Aasianni eqqakkanut naqiterutitaaq maskiinaq Flexus atulerneranut atatillugu marlunngorneq 21. september 2021 kommuni innuttaasunut kaffillerpoq.
Aasianni Suliassaqarfik Inoqarfik-mi ingerlatsinermut aqutsisoq Otto Sandgreen tikilluaqqusivoq.
Borgmesteriugallartoq borgmesterip tullia siulleq Frantz Lundblad ima
oqalugiarpoq:
["Ullumikkut eqqakkanik eqiterissut Flexus pisortatigoortumik atoqqaarfissiortinneqarnissaanut, borgmester Ane Hansen aamma kommunalbestyrelsimi ilaasortat tamaasa sinnerlugit tikilluaqquassi.
Ullumikkut eqqakkanut eqiterissutip atoqqaartinneqarnera allioriarneq annertuujuvoq, Naalakkersuisut Eqqakkanut iliuusissanut pilersaarutaannut ukiuni 2020-2031-mut atuuttoq eqqarsaatigalugu.
Nunarpummi tamakkerlugu eqqakkat pillugit pilersaarutigineqarpoq eqqakkanik passussinermi igitassanik tigooraaveqarfinnik pilersitsiortornissaq. Tamannalu nunatsinni kommunit ataatsimoorussamik eqqakkanik ingerlatseqatigiiffiat ESANI a/s suleqatigilluinnarneqarpoq, tassami maani Aasianni eqqakkat eqiterneqartut siunissami Sisimiunut umiarsuakkut nassiunneqartalissapput, Sisimiunilu ikuallanneqartartussaallutik.
Nuummi ikuallaavissaq ESANI A/S-imit pilersinneqartussaq naatsorsuutigineqarpoq 2023-imi aasakkut naammassilluni atuleriaannanngussasoq, tamannalu isumaqarpoq eqqakkat maannamiit eqiterneqartut maani katersorneqarlutik isumannaatsumik inississorneqaqqaassasut, Nuummi ikuallaavissap piareernissaata tungaanut. Kisiannili 2023 naanerani imaluunniit 2024 aallartinnerani Sisimiuni ikuallaavissaq naammassineqariarpat, eqqakkat maani eqiterneqartut Sisimiunut assartorneqartalissapput, tassanilu ikuallanneqarlutik.
Takorluugaavoq eqqakkanik eqiterinerit aammalu inississuinerit Kommune Qeqertalimmi illoqarfiit nammineerlutik isumagisassagaat, illoqarfiillu inissaqassusaat aallaavigalugit illoqarfiit akunnerminni ikioqatigiittarnissaat. Tassa Aasianni eqqakkat eqiterneqartartussat, ilagissavaat eqqakkat Kitsissuarsunneersut, Akunnaameersut aamma Ikamiuneersut. Takorluukkanut aamma ilaavoq maani Aasianni eqqakkat eqiterneqartartussat ilagissagaat Niaqornaarsummeersut Iginniarfimmeersullu, pissutigalugu taakku Kangaatsiami inississorneqarnissaannut inissaqanngimmata.
Maani Aasianni ikuallaavik aqqutigalugu kiassarneq ingerlanneqartoq, ikuallaavimmi ikuallaasarnerup uninnerata kingorna, uuliakumik (spildolie) ikuallaavimmiit kiassarneq ingerlanneqalersussaavoq.Aasaq manna nuannaarutigeqisatsinnik Ikerasaarsummi eqqakkanik eqiterivissamut miljøfondenimiit aningaasaliissutinik tunniussisoqarpoq, Ikerasaarsummilu eqqakkat eqiterneqartut toqqaannaq Sisimiunut nassiunneqartarnissaat naatsorsuutigineqarpoq.
ESANI A/S Kommune Qeqertalimminngaanniit piginneqataaffigineqartoq, kommunit piginneqataasut akunnerminni eqqakkanik suliaqarnermi misilittakkanik assigiinngitsunik avitseqatigiilluni oqalliffimmik pilersitsisimavoq, maannalu atoqqaarfissiukkatsinniit misilittagarilerumaarneqartussat, oqalliffimmi ESANI A/S-imi pilersinneqarsimasumi avitseqatigiissutaasarumaartut qularnanngilaq.
Kattornannguaq qalersaq aappaluttoq qiorlugu atoqqaarfissiortitsineq pereerpat, kaffe, tii naatitaqarluni kaageqassaaq tamanut.Qiorsinnginninnilu naggasiullugu borgmester Ane Hansen, aamma kommunalbestyrelsimi ilaasortat maanna najuussinnaanngitsut sinnerlugit qujarusuppunga, eqqakkanik eqiterissutip pisortatigoortumik atoqqaarfissiorneqarnerani oqaaseqarsinnaagama. Qujanaq."- Taama oqaaseqarpoq borgmesterip tullia siulleq Frantz Lundblad.
