”Asasakka Kommune Qeqertalimmi innuttaasut.
Sapaatip akunnera kingulleq paasissutissiigama nutaarsiassaqalerpat paasissutisseeqqinniarlunga aamma neriorsuinikuugama massakkut taamaaliulerpunga.
Tassa Kommune Qeqertalimmi Corona virusimik tunillatsissimasut amerlipilooraluarsinnarlutik qujanartumik ikittuaranngornikuupput, sisamaannanngornikuullutik. Kisianni tassa ilimageriikkatsituut ippassaq nalunaarfigineqarpugut ataatsimik ilasimasut, taavalu aatsaaqqinnaaq paasisagut tunngavigalungit illoqutigiit pingasuullutik massakkut tunillatsissimapput.
Taava taanna meeqqat atuarfiani atuartuummat ippassaq unnukkumut sulisugut ulappunnikuupput 3. K-t angajoqqaavi illoqataasullu kalerreqattaarlugit karantænissasut, taavalu sapaatip akunnerata missaani karantænereerpata testertiffissaat massakkut piareersarneqartoq, ilaasa ingerlaannartumik testertissinnaannginneq apeqqusertarmassuk nassuialaassavara Nakorsaaneqarfiup inassutigigamiuk ingerlaannaq testertinneqartassanngitsut, ulloq siulleq ersiuteqarneq ajormata tunillatsissimagaagamik, tassa kisianni ersiutit aatsaat sapaatip akunnerata iluani takkussinnaasarluni. Taamaattumik takulluarumallugu ilumut tunillatsissimanersut, imaluunniit tunillatsissimannginnersut suleriaaserineqarpoq massakkut sapaatip akunnerata missaa qaagiukkaagat misilitsittarlutik, 3. K-kkut misilitsinnissaat angajoqqaavisalu, illoqataasullu massakkut piareersarneqarput sapaatip akunnerata tulliani septemberip aappaani pisussanngorlugu. Aammalu immaqa sila ajussappat utaqqivallaannginnissaat pissutigalugu nalunaaqutaq agguataarlugu, agguataarlugit aggeqquneqarumaartut, massakkut piareersarneqarluni.
Massakkut karantænertitaallutik angerlarsimatinneqartut eqqarsaatigalugit, taakkua aalajangersimasumik misissortikkiartorfissaqarput, aamma ullormik aalajangersimasumik taasisoqareernikuuvoq. Kisianni taassuma saniatigut inuit ernumaatillit, misissortikkumasunullu periarfissaq tassaavoq ataasinngornermiit arfininngornermut ullaakkut qulingiluat qeqqaniit qulip qeqqata tugaanut misissortikkiartorsinnaapput takanunga Corona pillugu misissuisarfimmut, taavalu takkutiinnartoqarsinnaavoq. Kisianni aamma inassutaavoq ajornanngippat ulloq sioqqullugu ataatsiniit marlup tungaanut bestiileeqqaartoqartassasoq, kisianni tassa ullaakkut quligiluap qeqqaninngaanniit qulip qeqqata tugaanut aamma bestiiliinngikkaluarluni takkuttoqarsinnaavoq ersiuteqaraanni, imaluunniit ernumaateqaraanni tunillatsissimasinnaanermut.
Kingullermik tuniluuttoqarmat piareersimaneq upalungaarsimanerlu sukateriffiginikuuarput, soorlu meeqqat atuarfiani zonekkaarlugit, nukarliit, qiterliit, angajulliillu taanna ingerlanneqarnikuuvoq tuniluuttoqalissagaluarpat taakkua arlaannik matuseriaannanngorluta tuniluunneq piniinnassagaluarpat.
Massakkut tassa sulisugut meeqqat atuarfiani klubbimilu sunngiffimmi ornittagaanni sulisut ilitsersuutinik aamma nassinneqarnikuupput maluginiagassaat suussanersut, aamma angajoqqaat soorunami ilissi maluginiagassasi assigiinngitsut eqqumaffigeqqissaarniarisigit, taakkua takuneqarsinnaapput nun.gl-mi aamma qarasaasiami ilitsersuutit taakku malinneqarsinnaapput.
Ulluni makkunani pisussaagaluartut aamma taamaaterarneqarput, soorlu aamma peqatigiiffiit ingerlattagaat soorlu Nipiaa Rock Festivali nuannarisarput taanna ukiut tamaasa ingerlanneqartartoq Corona pissutigalugu kinguartinnikuuaat, aamma isumaqarpunga assorujussuaq paasinninnerat taanna qujanartoq, inuppassuit katersuuttaramik, aammalu massakkut ilisimaneqalertut malillugit inuit katersuuffiini aqunneqarsinnaanngitsumik tuniluunneq ingerlanissaa ilimanarnerpaajummat. Taamaattumik aamma inassutigissavara qaammat naasorsuanngormat taavalu aamma skatimut utertoornerit nalaatigalajalerlutigit, sapinngisamik ikiuutigitsi, erngunnaveersaarlusi, ataatsimorsuaq katersuunnaveersaarlusi, misilittakkat takutereermassuk ernguffiulluni ataatsimoorluta tassaasartut aamma sukkasoorujussuarmik tuniluuffittut aallarnerfiusinnaasut.
Nunaqqatigut Coronap tuniluunnerata nalaani mianersorluarsimanerat assorujussuaq, tuniluunnerup siammarpallaannginneranik killiliisuusimavoq, aammalu massakkut nungunnissaata tungaanut taanna ingerlatiinnaqqunaqaaq.
Pisortat inassuteqaataat, soorlu pisiniarfinni inuit katersuuffiinut isilerussi qanisi assiaquserlugit, taava errukulaarlusi, spritikulaarlusi, quersorniarussi maanga talissinnut, taakkua maleqqissaarisigit suli pisariaqartorujussuupput tuniluunnerup ingerlatinnginnissaa siunertaralugu.
Tunillatsissimallutik napparsimasut peqqissilluarnissaanik kissaappagut, aammalu isumassorneqarnerani ilaqutaasut, kammalaataasullu suleqataalluarnissaat, aammami nunaqqatigiit tamarmik suleqataalluarnissaannik kissaallugit, tamassi sapaatip akunnera naalluarniarisiuk”