Ulloq juunip ulluisa 16-ianni aappaagumut aningaasartuutissat pillugit isumasioqatigiinneq nangillugu Kangaatsiami ingerlanneqarpoq.
Tassa tamanna kommunalbestyrelsep ukiup siuliani aalajangerneqarpoq. Taamaaliornikkut anguniarneqarpoq suut tamarmik Aasianniinnaanngittoq ingerlanneqartarnissaat. Tassa imaappoq: Kommunep ataatsip iluani illoqarfiit tamarmik tikinneqartarnissaat eqqarsaataalluni.
Ulloq taanna ullaaralaannguaq nal. 07.00 Aasianniit angallatit assigiinngitsut pingasut atorlugit aallakaapput.
Kangaatsiami isumasioqatigiinneq nal. 10.00 Kangaatsiap timersortarfiani aallartinneqarpoq
Aallartissutigineqarput Ataatsimiititaliani Inuit, Timi Tarni, Inoqarfik siulittaasui saqqummiisinneqarlutik
Inuit: Niels Kristensen
Timi Tarni: Karl Thue Nathanielsen
Inoqarfik: Arnannguaq Hendriksen, allatsi
Aamma nunaqarfimmi aqutsisunit kissaatit saqqummiunneqarput.
Kitsissuarsuit/Akunnaaq/Ikamiut
Saqqummiisoq: Gerth Nielsen, siulittaasoq
Niaqornaarsuk/Ikerasaarsuk /Kangerluk
Saqqummiisoq: Ludvig Jeremiassen
Attu/Iginniarfik
Saqqummiisoq: Per OIe Frederiksen, siulittaasoq
Kissaatit eqikkarlugit ilaatigut makkuupput:
- Kommune Qeqertalimmi tamarmi arsaattarfiit ivigaasaaqqanik sanaartoqarfigineqarnissaat.
- Talittarfiit nutarsarlugit umiatsianullu qaqitsiffiit nutaat
- Nunaqarfinni sannaaviit
- Meeqqeriviit
- Nunaqarfinni allaffiit nutarsarneqarnissaat
- Pinnguartarfiit eqqaasalu nunagissartarnissaat
- Pioreersunik illuutinik atorluaaneq aammalu sulisunik atorluaaneq (Aningaasartuutikillisaaneq)
- Allarpassuillu
Uku allanneqartut saqqummiunneqartut ilaannannguaraat.
Ilanngullugu Gerth P. Olsen internet atorlugu saqqummiisunut ilaavoq.
Tamakkorpassuit tamarmik ukiamut kommunalbetyrelsep ukiup tullissaanut, tassa 2023-mi pilersaarusiornissaanut pingaarnersiorlugit immikkoortiteneqartussat.