Asiunaveersaasartut Teit Jørgensenip nassaarai. Teit Jørgensenip uku arnat tallimat Cubami eqqumiitsulianik asiunaveersaasimasut tusaramigit attavigisimavai Per Kirkebyp qalipagarsui asiunaveersartikkusullugit.
Asiunaveersaasut oqaluttuarput nunarsuarmi Per Kirkebyp qalipagaanik arlalissuarnik peqartoq, soorlu Louisianami.
Qalipagarsuit Aasiaat Katersortarfianiittut namminerluinnaq tamaasa suliarai. Nammineq titartaqqaarlugit qalipallugillu. Kingusinnerusukkut qalipakkani nammineq titartaqqaariarlugit allamut qalipatsittarpai. Aamma uku qalipagarsuit qalipattagaanit allanit tamanit qalipaatiginnerpaapput. Tassa allat qalipagai ”asiganerupput” ukuli qalipakkat qalipaatit assigiinngiiaarnerusut atorneqarsimallutik. Taamaammat Aasiaat Katersortarfianiittut ”qaamanerupput”.
Per Kirkebyp qalipagarsuinik asiunaveersaasut suleqataasa ilaat aperigakku Ioana Rosca Tind eqqumiitsuliortuunersut ima akivoq: Eqqumiitsuliortuunngilagut, eqqumiitsulianilli asiunaveersaasartutut ilinniarsimasuuvugut. Tassa Konversevatorskolemi ilinniarsimasuupput. Tassunga isissagaanni Det gymnasielle uddannelsemi (GU-mi) naammasisimasariaqarpoq, Kemilu B Niveaumi angusisimassalluni. Eqqumiitsuliornermut sammisumik ilinniagaqassagaanni ukiut sisamakkaarlugit aallartittoqartarpoq.
Asiunaveersaasut oqaluttuarput, qalipakkat ilaat ipeqarnerusut ilaat ipeqannginnerullutik, massakkulli tamakku tamarmik peerneqarput. Massakkullu asiunaveersarneqareermata ukiut tulliuttut immaqa 50-it asiunaveersaat atasinnaavoq – paarilluaraanni.
Ajoraluartumilli qalipakkat arlallit – immaqa pingasut-sisamat amigaataapput. Tammaaneqarmata. Siulersuisunili ilaasortat neriorsuisimapput ujarneqassasut nanineqarlutillu. Qlipagarsuit ilaat ataaseq tillinniartoqarnerata kingorna matuliunneqarsimavoq kingornatigullu aamma qallerlugu qalipanneqarsimalluni. Qanoq nalitutigineri paasineqanngikkallarmat.
Ullup-qeqqasiortigiinnermi peqataapput: Borgmester Ane Hansen, kommunaldirektør Nivi Strunz, Ludvig Johansen, Ane Petrussen asiunaveersaasullu arnat tallimat.
