Ukioq manna nunatsinni sisoraatinik ujakkaarluni pissartanngorniunneq Aasianni ingerlanneqassaaq ulluni 1. aprilimiit 5. april tikillugu, peqatigiiffik ASP- Aasianni sisorartartut peqatigiiffiat aaqqissuisoralugu.
Assi: nammineq pigisaq. Hans Rafaelsen.
“Unammersuarnissamut piareersimavugut, aqqutit atortorissaarutillu piareersimapput, unammiartut tikillattaasut tamakkingajalerput, neriuppugut tamarmik piffissaq eqqorlugu tikissasut. Aqagu ammaanersiorneq ingerlanneqassaaq, ASP- facebookkiatigut inernerit malinnaavigineqarsinnaapput, ASP illuutaanilu takuneqarsinnaassallutik. Sekundilersuutit pigilikkagut torraqingamik nunarsuup sinnerani takuneqarsinnaassapput unammisut qanoq ingerlaarsimaneri, kingorna fjernsynikkut takutitassamik immiussisoqassaaq. Corona peqqutigalugu aaqqissuussinermi allaannerusumik aaqqissuussigaluarluta neriuppugut silagissiussalluta aamma unamminerit ajunngitsumik naammassineqarumaartut, peqataasullu pissarsiaqarluarumaartut.”- Taama oqaaseqarpoq Hans Rafaelsen. ASP-mi siulittaasoq.
Nunatsinni ujakkaarluni unammersuarnermi Aasianni ingerlanneqartumi Borgmester Ane Hansen illersuisuussaaq.
Assi: nammineq pigisaq. Borgmester Ane Hansen
“Nuannaarutigeqaarput kiisami unammiuaarnerit siornali erinigisagut aallarteqqimmata, unammiat nunatta sinneraniit inuit 104-missaaniittut Aasiannut, Kommune Qeqertalimmut tikilluaqqungaarpagut unammilluarnissaanillu kissaallugit”- Taama oqaaseqarpoq Borgmester Ane Hansen. Kommune Qeqertalik.