Aasiaat aningaasaqarnermut intasimmi ilaavoq
Ataasinngorneq juulip ulluisa 18-ianni Ineqarnermut Attaveqaasersuutinullu Naalakkersuisoq Erik Jensen Pisortaqarfimmilu pisortaq Ruth Kommune Qeqertalik tikeraarlugu aallartipput. Siunertaavorlu inoqarfiit tamarmik tikinneqarnissaat.
Talittarfeqarneq
Taamatut tikeraarnerup siunertaraa Naalakkersuisup nammineq isiminik pissutsit qanoq innersut takussallugit. Pingaarnertulli siunniuteqqavaa inissialiortiterneq aammalu oquk paasisaqarfigissallugit. Aammali talittarfiit tikinneqarput. Tamassumunngalu atatillugu Naalakkersuisoq Erik Jensen oqarpoq: - Aasiaat talittarfiata nutarsarnissaanut ukioq manna aningaasaqarnermut inatsimmiittoq, tassa ukioq manna aallartisarneqarpoq, ukiullu tulliani aningaasaliiffigineqassaaq sanaartorneqarnissaa. Taassumali saniatigut Borgmester Ane Hansen-ip kissaatigaa aningaasanut inatsimmi aningaasat illuartinneqarsimasut aserfallatsaaliinissamik kinguattoorutinut sanilliullugit annikimmata periarfissat allatut ittut ilangullugit eqqarsaateqaqqullugit soorlu nunatsinni A/S-sit pioreersut allallu aningaasaliinissamik soqutiginnissinnaasut misissoqqullugit. Aningaasaleeqatigiiaalluni aamma periarfissaasinnaasoq Erik Jensenip assortunngilaa.
Silaannakkut angallanneq
Naalakkersuisup pulaarnerani borgmester Ane Hansenip qaqitaasa ilagaat silaannakkut angallannerup illoqarfinni pingasuni minnerungittumillu nunaqarfinni ukiukkut angallanniarnerup ajornerujussua. Air Greenland massakkut timmisartuaqqanik nutarsaavoq. Kisiannili aamma Mittarfeqarfinni, ingasammik nunaqarfinni mittarfinni atortorissaarutit nutarterisariaqarput. Soorlu nunaqarfinni mittarfiit sinaanni ilaat qulleeraqanngillat, nappartarsuit allunaasannguamik qilersorlugit sinaakkuteqartarput, tassa. Tamakku nutarsartariaqarput, tassa ullutsinnut piumasaqaatinut naleqqussartariaqartut Erik Jensenip erseqqissaatigaa.
Illuliortiterneq
Illuliortiternermut tunngatillugu borgmester Ane Hansenip siulliullugu eqqaavaa kommunep illutai kommune Qeqertalimmiittut tamaasa nalunaarsortissimallugit. Illullu nammineq pigisat uninngaannalersimasut piginnittaat saaffigiortorlugit aallartinneqarsimasut atorneqarnianngippata piiarneqarnissaat sulissutigineqassasut, toqqavik kommunep nutaamik illuliorusuttunut atorfissaqartimmagit.
Inissialiortiternermut/illuliornermut Namminersorlutik Oqartussanit aningaasaliissutinit (bloktilskud) kommunit pissarsisarput, kommunilli aningaasaliissutit namminneq aquttarpaat. Massakkullu Kommune Qeqertaliup anguniarpaa nunaqarfinni meeraaqqerivik, meeqqerivik atuarfillu tulleriarlugit sananeqarsinnaaneri. Massakkumullu Kommune Qeqertalik kisiartaalluni inissialiortiternermut/illuliortitsinermut aningaasaliissutit Namminersorlutik Oqartussanut nalunaarusiortarpai, taamaalilluni marloriaatinngortitsisinnaasarluni. Tamannalu Naalakkersuisup Erik Jensenip atorluaqqoqaa, periarfissaq pitsaasuummat.
Unnugu marlunngornermi nal. 19.00 GU-mi innuttaasunik Naalakkersuisoq Erik Jensen ataatsimiisitsissaaq.
