”Asasakka Kommune Qeqertalimmi innuttaasut.
Ippassaq Naalakkersuisut tusagassiortut katersortitsinerani paasivarput Coronavirusimik tunillatsissimasuni aamma Aasiannut annguttoqarsimasoq, aammalu tuniluunneq aallartissimalluni.
Taamaammat immikkut iliuuseqarluta sukaterigasuarsimavugut, ippassaq paasisagut aallaavigalugit, qanigisaasunik Meeqqerivik Kullumiittoqarmat, Kulloq ulluni tulliuttuni aggustip qulingata tungaanut matoqqasinnaasutut matugallarparput sulisugut angerlartillugit, angerlarsimaannaqqullugillu misissortereerlutik paasisaqarnissaasa tungaanut, aammattaaq meeqqat Kullumiittut, Kullumi meeraatillit aamma misissortereerlutik paasisaqarnissamik tugaanut sapinngisamik angerlarsimaannassasut kissaatigisimavarput.
Tamatuma saniatigut ippassaq unnukkiartortukkut paasisagut tunngavingalugit aamma Meeraaqqerivik Vâva matuarput ullumikkumiit, sulisut tassanilu meeraatillit tamarmik misissortereernissaasa tungaanut aammalu misissortinnermi paasisaqarnissaasa tungaanut, taamaaliorpugut pissutigalugu tunillaassuineq sapinngisamik unitsikkasuarnissaa kissaatigigatsigu aamma ikiuukkusukkatta siammaappallaartoqannginnissaanut.
Tunillatsissimasunut ilaqutaasut aammalu qanigisaasut, ilisarisimasaasut, qanillattorsimasullu ulluni makkunani ulapputigineqarput misissorlugit, aammalu taakkua angerlarsimaannarnissaannut kissaateqarfigivagut, tuniluunnerup minnerpaaffimmiinnissaa siunertaralugu.
Tamatuma saniatigut aamma sukannersumik kissaatigivarput peqqussutit, tuniluutinnginnissamut peqqussutaasut malilluaqqullugit, inuit amerlavallaat akornannut pinaveersaarisi, pisiniarfiliassagussi, allanullu inuit akornannut pissagussi qanermut assiaqummik assiaquseqqaarlusi aatsaat akuliuttarisi, aamma quersorniarussi talissinnut quersortarisi, assasilu spritikulaarlugit, errukulaarlusi, aammalu inuppassuit akornannut katersuunnaveersaarlusi.
Ulluni makkunani aasarsuummat sulinngiffiullu nalaaniilluni tikeraanik takkuttoqartarpoq aammalu uangut takummaaneq nuannarigatsigu ilisarisimasagut takugaangatsigit ilassiartortarpagut kutaarlugit tikilluaqqullugit imaluunniit pakkutilaarlugit, tamakkua tuniluunnermut aamma aqqutaasarmata sapinngisamik pinaveersaarisigit, taavalu ungasiakkaamiik ilassiuunneq taanna ingerlakkisiuk, allatut ajornartumik tuniluuttoqannginnissaa siunertaralugu aamma angorusullugu, sapinngisamik Corona virusimik nappaalanerup tuniluuppallaannginnissaa angorusuttorujussuusarput taamaattumik kissaatigaarput tassuunakkut ikioqatigiinnissarput.
Peqqussutit assigiinngitsut allannguuteqaraangata nalunaarutigisarumaarpagut facebookkimi quppernerput aamma kommunip nittartakkami quppernera aqqutigalugu siammarterneqartarumaarput.
Corona virusimik tunillatsissimasortagut eqqarsaatigaassi, eqqarsaatitsinniippusi aamma kissaattorujussuaatsigit peqqissilertussasusi aamma perulunnasi taanna tinillatsissimanersi anigujaarumaarissi, eqqarsaatitsinniippusi.
Nunaqqataasut tamarmik, qanigisaasullu, siammatsaaliuinermut suleqataalluarnissaat assorujussuaq kissaatigivara, tamatta ikioqatigiinnitsigut siammaattoqannginnissaa angorusunnaqaaq.
Tamassi ajunnginnerpaamik kissaappassi, nutaarsiassaqaleraangat tutsiuttarumaarpugut.”- Taama oqaaseqarpoq Borgmesteri Ane Hansen.
Allattoqarfik INUA.
Kommune Qeqertalik.