GUX Aasiaat Avannaani Ilinniarnertuunngorniarfimmi ilinniarnerminnik naammassisut 65-it.

““Asasakka ilinniarnertuunngortut.
Nalliuttorsiutiginiarlusi maani GUX Aasianni sulisut qanigisasilu katersuuppugut.Ulloq pingaartorsiorfipput kiisami nallerpoq ilissinnut ukiuni kingullerni pingasuni piareersarfigisimasarsi. Atuagarsornikkut inuttullu inerisimanerulersimavusi. Ilissi ukioq 2021 ilinniarnertuunngortut naatsumik oqaatigisuugussi, qiimasuuvusi, ilakkuminartut oqariallaqqissullu. Maani atuarfimmi maqaasinartussaavusi; gangemi illarpalaartarnersi maqaasissavarput, isummersuutigisartakkasi atuarfik pillugu maqaasinassapput, ilanngullugulu eqqaanngitsoorsinnaanngilakka maani naammassisut ukioq atuarfiusoq kingulleq meerartaarsimasut. Taakkua meerannguit GUX- Aasianni susassareqatigiinnermut qanilaarnermullu tunissutaapput ilissituulli naleqaqalutik.

.Ukiut pingasut matuma siorna 1.g-mi aallartikkassi tikilluaqqusininni uannut nuannerlunilu eqqaasassat amerlasimapput. Tassa GUX Aasianni naammassininniik ukiut 25-t qaangiuttut rektoritut atualertut nutaat tikilluaqqusakka siulliit tassaammata ilissi. Tamanna pillugu immikkut eqqaamasassatut isingaassi.
 Ullumikkut allagartartaassasi siunissami ilinniaqqinnissassinnut atorluagassassinnik, ullumikkut nalliuttorsiussaagut aqagumiit ulapputissasi aamma annertummata.Ilinniagaq toqqagassarsi imaaginnanngilaq ilinniagaq suliffissarsi, kisianni aamma qanoq inuuneqarnissassinnik aalajangerneruvoq annertooq.

Nalaatassasi ilaativut oqittuinnaassanngillat, akisussaaffimmilli tigusisinnaaneq pingingaanni pisunullu naleqqussarsinnaagaanni inuuneq sumiluunniit tulluussarnikkut ingerlanneqarsinnaavoq.Ullumikkut nunatta avannaani ilinniarnertuunngortut pillugit katersuunnitsinni eqqaamassavarput ilinniagaqarneq suli annertuumik qaffarsartariaqaratsigu; inuiaat eqqarsartaatsitsinni pingaarutilittut inississuarput angajoqqaajugutta inuiaqataaguttaluunniit. Ilinniagaqassuserli nammineq tunngavissaannaavoq sullissinissamut, pimoorussillunimi sullissineq sulianik annertuumik pitsanngorsaasarmat. Inuiaqatigiinnilu pitsanngortitassavut amerlapput. Taamaattumik ilinniagaqarnerup saniatigut sulinerup pimoorunneqarlunilu pitsanngorsartuarnissaa aamma sulisitsisutut eqqarsaatigisartakkanni pingaartuuvoq. Ilissi ilinniarnertuunngortut inuiaqatigiinni suliassasi amerlaqaat, nuannaarutigissagaluarpara ilasi maani ilinniagaqareersimallutik maani ilinniartitsinermi suliaqalersinnaappata, ilissimi timikkut tarnikkullu misiginikuuarsi inuiaqatigiit ilinniartitaanerput suli kulturitsinnut tulluussartariaqartoq. Ilissiuvusilu inuusaatsitsinnik ilisimasaqarnerpaat - akisussaaffik tigusiuk allanngueqataallusilu.Sunngortoqarsinnaavorluunnit upperingaanni, kisianni namminiussuseq pigingaanni tamanna aatsaat anguneqarsinnaavoq. Namminiussutsissinnik arsaarneqarsinnaanngilasi, ukiunili maaniiffissinni pisariaqartarsimavoq killiliillunilu oqaaqqissaarisarnissaq.Nassuerutigissavara ilaatigut maani oqittorsiortinneqartarpusi namminerlu akisussaaffisi ilaatigut apeqqusersorsinnaasarpasi, tamannaavoq ilaatigut ilinniaqqiffinni ingerlaqqinnissinni takulerumaagarsi. Ineriartortuartussaanersi ammaffigigussiuk tamakkua ajornartorsiutitut tigunagit unamminartutut tigussagisi neriuutigaara, soorlumi 1.g-mi akisussaaffisi 3.g-nngorassi oqigilersimasarisi, naak immaqa oqinnerulinngikkaluartut ilissili ineriartorsimanissinnut tamakkua takussutissat ilangiinnarpaat.Inuiaqatigiit inuusuttortatsinnut piumasavut annertupput soorlu ilinniagaqaritsi, suligitsi inuiaqatigiit piumasaat malillugu inooqataagitsi allarpassuillu piumasaasut.
 
