Angallatileruttorfimmi Sarfaq Ittuup Qeqertarsuarmut tikittarunnaarnissaa pillugu Arctic Umiaq Line-p aalajangernera Kommune Qeqertaliup ernumanartutut isigaa.

5. oktober 2021

Qeqertarsuarmi takornariartitsisarneq ineriartorsimavoq iluatsitsiffinngorluni. Takornariat amerlaneruleraluttuinnartut illoqarfimmut tikittalernikuupput Qeqertarsuarmilu pinngortitaq pinnersoq misigisaqarfigisarlugu. Arctic Umiaq Line atorlugu angalaneq, takornariat Qeqertarsuarmut tikeraarnerminnik aallarniutigisartagaat naliitsuuvoq.

Taamaattumik angallatileruttorfimmi Qeqertarsuarmut tikittarunnaarnissamik Arctic Umiaq Line-p aalajangersimanera paasiuminaappoq, pingaartumik tikittarnerit assut iluatsitsiffiusartut tunngavilersuutigineqarmat.

Borgmesteri Ane Hansen

Angallatileruttorfimmi Sarfaq Ittuup Qeqertarsuarmut tikittarnissaa salliutissallugu suli pingaartuuvoq. Nunap immikkoortuani takornariartitsisarnerup inerisarneqarnissaa qulakkiigassaraarput. Angallatileruttorfimmi Qeqertarsuaq umiarsuarmik tikinneqartassanngitsoq Arctic Umiaq Line-p aalajangernera, Qeqertarsuarmi takornariartitsisarnerup inerisarneqarnerata ingerlatiinnarnissaanut tapersiinngilaq.

Qeqertarsuarmi ilaasut amerlasuut ikillutillu niusarnerat, sulisunut immikkut suliakkersuutaasartoq kommunip paasisinnaalluarpaa. Ilaasut amerliartornerat suliffeqarfimmut pitsaasumik kinguneqartussaagaluarpoq, immaqalumi suliffeqarfiup pisortanit tapiissutinik isumalluuteqarneranik annikillisitseqataasinnaagaluarluni.

Taamaattumik angallatileruttorfimmi Qeqertarsuarmut umiarsuup suli tikittarnissaa pillugu suliffeqarfimmik aamma piginnittunik Naalakkersuisunik oqaloqateqarnissara kissaatigivara.

Inussiarnersumik inuulluaqqusillunga

Ane Hansen
Borgmester
Kommune Qeqertalik