Oqalugiarneq pereermat Aasianni ikuallaavimmi sulisut akornanni sivisunerpaamik sulisimasoq Niels Sandgreen-imit qalersaq aappaluttoq kipineqarpoq. Niels Sandgreen ukioq 2002-mi ikuallaavimmi sulilerpoq, ukiut 19-nit sulinermini eqqakkanik eqiterutitaarneq poortuisalernerlu nuannaarutigivai:
”Kiisami suliaq pissanganarpoq aamma ingerlallualeriarutta poortuiagaatsigartassaagut, maskiina ingerlalluni suliaqarnera sukkaqaaq.
Ingerlaannaq eqqakkat eqitikkat pingasut poortupallattarpai, poortukkallu illuarlutigit nooreeraangatsigit aamma sequtseriutigaluni taamatut poortueqqipallattarpoq”
Maskiinap ingerlanera takutinneqareermat najuuttunit qanillillugu qimerluualaarneqarpoq.
Aasiammiutoqqat Lars Olsen aamma Theodor Andersen pisuttuaatigalutik atoqqaartitsinermi najuuttut, kaagisuutigalutik aamma kaffisuutigalutik maanna issiaffigisaminni inuusuttuunerminni pisimasumik eqqaamasalikkersaarput, taamani heliportiusumi akuerisaallutik arsaattarsimapput, sungiusartarsimallutik aamma unammiuaartarsimallutik.
Maanna inissisimaffimminni isigisartik eqqakkanik eqiterutitaaq nuannaarutigivaat:
”Tassa eqqakkat sumi tamaaniikkunnaartalissapput, siuariarneq taama annertooq pisoq uatsinnut nuannerluinnarpoq.”
Assit ullorsiornermit: Assit: Tusagassiivik Kommune Qeqertalik.
Ukioq 2020-mi Naalakkersuisut naalakkersuisooqatigiinnissamut isumaqatigiissutaanni maajimeersumi, nuna tamakkerlugu eqqakkanik atoqqiineq aamma eqqakkanik immikkoortiterisalernissaq siunnerfittut qitiutinneqarluni isumaqatigiissuteqarfigineqarpoq.
Eqqakkanut iliuusissanut pilersaarut 2021-2031 naalakkersuisunit naalakkersuinikkut sinaakkuserneqarpoq.
Esani A/S pillugu: ESANI- oqaatsitut ataatsimut immikkut kalaallisut isumaqanngilaq, kisianni naqinnerni naqinneq siulleq tassaavoq ESANIp sulineranik nassuiaatigineqartut:
E – Eqqaavilerineq
S – Sulisoqarneq
A – Atoqqiineq
N – Nukissiuuteqarnermilli/Energi
I – Ingerlatseqatigiiffik
ESANI A/S tassaavoq Nuna tamakkerlugu eqqagassalerinermik ingerlatitseqatigiiffik 1. februar 2019-mi kommuninit pilersinneqartoq, tassani pisortaqarpoq, siulersuisoqarluni aamma Nunatsinni kommunit peqataasut ilaasortaapput.
Eqqakkanut Iliuusissanut pilersaarut
2020-2031:
Eqqakkanut iliuusissatut pilersaarut ataatsimoorussamik nuna tamakkerlugu naalakkersuinikkut sinaakkusigaavoq.
Kommunit pilersaarummut peqataasut, namminneq kommuniminni eqqakkanik suliassaqarfik akisussaaffigivaat.
Eqqakkanut iliuusissatut pilersaarut pitsaasumik ingerlakkumallugu kommunit ataatsimoorlutik eqqaavilerinermik ingerlatitseqatigiiffimik pilersitsipput ISANI A/S
Illoqarfinni aamma nunaqarfinni tamani, eqqakkanik tigooqqaavinnik pilersitsisoqassaaq, taamaalilluni eqqakkat tamarmik sapinngisamik pitsaanerpaamik passunneqarsinnaaqqullugit.
Pilersaarutit malillugit Ikuallaavinnik marlunnik pilersitsisoqassaaq Sisimiuni Nuummilu, nunap sinneranit eqqagassat ikuallanneqarsinnaasut assartorneqartassapput ikuallanneqarlutillu.Pilersaarutit malillugit uuliakunik katersiviit Qaqortumi, Aasianni Maniitsumilu inissisimassapput.
Kommunit eqqakkanut tigooqqaavinnik pilersitsissapput, nunaqarfinnit, illoqarfinnit eqqagassat ikuallannissaasut, aamma uuliakkut katersorneqartassapput nassiunneqarlutillu.
Naalakkersuinikkut eqqagassat pillugit sinaakkusiinermi innuttaasut aamma naalakkersuinermik suliallit, kommunit peqatigiilluinnarlutik anguniassavaat avatangiiseq minguitsoq, aamma minnerpaaffiliineq mingutsitsinermik, aaqqissuussilluarnermilu aningaasanik atuinermik aqutsilluarnerulerneq, eqqakkanik atoqqissinnaasunik atoqqiinerulerneq.