Kangaatsiami atuarfissaq nappaanersiorneqarpoq.

28. april 2021

Marlunngorneq 27. April 2021 Kangaatsiami atuarfissaq persuarsiornartumik nappaanersiorneqarpoq.

Siornatigut Kangaatsiami nutaamik atuarfittaarnissaq Namminersorlutik Oqartussanut aamma Naalakkersuisunut noqqaassutaajuaannarsimavoq. Kommune Qeqertalik pilersinneqarmat kommunimi qinikkat aamma atorfillit siullerpaamik Kangaatsiamut angalanerminni atuarfik nutaanngilisimaqisoq aamma atuarfiup ilaata oqoqarnerani meeqqat atuartut oquk peqqutigalugu amerlullutik allatigullu napparsimalersimasut pillugit kommunalbestyrelsi aalajangerpoq Kangaatsiami nutaamik atuarfiliortoqassasoq. Kommune Qeqertalimmi kommunalbestyrelsi ukiuni pingasuni atuarfiup sanaartorneqarnissaanut aningaasanik illikartitsinerani maanna anguneqarpoq Kangaatsiami nutaamik atuarfiliorneq aamma meeqqat atuarfiinik sanaartornerit nunatsinni kommuninit akisussaaffigineqalerneri.

“Atuarfittaassap nappaanersiornerani persuarsiorluta peqataajartorpugut, qilanaarisimaqaarput maanga killinnissarput, sanaartornermut peqataasut tamassi, sanaarsi kusanaq, sannareqaasi ukiuinnarsuaq taamak issitsigisoq suliaq taamak annertutigisoq ingerlassimasinnaagassiuk tulluusimaarutigisorujussuuarput. Tulluusimaarutigivarput aamma pissutsinut isiginnaaginnarata akulerulluta alloriartitseqataasimagatta nunatsinni meeqqat atuarfiinik sanaartornerit kommuninut tamanut tunniunneqarnerinut.

Oqaluttuarisaanermi aatsaavissuaq kommunini nammineerluni meeqqat atuarfiliortoqarnernut aningaasaliisoqarpoq, maligassiuinerpullu nuannaarutissaavoq. Sanasut sanaartornermilu aqutsisut qujanaq suliassinnut kusanangaartumut pilluangaaritsilu. Qilanaareqaarput atuarfiup atulernissaa.”- Taama oqaaseqarpoq Borgmesteri Ane Hansen. 

Qaammat qaangiuppat igalaat ikkussuunneqassapput qalialu matuneqarluni, erinigeqaarput atuarfiup naammassillugu kusanartumik tunniunnissaa, sanasugut ullut tamarluinnaasa ulapittuartunut qujarujuppugut”- Taama oqaaseqarpoq Oliver K. Bengtsen, KJ-mi sanaartornermik aqutsisoq. 

Kangaatsiami atuarfiup Pisortaa Sussi Adelholm nappaanersiornermi peqataasup maanna ukiut arfineq marlunngortuni atuarfimmi tattoqillutik ukiut tamaasa atuartut avissaartillugit atuartinnissaanut pilersaarusiortarlutik aappaagu meeqqat atuarfittaami atualernissaat taama angitigisumi, silaannarissumi isikkivigissumilu atuartitsilernissartik qilanaarivaa.

“Atuartitsinerni assigiinngitsuni periarfissarpassuarnik ulikkaarpoq, qilanaarinerpaasatta ilagivaat pinngortitalerinermi naturfagimi allanilu pinngortitaq qanimut atorluarlugu atuartitseriaatsit periarfissarilissagatsigit, atuartut, nunaqqataasut, ilinniartitsisullumi tamatta erinisoqaagut”

Kangaatsiami atuarfittaaq sanaartorneqartoq aappaagu juni 2022-mi naammassineqarnissaa naatsorsuutigineqarpoq.

Nappaanersiornermit assit:

Sanasut KJ aamma Sanaartornermi nakkutilliisut Masanti, innaalligisserisut Elektrikerit aamma Kommune Qeqertalimmi Borgmesteri Ane Hansen, Ataatsimiitsitaliaq INUIT-mi siulittaasoq Kommunalbestyrelsimi ilaasortaq Naja Kristensen,Atassut. Kommune Qeqertaliup Pisortaanera Nivi Strunz aamma aningaasaqarnermut Pisortaq Nicolaj Odgaard Jensen, Kangaatsiami Illoqarfiup Sullissiviini Pisortaq Hans Inusugtok. Suliassaqarfik Inoqarfimmi Pisortaagallartoq Karen T. Jessen aamma Kangaatsiami atuarfiup Pisortaanera Sussi Adelholm Sanaartornermi nakkutilliisoq Masantimiit aamma KJ-mi sanaartornermik nakkutilliisut aamma sanasut, Kangaatsiamilu atuartut ilaat nappaanersiornermi peqataapput.