Tallimanngorneq apriilip ulluisa aallaqqaataani 2022 najugarfissat marluk sanileriit, tamarmik immikkuullarissunik, tassa aappaa utoqqaat pisinnaanerusut inissiassaat, aappaalu innorluutillit najugatigiiffissaat nappaanersiorneqarput.
Borgmester Ane Hansen pissaami tassani tikinngitsoormat borgmesterip tullia siulleq Franz Lundblad tikilluaqqusisuuvoq.
Tikilluaqqusinermini ilaatigut oqaatigaa najugaqarfissat taakku marluk sananeqarmata nuannaarutigalugu. Ukiut arlalissuit innorluutilinnut ataatsimut najugaqatigiiffimmik amigaateqartoqarsimammat massakkut nutaarsuarmik kusanartumik inissaqalerput. Utoqqaallu ukiuni kingullerni amerliartuinnartussaammata utoqqaat pisinnaanerusut inissaat aamma piareeraluttualerput.
Najugaqarfissat taakku marluk Aasianni isikkivigissorsuarmiipput.
