Aasianni Svendborgip aqqutaani illorsuarnik portusuulianik pingasunik, katillugit 60-inik inissiartaqartussanik sanaartorneq aallartillugu qaartitseqqaarneq pivoq ulloq. 7. oktober 2021.
Assit:
Aasianni Svendborgip aqqutaani inissianik sanaartornissaq aallartillugu qaartitseqqaartoqarpoq.
8. oktober 2021
Aasianni illorsuit sanaartugassat assi takusassiaq
Kommune Qeqertalik Ejendomsselskab A/S aamma Namminersorlutik Oqartussat suleqatigiinnerisigut sanaartukkat pilersinneqarput, inissiat 40-it Kommune Qeqertalik Ejendomsselskab A/S-imit pilersinneqartussaapput, inissiallu 20-it Namminersorlutik Oqartussanit pilersinneqassallutik.
Inissianik sanaartorneq aallartillugu qaartitseqqaartuuvoq Borgmester Ane Hansen.
”Ullumikkut Kommune Qeqertalimmi oqaluttuarisaanermi nutaaliorneq aallartippoq, illorsuit innuttaasunut inissialiat portusuuliat avannaani siullersaasut aallartinneqarmata, ukua illorsuit portusuuliat aallarniutaapput siunissami inissianik nutaaliaasunut ikaarsaarnermi, inissiat nutaaliasut inuulluataarnarnerusut najoruminarnerusut atortorissaarutitigullu killiffimmut malinnaasut, inissiat amigaatigineqarluinnartut aallartissinnaaleratsigit persuarsioqaagut.” – taama oqaaseqarpoq Borgmester Ane Hansen.
Ineqarnermut, Attaveqaasersuutinut, Aatsitassanut, Inatsisit Atuutsinneqarnerannut Naligiisitaanermullu Naalakkersuisoq Naaja H. Nathanielsen, Inatsisartut ukiaanerani ataatsimiinnerat pissutigalugu anngutinngitsoq sanaartukkat aallartinneqarnerat pillugu ima oqaaseqarpoq:
“Sanaartorneq pissanganartuuvoq, illoqarfimmi inissanik pisariaqartitsinermut iluaqutaaginnarani, aamma illoqarfiup kusanarnerulernissaanik aamma illoqarfiup nutarsarnissaanut iluaqutaasussaavoq – najukkami suliffissaqartitsineq mininnagu.Naalakkersuisut ukkatarivaat kommuninik suleqateqarluarnissaq aamma taamaattuaannarsimavoq, tamannalu uuma suliap takutippaa. Sanaartornerup aallartinnerata takutippaa ataatsimut kivitseqatigiissinnaanerput ataatsimut anguniaqaqatigiitsilluta aamma ataatsimoorluta inuiaqatigiinnik siuarsaaqatigiissinnaavugut.Tamassilu ullormi nalliuttorsiorfiusumi pilluaqquassi, neriullungalu sanaartukkat nuannaarutigissagisi.”
Namminersorlutik Oqartussat sanaartorneq pillugu naleqartitaat, pingasunik avinneqarsimavoq:
- Inooqatigiinnikkut nungusaataanngitsumik toqqammaveqarneq
- Aningaasaqarnikkut nungusaataanngitsumik toqqammaveqarneq
- Avatangiisinut tunngatillugu nungusaataanngitsumik toqqammaveqarneq
Suliami pingaartinneqarpoq piujuartitsinermik tunngaveqartumik aamma aserfallatsaalisariaqanngitsunik sanaartorneq, betonit ikkussugassanik, uumassuseqanngitsunillu silap pissusaanut illersuutinik atuinikkut, aammattaaq pingaartinneqarluni sanaartornerup tamakkiisumik aningaasaqarnera, kiisalu illup iluani silaannaap peqqinnartuunissaa.
Sanaartugassat pingasut Svendborgip aqqutaani pilersinneqartussat P-pladseqassapput najugaqarfimmullu aqqusineqassallutik. Sanaartugassanik pilersaarusiorneq “QARSOQ 234X”-imiit ”QARSOQ 234Y”-mut ingerlatitseqqinneruvoq ineriartortitsinerullunilu, sanaartukkat tallimanik quleriinnik initaqartussaavoq, allermi toqqorsiveqarluni teknikkikkullu atortussiaqarfeqarluni, kiisalu init quleriit qullersaanni ini silaannarissaatinut atortuusivik, aammalu inissiat tamarmik aneerasaartarfeqassallutik. Inissiat agguataarneqarnerat imaassapput:
Sanaartugaq 1, marlunnik initallit 20-it
Sanaartugaq 2, marlunnik initallit qulit aamma pingasunik initallit qulit.
Sanaartugaq 3, marlunnik initallit qulit aamma pingasunik initallit qulit.
KJ Greenland A/S illorsuarnik pingasunik sanaartorneq suliarisussaavaa. KJ Greenland A/S-illu piginnittua Jens Jensen, sanaartornerup aallartinnera nuannaarutigaa.
Naatsorsuutigineqarpoq illorsuit pingasut iserterfigineqarsinnaalissasut 2023 naanerani, piareerlutillu sanaartorneqarsimassasut 2023 aallartinnerani.
Kommune Qeqertalik & Namminersorlutik Oqartussat.
Inissiat portusuut sananeqartussat assiga takusassiaq