Christian Lyberth
Christian Lyberth
• 22. februar 1933 Sisimiuni inunngorpoq
• 30. august 2022 Qasigiannguani toquvoq
• 12. september 1964 katippaa Margrethe Lyberth f. Samuelsen, Akulliit
Ilinniagaa atuuffiilu
• 1950-54 Elektrikeritut iliniagaqarpoq
• 1956 Københavnimi El-installatørinngorpoq
• Illoqarfinni arlalinni GTO-mi installatøriuvoq
• 1958-imiit Qasigiannguani elinstallatørinngorluni
• 1966-imiit elinstallatøritut namminersortunngorluni
Politikkikkut atuuffii nersornaaserneqaataalu
• 1967 kommunalbestyrelsimi ilaasortanngorpoq, piffissani arlaqartuni siulittaasuusarluni borgmesteriusarlunilu
• 1989-93 borgmesterinngoqqippoq
• Ineqarnermut, teknikkeqarnermut avatangiisinullu ataatsimiititaliami ilaasortaasarpoq
• Katersugaasiveqarnermut siulersuisuni ilaasortaavoq, taamattaaq
• Takornariaqariaqarnermi peqatigiiffimmi, peqatigiiffinnilu arlalinni ilaasortaasimalluni
• 1994 Qasigiannguani ataqqinaatitut innuttanngortinneqarpoq ukiorlu taanna aamma Namminersornerullutik Oqartussat Nersornaataannik sølviusumik saqqammiulerneqarluni
• 1997 Den Kongelige Belønningsmedalje med krone saqqarmiulerneqarpoq.
Borgmesteriusimasoq Christian Lyberth toqukkut qimaguppoq
Marlunngornermi 30. august 2022 nalunaarfigineqarpugut Qasigiannguani borgmesteriusimasoq Christian Lyberth 89-inik ukioqarluni Qasigiannguit Peqqissaaviani eqqissilluni toqukkut qimaguttoq.
Christian Lyberth Qasigiannguit ineriartorneranut annertuumik sunniuteqarpoq, pingaartumik kommunalbestyrelsimi qinigaaffinni arlalissuarni ilaasortaaffeqarnermigut, minnerunngitsumillu borgmesteritut atuuffeqarsimanera eqqaamaneqaatigalugu, taamattaaq Qasigiannguit suliffeqarnikkut ineriartornera annertuumik aamma sunniuteqarfigisimammagu.
Christian Lyberth 22. Februar 1933 Sisimiuni inunngorpoq. Angajoqqaarivai saffiortoq Jens Lyberth (1949-mi toqusoq) nulia Kirsten Lyberth, inunnguuseralugu kinguliaqartoq Heilmann (toqusoq 1989).
Christian Lyberth 12. september 1964 katippoq, nuliarilerlugu Margrethe Lyberth, inunnguuseralugu Samuelsenimik kinguliaqartoq, Akullerni 14. juli 1942 inunngortoq.
1950-imiit 1954-imut Christian Lyberth elektrikeritut ilinniagaqarpoq, Københavnimilu 1956-imi el-installatøritut naammassivoq, tamassumalu kingorna illoqarfinni arlalinni GTO-mi, tassa naalagaaffiup suliffeqarfiutaani Grønlands Tekniske Organisationimi el-installatøritut atorfeqarpoq ilaatigut
Qasigiannguani 1958-imiit atorfigalugu. Christian Lyberth 1966-imi autoriseret el-installatøritut namminersortunngorpoq.
Christian Lyberthip Qasigiannguit politikkikkut ineriartornerani annertuumik sunniuteqarfigivai, 1967-imiilli Qasigiannguit Kommuneugallarmat kommunalbestyrelsimut ilaasortaasarsimammat, ilaatigut siornatigut kommunalbestyrelsit formandeqartarallarmata siulittaasuuffigisarlugit kingornagullu borgmesteritut taaguuteqalermata qinigaaffinni arlaqartuni Qasigiannguit borgmesteriuffigisarlugit. Taamaalilluni aamma 1989-imiit 1993-ip tungaanut Christian Lyberth borgmesteriusimavoq, taamattaarlu Ineqarnermut, teknikkeqarnermut avatangiisinullu ataatsimiititaliami ilaasortaasimalluni.
Christian Lyberth Qasigiannguit katersugaasiveqarneranut annertuumik inerisaaqataavoq, katersugaasiviullu siulersuisuini ilaasortaasarsimalluni.
Christian Lyberthip eqqaamaneqaataasa pingaarnerit ilagaat Qasigiannguani peqatigiiffilerinerni eqeersimaartuunera, peqatigiiffinni assigiinngitsuni inerisaaqataasimammat, minnerunngitsumillu Qasigiannguit takornariaqarnikkut aallartisarnerani inerisarneranilu takornariaqarnermut peqatigiiffiup aallartinneranut inerisarneranullu ilaalluinnarsimammat.
Taamaalilluni Qasigiannguit innuttaasumik ataqqinartumik, annertuumillu sunniuteqartumik annaasaqarpoq.
Ataqqinaatitut takussutissaapput Christian Lyberth 1994-imi Qasigiannguani ataqqinaammik innuttanngortinneqarmat ukiorlu taanna aamma Namminersornerullutik Oqartussat nersornaataannik sølviusumik saqqarmiulerneqarmat.
Christian Lyberth Kunngikkormiunik tikeraartoqarnermi 1984
Christian Lyberth nunatsinni taamaallaat nersorniaannarneqanngilaq, tassami 1997-imi Den Kongelige Belønningsmedalje med krone, tassa nersornaat kunngikkormiorpalaartumik saqqarmioq niaqorutaasartalimmik Dronningimiit saqqarmiulerneqarami.
Kommune Qeqertalimmiit Christian Lyberthip ilaqutai qimagaalu allat qamannga pisumik misiginneqatigivagut.
Christian Lyberthip eqqaaneqarnera ataqqinartuuli.
Kommune Qeqertalik sinnerlugu Borgmester Ane Hansen