Maani atuartuunersi inuunissinnut ilaalluinnarpoq, tassami ukiut taakkua inuusuttuunermi pisut eqqaamajuagassat ilagissammatigit, kingumut qiviartuartartussaavasi kammalaatisi allaat ilaquttatut qanigisatut isigilersimasasi maani naapissimagassigit.Maani sulisut eqqaamasassassi ilangaat naak ilaatigut killiliisarnerat ilissinnut puffaammernarlunilu isumaqatiginaannanngikkaluartoq - taamaattorli qularinngilara kingumut qiviarnissinni naleqartilerumaarisi, taakkuummata inuunissinni saaffissaallutillu oqilisaasimasut.Mannalu iluatsillugu sulisunut tamanut qujarujussuarpunga - uppernarseqqippara ilissi sulisorigassi qanoq iluatsitsitigalunga, atuartuutivut pillugit sullarinnerat ilisimariigara takoqqippara. Sulisut ataasiakkaarlusi suliarsi annertummat pingaaruteqarlunilu nukissanik tunisisarpusi ilisimasasilu annertupput.

Taamatut oqaaseqarlunga ullumikkut ullorsiorluaqquassi siunissamilu ajunngitsunik tamanik kissaappassi.Naggataatigullu nikuilluta ilinniarnertuunngortut pingasoriarluta hurrarutigissagingut kissaatigaara.”- Taama oqaaseqarpoq Avannaani Ilinniarnertuunngorniarfik GUX Aasiaat-ni rektori Dorthie Siegstad.

"Ilinniarnertuunnguit.

Ullumikkut ulloq ilinniarnertuunngornissinni allagartartaarlusi ulloraarsi, tamannalu tulluusimaarutigikuttoorniarisiuk. Nuannaarutigeqisannik kommunalbestyrelse kiisalu Kommune Qeqertalik sinnerlugu, pilluaqqussutinnguamik apuussaqalaarnissannut piumaffigineqarsimavunga, tassami politikkerivut kommunimilu pisortat ulluni makkunani Qasigiannguani, ukiuni tulliuttuni kommunitsinni aningaasalersuinissamut missingersuusiorniarlutik ataatsimeersuarput. Kommunitsinniillu inuulluaqqussutinnguaq qujarutingaarlugu ilissinnut apuutikuttoorusuppara. 

Ukiuni kingullerni pingasuni ilinniarnissinnut atatillugu illoqarfipput qalipaasersueqataaffigilluarsimavarsi, innuttaaqataasimavusi, aqqusinermi, pisiniarfimmi, timersoqatigiiffinni, susassaqartitsinernilu assigiinngitsuni naapittarsimallutigit. Tassami illoqarfitsinnik, naamminersorlutik inuuniuteqartunut pisiniartarnikkut kiisalu timikkut tarnikkullu sukisaarsaaqataasarnikkut, tapeeqataallusi illoqarfitsinni uummarissaaqataasimavusi – assersuutigiinnarsinnaavara atuarunnaarassi ullaassaannarsuaq itersaallarassi, eqiiallannarsimaqaaq. Ukiut 19-t qaangiupput uanga maanerpiaq aamma nasartaaqatikka sinnerlugit oqaaseqalaarama, ukiorpassuanngukatareerput! Taamaattorli suli takusinnaavara, ilinniarnertuunngorniaramali ilinniartitsisut suli ataasiakkaannguit najuuttut, oqaaseqalaarneralu ilutigalugu ilissi aamma qujassuteqalaarfigerusuppassi, tassami ilisserpiaat, ilinniartitsisummi tamassi, ilinniartuusimasugut tamatta qujassutissaqarfigeqaatsigit, kingumut qiviarlunga ersarissisimavoq, inuunitta sinneranut aamma qalipaasersueqataangaatsialersimagassi, tamannalu oqaasinngorlugu eqqaasariaqarpara qujaffigalusilu. Neriuppungalu ilissi ilinniarnertuunngorniat aamma tamanna eqqaamajumaarissi – tassami taakkuupput illoqarfitsinni, nunatsinnilumi inuiaqatigiinnitsinnik, ilinniarnermik qaffassaaqataanikkut innuttaaqataalluarnissamik aamma piorsaaqataasut. Nuannerporlu aamma ukiut 19-t qaangiuteriillartullu, Aasianni illoqarfeqatigileqqitamma arlallit ilassiortuarlutik kinaanera suli eqqaamammassuk. Neriuppungalu ilissi aamma siunissami nunaqqatigisimasassinnit taamak kiinnerfigineqartarumaartusi. Taamani oqaaseqarninni oqariartuutima ilaat ilissinnut ingerlateqqilaarusuppara, sulimi atuutikutsoormat. Maaniinnissinni misilittakkasi ilinniakkasilu atorluarniarisigit, misigisassarsioritsi, angalagitsi, ilinniaqqigitsi, tassami aattaat massakkut periarfissanut matut ammakaatilerput. Kiffaanngissusersi akisussaaffimmillu nammineq tigusisinnaanersi atorluarisiuk. Massakkullu eqqarsaatiga aana, qaffasinnerusumik ilinniareerussi immaqaluunniimmi allatigut tingussaasumik ilinniagaqalereersimalerussi, misilittakkassi ilikkakkasilu nassarlugit illoqarfissinnut uteqqinniarisi, nammineq ilaqutsiorlusilu illoqarfeqataaqqilerniarisi, tassami inuiaqatigiinnitsinnik kivitseqataanissarsi pisariaqavippoq! Qeqertalik sinnerlugu nasartaartut ilaqutaasullu tamassi pilluakuttoorisitsi, qanortoq ingerlalluassamaarisi". - Taama oqalugiarpoq Destination Diskobay & Qeqertalik Business Council A/S Pisortaq Gerth P. Olsen.

Assit: