Kommune Qeqertalimmi ataatsimiititaliat ataavartut ilaasortat ukiumut ataasiarlutik nunaqarfinnut illoqarfinnut angalasarput paasisassarsiorlutik, innuttaasunik ataatsimiititsillutik aamma najuulluni ataatsimiillutik.
Ataatsimiititaliaq INOQARFIK-mi ilaasortat Qasigiannguanut angalasut:
Siulittaasoq: Klaus Lundblad (IA), Siulittaasup tullia: Bia A. Broberg (IA), ilaasortat: Kristian Jeremiassen (IA), Nikkulaat Jeremiassen (S)
Ataasinngorneq 6. September 2021 ullaap tungaa Qasigiannguani Suliassaqarfik Inoqarfik ataatsimiititaliamut saqqummiussivoq Qasigiannguani Suliassaqarfik Inoqarfimmi killiffik pillugu. Ataatsimiititaliami ilaasortat ullup sinnera suliffeqarfinnut pulaaqattaarput.
Unnukkut nalunaaqutaq arfineq marluniit Qasigiannguani Katersortarfimmi innuttaasunut ataatsimiititsineq ingerlanneqarpoq.
Ataatsimiititaliami ilaasortat aamma kommunalbestyrelsimut ilaasortaq Qasigiarmiu Aqqa Samuelsen (S) kommunimi atorfilittat sulisorlu peqatigalugit ataatsimiinneq ingerlanneqarpoq.
Ataatsimiititsinermi Suliassaqarfik Inoqarfik, Qasigiannguit saqqummiussivoq Kommune Qeqertaliup pilersinneqarneranit maannamut angusat, ukiunut tulliuttunut pilersaarutit. Innuttaasut apeqquteqartarnerminni paaserusuppaat erngup aqqutai pilersaaruteqarfigineqarnersut, aqqusernit ukiumi quatsertarnerat iliuuseqarfigineqarniarnersoq, inissiat aserfallassimaqisut iliuuseqarfigineqarniarnersut, naggataatigut inissialiortoqarnissaanut innuttaasunut tusarniaaneq, oqallitsitsineq ingerlanneqarpoq.
Marlunngorneq 7. September 2021 Ataatsimiititaliaq Inoqarfik-mi ilaasortat kommunip allaffiani ataatsimiinnerminni ukioq 2022-mut kommunimi missigersuutit siullermeertumik aakuerivaat Ataatsimiititaliaq INUA-nut ingerlateqqittussanngorlugit.
Angalaneq naggaserlugu nunaqarfiusimasoq Akulliit tikinneqarpoq, tassani meeqqat inuusuttullu aallaarsimaartarnissaannut periarfissat alakkarterneqarlutik.
Ataatsimiititaliaq Inuit: 8-9. Oktober 2021 Qeqertarsuaq.
Ataatsimiititaliaq Timi Tarnilu: 11 – 12. Oktokber 2021 Kangaatsiaq, Niaqornaarsuk, Iginniarfik.
Ataatsimiititaliaq INUA: 20. Oktober 2021 Attu.
Allattoqarfik INUA