Namminersorlutik Oqartussat nalunaarutaat 23. marts 2021
Ulluni makkunani Akileraartarnermut Aqutsisoqarfiup akileraartartunut 46.000-iusunut nammineerluni nalunaarsuiffissannik nassiussuivoq. Siullermeersumik allakkat e-Boksi aqqutigalugu nassiussorneqalerput.
Ulloq 1. januar 2021 aallarnerfigalugu Kalaallit Nunaanni innuttaasut tamarmik 15-ileereersimasut Pisortanit Digitalimik Allagarsisalernissaminnut pisussaaffeqalerput. Tamanna isumaqarpoq, pisortaniit innuttaasumut allakkat siunissami annertunerusumik Sullissivik.gl aamma e-Boks aqqutigalugu apuussorneqartalernissaat.
Siullermeersumik nammineerluni nalunaarsuiffissaq e-Boksi aqqutigalugu digitalimik nassiunneqalerpoq. Taamaaliornikkut Akileraartarnermut Aqutsisoqarfimmiit innuttaasunut allakkat siunissami tammatsaalineqarsinnaanngussapput. Siornatigut innuttaasut pappiaaqqanikimmersuillutik nammineerluni nalunaarsuiffissaq nassiuttarpaat, tamatumalu kingorna Akileraartarnermut Aqutsisoqarfimmi ataasiakkaarlugit suliarineqartarlutik. Taamaattumik suleriaatsinut ukiuni kingullerni digitalinngorsaaneq ingerlanneqarpoq. Tamatuma malitsigisaanik innuttaasut siunissami pisortaniit digitalimik allagarsisarnissartik naatsorsuutigissavaat.
Akileraartarnermut Aqutsisoqarfimmi pisortaq, Kim Neumann Nielsen, ima oqarpoq:
-”Allakkanik digitalinngorsaaneq alloriarnertut annertuutut isigaara, taamaaliornikkut innuttaasut suliffeqarfiillu ajunnginnerusumik sullinneqalissapput inuiaqatigiinnullu akikinnerussalluni. Nassiussuinissamut piffissarujussuaq atorneqartarpoq, aammalu allakkat nassiussuunneqartut akii annertusarlutik. Allakkanik digitalinngorsaanerput inuiaqatigiinnut akikinnerulissaaq, avatangiisinut ajoqusiinnginnerulluni aammalu allakkat sukkanerusumik isumannaannerusumillu innuttaasunut suliffeqarfinnullu apuunneqartalissallutik.”
Akileraartarnermut Aqutsisoqarfimmit nalilerneqarpoq pappiaaqqanut, allakkat-puuanut aamma nassiussat akiinut, aqutsisoqarfimmiinnaq allakkat ukiumut nassiussuunneqartartut inuiaqatigiinnut 2 mio. kr.-inik sipaarutaasassasoq.
Innuttaasut pisarnermissut nammineerluni nalunaarsuiffik kingusinnerpaamik 1. maj 2021 nassiutissavaat. Naqqiutitit ”Akileraarutikka” Sullissivik.gl aqqutigalugu immersorneqassapput
Utoqqaanerusunut paasissutissat
Innuttaasut 1950 sioqqullugu inunngorsimasut, innuttaasullu internetimut atuinissamut periarfissaqanngitsut pappiaqqatigut suli nassiussisinnaapput, tamanna Kommunimi innuttaasunut sullissivimmut saaffiginninnikkut pissaaq. Tassani innuttaasut imaluunniit qanigisaasut immersuiffissaq atorlugu pisussaaffeqannginnissaminnut qinnuteqarnissaminnut periarfissaqarput. Akileraartarnermut Aqutsisoqarfimmut immersukkat e-mailitigut imaluunniit allakkatigut nassiussineq aamma suli periarfissaavoq.
Innuttaasut qulaani allassimasut pillugit apeqqutissaqarunik
Attavissaavoq: Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, tlf. + 299 34 65 00, mail: tax@nanoq.gl