Kommune Qeqertalimmi Timersullammak 2020 aamma kajumissaatinik pissarsisut.

19. februar 2021

Allattut: Daana R. Geisler & Gaaba Olsen.

Timersortartut ulluanni 6. januar 2021 Kommune Qeqertalimmi persuarsiornartumik illoqarfinni nunaqarfinnilu Timersullammammik toqqaasoqarpoq aamma kajumissaatinik agguaasoqarpoq.

Siornatigut illoqarfinni nunaqarfinni immikkut timersullammammik innersuussisoqarlunilu toqqaasoqartaraluartoq ukioq manna suliassaqarfinni akimut suleqatigiinneq aallaavigalugu ataatsimut Kommune Qeqertalik tamakkerlugu timersullammammik nersornaatisisussanillu innersuussisoqarpoq.

Illoqarfinni Suliassaqarfik Timi Tanilumi sulisut, timersortarfinni kommunip ingerlataani sulisut, kiisalu avataaneersut timersornermik suliaqartut peqatigalugit timersullammanngortoq aamma kajumissaatisisussatut innersuunneqartut nalilersorneqarput toqqarneqarlutillu.

Ukioq manna Covid-19 peqqutigalugu ataatsimoorsinnaatitaaneq killeqarmat Kommune Qeqertallup Facebookkikkut qupperneratigut aallakaatinneqarpoq, innersuunneqartullu tamarmik sumiiffimminni najuunnermikkut malinnaaqatigiillutik.

Timersullammak aamma kajumissaatisisut plakatinngorlugit takusassiarineqartalissapput.

Komune Qeqertalimmi illoqarfinni suliassaqarfik Timi Tarnilumi sulisut, suliassaqarfik akimorlugu suleqatigiinnermi aalajangiuppaat ukioq manna aallartiffigalugu kajumissaasigaasut timersullammanngortorlu inoqarfinni tamani plakaatitut nivingatinneqartalissasut, taamaalilluni kommunimi innuttaasunut maligassiuisutut takusassiarineqartalissammata.

Plakatit martsip qiteqqunnerani inoqarfinnut, atuarfeqarfinnut, meeqqerivinnullu nassiussuunneqassapput.

Kommune Qeqertalimmi timersullammattut toqqarneqartoq, kajumissaatinillu pissarsisut:

Timersullammak 2020

Mads Andersen, Qeqertarsuaq.

Ukioq 2020 Mads Andersen timersornikkut annertuumik angusaqarpoq. ¨

Maasi ukiorpaalunngortuni nunatsinni timersornikkut, minnerunngitsumik isikkamik arsaannikkut ilisimaneqarpoq. 2009-miilli G-44-mi arsartutut pingaarutilittut aqutsisutullu inissisimasarluni, aammalu angusarissaartarluni. Isikkamik arsaannerup saniatigut

Maasi nunakkut aqqusinikkullu arpattartuuvoq, ukioq 2020-milu Qeqertarsuaq Race-mi, aammalu Kulunguaq Run-mi ajugaasuulluni. Seeqqumigut akornuteqarnini uniffiginagu ukiorpaalunngortuni timersorneq ingerlattuarpaa. Nammineq timersornermi saniatigut meeqqanut inuusuttuaqqanullu annertuumik misilittakkani aallaavigalugit siunnersuilluni kaammattuisarpoq. Tassani takuneqarsinnaalluni timersorneq annertuumik uummateqarfigingaa.

Sungiusaasutsialak 2020.

Lars Olsvig, Qasigiannguit.

Ukiut: 69

Timersuut soqutigineqariartulersoq, pisissaarneq aalluttaraa sungiusaasuuffigalugu. Efterskolertunillu tikilluaqqusilluinnarluni, pisisseriarnerup sinerissamut siaruaannissaa siunertarisuugamiuk.

Timersornikkut allaalaartumik sulilu nutaajusutut isigineqarsinnaasumik aallussisuuvoq pingaartilluinnarlugulu kulturitsinnut attuumassuteqarnissaa. Arctic Winter Games 2020-imi Covid-19 pillugu siullermeertumik unammiaqataanngitsoornikuullutik. Angusaq massakkumut kusanartuuvoq.

Kajumissaat meeqqamut, niviarsiaraq.

Thrune Amassen Rafaelsen, Aasiaat.

Ukiut: 15

Thrune meeraq qanilaartoq, kaammattuisoq, anguniagaqartoq ataqqinnittorlu. Inooriaatsimik peqqinnartumik pingaartitsisoq. Inuusuttunnguungaluarluni inersimasuni unamminermi malinnaallualereersoq.

Thrune ilerisaminut, unammisartakkaminut dommerinut isiginnaartunullu ileqqorissaartuuvoq taamaakkamilu ikinnguterpassuaqarpoq. Thrune inuusuttunnguulluni maannakkumut angusarissaalereerpoq.

