Kangerlussuup avannaatungaanit Eqalummiut Nunaat aamma Nassuttuup Nunaa, Qasigiannguit kujatatungaanit Naternamik masarsoqarfinnik attaviliillutillu katersuutsitsisuusut, nunamik allanngutsaaliukkamik nutaamik pilersitsinissamik isuma saqqummiunniarlugu, Kommune Qeqertaliup borgmesteria Ane Hansen aamma Qeqqata Kommuniata borgmesteria Malik Berthelsen angalaarput.
Maannamuugallartoq tallimariarluni innuttaasunik ataatsimiisitsisoqareerpoq. Sisimiuni inuit 30, Attumi 28, Kangaatsiami 20, Niaqornaarsumi 30 aamma Aasianni 35 peqataapput.
Ataatsimiinnermi peqataasut akornanni annertuumik soqutiginnittoqarlunilu apeqquteqarusuttoqarpoq, taakkulu sumiiffimmi najugallit, inuussutissarsiutigalugu piniartut tammajuitsussarsiortitsisartullu suli nunami allanngutsaaliukkami piniarsinnaanissaat pingaaruteqartuusoq isumaqatigiissutigivaat. Borgmesterit marluusut naqissuserpaat, piniarneq ukkatarineqartuaannartuusoq taamaattumilu ingerlaannassasoq.
Nunamik allanngutsaaliukkamik pilersitsinermi aningaasaqarnikkut qanoq isikkoqarnissaanik peqataasut soqutiginnipput. Borgmesterit paasissutissiissutigivaat, nunani issittuni allani nunat allanngutsaaliukkanik takornarissanit amerlasuunit alakkarneqartartut, tamannalu sumiiffimmi inuiaqatigiinnut suliffissanik isertitanillu pilersitsisartoq.
Borgmesterit oqaluttuaraat, Ilulissani Nuummilu Mittarfissuarnik nutaanik takornariaqarnermi Kalaallit Nunaata suliniuteqarneranut annertuumut, Kommune Qeqertalik aamma Qeqqata Kommunia piareersimanissamik suliaqartut, tassungalu atatillugu nuna allanngutsaaliugaq ataatsimoorussamik suliniutaassasoq.
Innuttaasut oqariartuutigivaat, takornariaqarnermut ineriartortitsinermut namminneq tunniussaqarusullutik aammalu ingerlanermi akuutinneqarnissartik kissaatigalugu.
Innuttaasunik ataatsimiisitsinerni tallimaasuni tamani innuttaasut ukkatarivaat, pinngortitami nammineerluta angalasimatilluta qimatsinnagu torersaanissamut tamatta pikkorinnerulertariaqartugut. Borgmesterit innuttaasullu isumaqatigiipput, nunatami eqqakkanik katersinissaq pillugu suleqatigiittoqartariaqartoq.
Innuttaasut borgmesterinut tunniussarpassui. Tunniussat taakku Nunamik allanngutsaaliukkamik nalunaaruteqarnermik suleqqinnissamut tunngaviliissapput.
Aammattaaq Kangerlussuarmi innuttaasunik ataatsimiisitsisoqassaaq, taamaalilluni ataatsimiisitsinissaagaluaq taamaatiinneqarnikoq ingerlanneqassalluni. Aammattaaq aasaanerani sulinngiffeqareernerup kingorna Ikamiuni, Akunnaami Qasigiannguanilu innuttaasunik ataatsimiisitsisoqassaaq.
Sisimiuni innuttaasunik ataatsimiisitsineq
Attumi innuuttaasunik ataatsimiisitsinermit
Niaqornaarsummi innuttaasunik ataatsimiisitsisut
Aasianni innuttaasunik ataatsimiisitsisut
Qeqertalik Kommuniata borgmesteria Ane Hansen aamma Qeqqata Kommuniata borgmesteria Malik Berthelsen