Borgmesteri Ane Hansen 60-nik ukioqalerpoq.

9. juni 2021

Borgmester Ane Hansen 1961-mi Akunnaami inunngorpoq qatanngutigiit arfiniliusuni angajulliup tulliulluni, angajoqqaaralugit Judithe aamma Piitannguaq Hansen.

Ane 1960-kkunni angajoqqaani peqatigiiffilerisut, allatigullu inuiaqatigiinni suliniaqataasut, angerlarsimaffimmi ataatsimiittarnerpassuit ingerlanneqartartut avatangiiseralugit peroriartorpoq.

Ane-p Inuusuttuunerata nalaani Kalaallit Nunaanni allanngoriartorneq sukkasooq, sakkortusinnaasorlu piffissami atuuppoq. Angajoqqaami inuiaqatigiit akornanni aalajaallutik suleqataajuarnerat, pisussaaffittut nalinginnaasutut isigalugu inuiaqatigiit akornanni ikinngutini, inuusuttoqatini peqatigalugit sullissilluni aallartippoq.

Ukioq 2017 Ikaarsaariarnermut ataatsimiititaliap ataatsimiilluni inissitsiternerani Ane-p anaanagingaluata Judithe aamma angutaata Piitannguup assigi.

Kommunalbestyrelsi ukioq 2020 naggataamik ataatsimeersuarnerani nereqatigiinnermi assi: Ane Ole-lu.

Ane katisimavoq Ole Olsen-imut marlunnillu qitornaqarlutik.

1976-mi parti Inuit Ataqatigiit ilaasortanngorfigai, 1989-mi Aasianni peqatigiiffik Kilut, arnat suliniaqatigiiffiat illoqarfinni allani piusoq, inuusuttoqatini peqatigalugit Aasianni pilersippaat, Peqatigiiffik Kilut tassaavoq politikikkut suliniaqatigiiffinnut sorlernut attaveqarneq aporfiginagu nunasiaataanerup ataani ineriartupiloornermi arnat naligiisitaanerusumik atugaqalernissannik nunatsinni suliniartut, kinguaassiutitigut atornerluinerit naaggaarluinnarlugit, persuttaanerit, arnallu angutinit naqisimaneqarnerulersimanerat qaangerniarlugu, meeqqat angutillu sutigut tamatigut naligalugit pisinnaatitaaffeqarnissaat anguniarlugu suliniuteqartuupput, Aasianni Aviiseeraq Tusaaterput Kilut pilersippaat.

Aserorterisarneq akiorniarlugu pinaveersaartitsineq angajoqqaami kajumissutsimik suleqataaffigisaat nangillugu suleqataavoq, arnat saaffiginniffissaannik pilersitsiniarlutik kattuffimmik pilersitsisoqarnerani aallaqqaataaniit suleqataavoq.

Atuagagdliutit nr. 38 1983-simeersumi Kilut allagarsiussaat.

Atuagagdliutit nr. 85 1995

Kommune Qeqertalimmi kommunalbestyrelsi inissitsiternerani Ane borgmesterinngortinneqartoq. Enok Sandgreen & Ane Hansen.

Ane Inuusuttuunerminiilli maannamut politikkimi qinikkatut aamma suliniaqatigiiffinni assigiinngitsuni suliarpassuaqarpoq, inuusuttuunerminiilli inuiaqatigiinni allannguerusunneq, Kalaallit nunarsuarmiut akornanni ersinnerulernissaat, Kalaallit naqisimaneqarnikuusut inuiattut, inuttut ataasiakkaatut imminnut napatilernissaat, nukittullutik nammineersinnaanerulernissaat politikikkut aamma suliniaqatigiiffinni suleqataasarnermini pingaartillugit inuiaqatigiit akornanni sulivoq.

Ane Hansen ukioq manna ukiut 32-issaat politikeritut qinikkatut sulisoq, ullumi pingasunngorneq 9.Juuni 2021. Inuuissiorluni ukiut 60-it anguneranik Kommune Qeqertalimmit ilaqutaalu ullorsiorluarnissaanik kissaallutigit pilluaqquagut.

Kommune Qeqertalik.