbagsinut poortorneqarput. Kangaatsiami plastikimut nermussorlugit poortorneqarlutik. ESANI eqqakkanik aallilerpat eqqakkat Niaqornaarsummi amerlanerpaat tinguneqassapput. Kangaatsiamilu eqqakkat aamma poortorsimasut allallu savimernit tinguneqarnissaat naatsorsuutigivarput, tassami ESANI aalleqqaarnermini ikuallajasut aammalu savimernit aaqqaarnissaat siunniussimangallarmagu.
Niaqornaarsummi qajukoorfinnik pilersitsisimapput, innuttaasut atorlualereersimasaannik
Sulisut eqqaavinnik isumaginnittut qulaani piffinni kisimi qujaniarfiginianngilagut, taamaattorli aamma inoqarfinni allani eqqaavinnik suliaqartut qujaniarnerput ersarissarusupparput, suliap nutaajusup atiniarnerani, piumasaqaatit nutaat malinniarneranni maannamut killiffiannut.