Assi: NAKUUSA
8.-9. september 2021 Nakuusap Kangerlussuarmi isumasioqatigiisitsineranut Kommune Qeqertalimmi illoqarfiit tamakkerlutik ilinniartitsisunik peqataatitaqarput. Kommune Qeqertalimmi Atuarfeqarnermi Ataqatigiissaarisoq aamma peqataalluni.
Kommune Qeqertalimmi ilinniartitsisut Kangerlussuarmi Nakuusa isumasioqatigiisitsinerani peqataavoq.
24. september 2021
Pikkorissarnermi assit: Nivikka Rosing.
Nakuusap Kangerlussuarmi ilinniartitsisunut aamma atuartitsinermi attuumassuteqartunut pikkorissaanermini siunertaraa Naalagaaffiit Peqatigiit Meeqqat Pillugit Isumaqatigiissusiaanik Ilinniartitsisut ilisimasaqarnerulernissaat. Taamaalilluni ilinniartitsisut atuartut meeqqat pisinnaatitaaffiinik, aamma isummaminnik oqariartorsinnaanerannik, isummersinnaatitaanerannik pisinnaatitaaneri pillugit kaammattuinermik atuartitsinermi sakkussaqalissallutik. Sapaatip akunnera 39-mi nuna tamakkerlugu meeqqat atuarfiini assigiimmik sammisaqarluni ilinniusiat saqqummiunneqarput aamma nuna tamakkerlugu ilinniartitsisut akunnerminni attaveqatigiittarfimmik pilersitsipput.
Nuna tamakkerlugu siullermeerluni atuarfinni tamani assigiimmik sammisaqarluni atuartitsineq.
Ilinniartitaanermut Aqutsisoqarfik aamma UNICEF suleqatigiillutik Nunarsuarmi anguniakka marluk:
Nunarsuarmi anguniakkat nr.13.: “Silap pissusaa suliniuteqarfigalugu”
Aamma
Nunarsuarmi anguniakkat nr. 29.: “Ilinniartitaanerup siunertaa”
Aallaavigalugit nuna tamakkerlugu atuartunut 8-10. Klassinut naatsorsuussanik ilinniusiorsimapput. Nunarsuarmilu anguniakkat taakku marluk aallaavigalugit aatsaavissuaq Kalaallit Nunaanni atuarfinni assigiimmik atuartitsisoqassaaq, sapaatip akunnera 39-mi qulequtaralugu: “Silasisa iliuuseqarlutalu”. Taamaalilluni atuartut silap pissusiata allanngoriartornera suunersoq paasisaqarfigissavaat, aamma ilisimasaqarfigilissallugu pisariaqarluinnartoq silap pissusiata allanngoriartupiloornera maanna iliuuseqarnikkut unitsittariaqartoq.
Kommune Qeqertalimmi Atuarfiit pillugit Ataqatigiissaarisoq, INUA-ni atorfilittaq Nivikka Rosing Nuna tamakkerlugu atuarfinni 8.-10. Klassini atuartut ataatsikkut sapaatip akunnerata tulliani sammisaqarnissaat nuannaarutigivaa, atuartuutillillu kaammattorlugit alapernaannissaannut:
“Atuartuutillit sapaatip akunnerata tulliani atuartut sila pillugu sammisaqarnerani meeqqasi malinnaaffiginiarisigit aamma isummersinnaatitaaneri pillugit kaammattorluarisigit,
Kommune Qeqertalimmi peqataavugut nunarsuarmi minguitsumik avatangiiseqarnissaq piujuaannartikkumallugu, siunissaq eqqarsaatigalugu atuartut avatangiiseq pillugu isummersinnaanerat annertusiumallugu aamma atuartut nammineq iliuuseqarlutik allanngueqataasinnaanerat periarfissaasoq paasitikkumallugu.
Angerlarsimaffimmi atuartuutersi peqatigalugu piujuaannartitsineq aamma nunarsuarmi mingutsitsineq eqqartueqatigisinnaavarsi, eqqartorlugulu angerlarsimaffissinni suut atortakkasi annikillilerneratigut nammineerlusi mingutsitsinermik annikilliliisinnaanersi inoqutigiittut.”- Taama oqaaseqarpoq Atuarfiit pillugit Ataqatigiissaarisoq, INUA-ni Nivikka Rosing.
Kommune Qeqertalik.
Nivikka Rosing, Atuarfiit pillugit Ataqatigiissaarisoq, Kommune Qeqertalik.
