Qeqertalik Business Council, Innovation Greenland peqatigalugu start-up "aallarnisaasunut" aggustimi pikkorissaatitsinissaannut peqataagit.

30. juli 2021

Qeqertalik Business Councilip pilersaarutigivaa aggustip qaammataani pikkorissaanerit ingerlatissallugit aallarnisaanissamik eqqarsaasertunut aamma namminersorlutik aallarteqqammersunut iluaqutaalluarsinnaasut.

Aggustimi arfininngornerit tamaasa nal. 08:30-15:00 Qeqertalik Business Council, Innovation Greenland suleqatigalugu aallarnisaasunut iluaqutaalluartussat, soorlu aningaasanik missingersuusiornerit, naatsorsuuserineq kiisalu akileraartarnermut tunngasunik pikkorissaanerit ingerlatissavaat illoqarfimmi namminersortunik ilalerlutik.

Taakkua saniatigut aallarnisaalluni namminersortutut ingerlatsilereersumik naapitsisoqassaaq, aallartisarnermi misilittakkat oqaluttuaralugit, aamma aallarnisaasuulluni misilittakkat unammillernartut pillugit peqataasunut isumassarsiorfissatsialaasinnaasunik avitseqateqartussamik.

”Nuannaarutigivara kiisami sumiiffitsinni pikkorissaanerit aallartillualeratsigit. Tamanna Innovation Greenlandimit aamma aningaasaliiffigineqarportaaq, iluarusuutingeqaaralu suleqatigiinnitta inerititassaasa ilaat Qeqertalimmi suliatsinnut iluaqutaajumaartut aamma takusinnaaleratsigit.

Maleruaqqusat eqqummaariffigivagut, peqataasussat aama pikkorissaasut ilanngullugit 20-it peqataasinnaapput, suli pikkorissarnissamut inissaqarpoq, peqqussutilli malinneqassapput” taama oqarpoq pisortaq Gerth P. Olsen.

Assi: QBC. Gerth P. Olsen. Pisortaq Qeqertalik Business Council A/S

Maleruaqqusat malillugit pikkorissarnissamut peqataaniaraanni takutinneqassapput:

COVID-19-imut akiuussutissanik kapuinermi naammassinnissimanissaq
Nalunaaquttap akunnerisa 48-t iluanni COVID-19-imik tunillatsissimannginnermik uppernarsaaviusumik misissortissimanissaq

(Malugiuk: Nalunaaquttap akunnerisa 48-t iluanni misissortinnissaq taamaallaat neqeroorutigineqarsinnaavoq, najukkami peqqinnissaqarfik tamatumunnga isumalluutissaqarpat. Qanillisimasat aammalu inuit ersiutillit misissortinnissamut salliutinneqassapput.)

Pikkorissaanerit Aasianni Sømandshjemmemi ingerlanneqassapput, taamaattorli Qeqertalimmi sumiiffinni allani aallarnisaarusullutik soqutiginnittut, pikkorissaanermut peqataarusullutik nalunaarsinnaapput Qeqertalik Business Councilimut saaffiginninnikkut.

Attavissaq:

Qeqertalik Business Council A/S

E-mail.: info@qbc.gl

Mobil nr.: (+299) 55 82 82

Qulaani taakkartorneqartut saniatigut Greenland Venturemit tikeraartoqarneranut atatillugu, illoqarfimmi namminersortut aamma soqutiginnittut aggustip 18-ani ilasseqatigiinnissamut inussiarnersumillu naapeqatigiinnissamut Qeqertalik Business Councilimiit tikilluaqqusaapput.

Assi: QBC Qeqeqertarsuarmi siunnersuineq.

Kommune Qeqertalimmi eqqarsaatersuuteqarpit cafémik, pisiniarfimmik imaluunniit sullivimmik pilersitsissallutit, qanorlu eqqarsaatitit tulleriiaassanerlugit nalulerlugu?

Qeqertalik Business Coucil nittartagaa qbc.gl qupperuk periarfissatillu qimerloorlugit, imaluunniit QBC-mi sulisut qanimut  isummersueqatingerusukkukkit mailikkut oqarasuaatikkulluunniit saaffigisinnaavatit, siunnersorneqarnissamut isumaqatigiissusiorumallutit.

Qeqertalik Business Council A/S – mi Pisussat pilersaarutaasut nittartakkagaanni qimerloorlugit annertunerusumik paasisaqarfiginerusinnaavatit – Una tooruk.