Kajumissaat meeqqamut, nukappiaraq.

Karl Peter Filemonsen Olsen, Kangaatsiaq.

Ukiut: 13

Arfinilinnik ukioqarluni timersortalerpoq.

Timersornissani takkuttuarnissanilu pingaartitarisarpai,
mikinerulluni arsartartumik nuannaartorisaqartarpoq.

Sapaatip akunneranut ullut tamakkerlugit timersorsinnaasarpoq
Siunissami nunarput tamaat eqqarsaatingalugu unammisartuunissaminik anguniangaqartuuvoq.

Meeraqamminut ilikkarsimasaminik ingerlatitseqqiisarpoq.

Innarluutilimmut kajumissaat.

Nuka Karlsen, Aasiaat.

Nuka ASP-mi innarluutilittut unammisartuuvoq ukiuni arlalinngortuni, Nuka unammisarnermini Kalaallit nunaanni unammersuartoqartillugu peqataasarnermini pitsaalluinnartumik angusaqartartuuvoq, tamatigut siullernut ilaasarluni.

Nuka nuannaartuuvoq naapikkuminartoq, sungiusartilluni nuannaarnermik ersertitsisarpoq.

Angajoqqaat tapersersuisut.

Aputsiaq Olsen aamma Andrea Brandt, Qeqertarsuaq.

Aputsiaq, Andrea-lu meeqqaminnut timersornerup tungaatigut annertuumik tapersersuisuupput.

Meeqqamik sungiusarneranni akuttunngittunik malinnaajartortarput tapersersuisarlutillu. Kiisalu pisariaqartillugu sungiusaanermi ikiuuttarlutik.

Minnerunngitsumillu meeqqamik timersoqatigiiffianut tapersersuillutik annertuumik aalajaallutik ikiuuttarput, katersuiniartoqaraangat aammalu unammisoqartillugu. Kiisalu meeqqanut inuusuttuaqqanullu allanut timersortartunut annertuumik tapersersuisarlutik, illoqarfimmut timersoqatigiiffinnullu annertuumik sunniuteqartumik.

Utoqqarnut Kajumissaat, arnaq.

Regine Svendsen, Qeqertarsuaq.

Regine utoqqaat peqatigiiffianni “Avalequt”-mi ukiorpaalunngortuni sunniuteqarluarluni ingerlatseqataavoq. Illoqarfimmi aammalu kommunimi annertuumik maluginiarneqartarpoq sulilluarnera peqqutigalugu.

Pingaarutilittullu taasariaqarluni timi aalatinnerulernissaanut annertuumik suleqataasarami. Utoqqaat timersorneranni suleqataalluarluni peqataasarpoq, minnerunngittumillu  meeqqanut aaqqissuussaqartillugu aalajaalluni suleqataajuaannarluni annertuumik iluaqutaasumik.

Utoqqarnut kajumissaat, angut.

Hans Rafaelsen, Aasiaat.

Ukiut: 67

Hansi sungiusartuartuusoq ilisimaneqarpoq, kikkunnut tamanut kaammattuisoq. Ukiup qanoq ilinera apeqqutaatinnagu sungiusartuartuuvoq ukiuungaluarpat aasaangaluarpat. Pineqartup arpanneq piginnaaneqarfigilluarpaa, unammiuaarnernut peqataasarpoq aammattaaq nammineerluni aaqqissuussisarpoq, nutaaliortuartuullunilu.

Ukiuni kingullerni arlalissuanngortuni Master World Cup peqataaffigisarpaa angusarissaarfigisarlugulu. Hans Ukioqqortusingaluarluni peqatimi akornanni angumaneqarani siuttuujuarpoq, allaallu inuusunnerusut unammillerneqarnissartik ilisimaaraat. Hansi timip pisinnaasaa aallaavingalugu inunnut ajunnginnerpaamik kinguneqartussamik iliuusissanik aqqutissiuussisarpoq.

Peqatigiiffik eqeersimaartoq.

Aasianni Sisorartartut Peqatigiiffiat ASP.

Ukiut peqatigiiffittut ingerlanera: 51

ASP sutigut tamatigut Aasianni, Kalaallit nunaanni, nunattalu avataani timersornikkut ersarilluartumik maluginiarneqarluartuuvoq.

ASP Aasianni sammisaqartitsisarnermigut ukioq kaajallallugu inuppassuarnik peqataaffigineqartartunik ingerlatsisarpoq timersornikkuunerusoq. Ukiuuppat aasaappallu assigiimmik sammisaqartitsinissanik ingerlatsisarpoq, meeqqaniik utoqqarnut peqataaffigineqartarluni. Aasianni innuttaasut peqqinnartumik inuuneqarnissaannut suleqataasarluni.