Borgmester Ane Hansen-ip ukiortaami Kommune Qeqertalimmi peqatigiiffinnut aamma kajumissutsiminnik suliaqartunut ilassinninnera.

5. februar 2021

Arfininngorneq 30. Januar 2021 Borgmesteri Ane Hansen kommunalbestyrelsi sinnerlugu ukiortaami Kommune Qeqertalimmi peqatigiiffinnut kajumissutsiminillu suliaqartunut persuarsiornartumik ukiortaami Aasiaat katersortarfianiit ilassinnippoq. Kangaatsiami, Qasigiannguani, Qeqertarsuarmi, Ikamiuni, Kitsissuarsunni, Attumi, Iginniarfimmi, Niaqornaarsummi, Ikerasaarsummilu peqatigiiffiit sinniisai, kajumissutsiminnik suliaqartartut kommunip allaffiinut qaaqquneqarput. Attaveqaat skype atorlugu ilassinninneq ingerlanneqarpoq.

Ilassinninnermi borgmesteri aamma Kalaallit Nunaanni Timersortartut Kattuffiani Generalsekretær Jonas Jensen oqalugiarput. GUX-mi ilinniartut Heidinnguaq Jensen, Miannguaq Jensen, Nielsine Løvstrøm, Jane Sakæusen nuannerluinnartunik erinnanik atuillutik.

Borgmester Ane Hansen-ip oqalugiaataa:

Asasakka Kommune Qeqertalimmi peqatigiiffiit sinniisaat kiisalu inuit ataasiakkaat namminneq kajumissusertik tunuliaqutaralugu nunaqatiminnut ajunngitsuliortartut.
Kommune Qeqertalik pilersinneqarmat pingaartissimavarput peqatigiiffinnik innuttaasunillu ataasiakkaanik nunaqqatigiinnut namminneq kajumissutsimik ikiuulluartartunik qujaniarluni ukiup nutaap aallartinnerani ilassinninnissaq.
Ukioq manna Kommunalbestyrelsimi qinigaaffik kingulliuvoq taamammat pissusissamisorluinnarpoq Kommunalbestyrelsi sinnerlugu Peqatigiiffiit inuillu ataasiakkaat nammineq kajumissutsiminnik suliaqarnikkut nunaqqatigiinnut susassaqartitsillutillu ikiuuttartut qujaniarfigissallugit.Kommunalbestyrelsi sinnerlugu qujanarujussuaq ukiup ingerlanerani peqatigiiffisi aqqutigalugit kajumeqatigiinneq annertooq pitsaasumik siunertalik ingerlattarassigit. Ingerlattakkasi nunaqqatigiinnut isumalerujussuupput.

Ukioq qaangiuttoq ukioq mannalumi allaanerujussuarmik misigisaqarpugut, nunarsuaq tamakkerlugu nualluussuarmik Coronavirusimik nappaalanersuaqalersimavoq. Sunalu tamarmi sunnerneqarpoq aamma uagut sorpassuartigut sunnerneqarpugut. Timersoqatigiilluni unammiuaartarnerit amerlanerpaat uniinnartariaqarsimapput, nipilersortartut tusarnartitsisarneri nuannareqisagut isiginnartorpassuaqarluni ingerlanneqarsinnaajunnarsimasut, Erinarsoqatigiit naapisimaarsinnaajunnarsimapput killilersuinerpassuit atuutilernikuummata. Isiginnartitsiartut nuannareqisagut aamma killilersuinernik sunnerneqarput.

Kalaallit Nunaani Timersoqatigiit Kattuffiata ilimasaarutigaa timersornikkut angusat peqatigiiffinnilu timersoqatigiittarnerit kinguariassasut ilimagigitsik. Taamaattariaqanngilaq timersoqatigiinnerit ingerlatiinnarsigit nutaamik eqqarsaritsi timersornikkut angusat qanoq pitsaanerpaaffimminiitissinnaannerinut, nualluuk qanngiuttussaavoq qaangiuppallu unammillerluarsinnaasunik suli takorusuppugut.
Coronavirus uniffiginagu nipilersornikkut piginnaanilittatsinnik ujartuilluta siorna påskip nalaani inuiattullu ullorsiornitta nalaani unammisitsisimavugut qarasaasiatigut periarfissata atorluarlugit, nutaarsilluarpugullummi piginnaanilittagut takuneq ajukkagut puttussuupput Attumiit, Ikamiuniit, Ikerasarsummiit, Kangaatsiamiit illoqarfittatsinniillu. Piginnaanerit alutornarluinnartut ilaallu tusaqqornarluinnartut tusarpagut Coronavirus iluaqutaalluni nutaamik eqqarsaratta.

Siorna aamma immikkut misigisaqarpugut tassa peqatigiiffiit inuillu ataasiakkaat tunissuteqarnerisigut tunissutinik isumaqaqisunik tunniussisoqarmat, siullermik Qeqertarsuarmi arsaattarfimmik ivigaasaqqanik sanaaq kommunitsinni siulliusoq pisortatigortumik tiguarput taassannga tunisisuuvoq Kommune Qeqertalimmi innuttaalluartut ilaat Qeqertarsuarmiu Jens Salling. Kiisalu aamma Aasianni illerfissarsiutileqatigiit ilisinermi toqusunik angallassissutinik kusanarluinnartunik Kommune Qeqertalimmut tunnissuteqarput. Tunissuteqartut taakkua uummammik pisumik Kommune Qeqertalimmi kommunalbestyrelsi sinnerlugu qutsavigaakka.
Siorna Corunavirusimik nappaalaneq pissutigalugu timersornerpassuit nipilersornerit erinarsornerillu taamaatiinnartariaqarsimasut amerlapput, taamaattorli sapaatip akunnera kingulleq timersortartut ulluat ingerlanneqarpoq tassanilu timersortartut Kommune Qeqertalik tamakkerlugu kajumissaaserneqartut pilluaqquakka.Pinngortitamik Avatangiisinillu Mianerinninneq pillugu Nersornaat 2020 pissarsisut ilagivaat Tobias Nathanielsen, Qasigiarmiu. “Tobiasip nersornaatisinerani tunngavilersuutigineqarluni Qasigiannguit eqqaanni pinngortitami saliisarnini. Eqqakkanik katersisarsimavoq, taakkua immikkoortitertarsimallugit aammalu containerinut eqqortunut assartortarsimallugit. Tobias Nathanielsen nammineerluni annertoorujussuarmik suliaqarsimavoq aammattaarlu suliaqarnini pillugu oqalugiartarsimalluni, taamaattumik najukkami innuttaasut annertuumik isumassarsiortittarsimallugit.” (tusarliisoq: nanoq.gl) Tamatuma saniatigut nipilersortartunut nersornaatit Coda Award 2020 ingerlanneqarput tassanilu immikkut maluginiagassamik aamma pisoqarpoq tassa isumalluarnartumut nersornaat maani Aasianninngaanersumut tunniunneqarmat pilluaqquarpullu isumalluarnartumut nersornaammik tigusisoq Jens Kleist. Taassuma saniatigut maluginngitsuugassaangilaq ataqqinaammik nersornaammik tigusisoq Inneruulat erinarsortuat Angut Clasen maanna Nuummiittoq.

Kommune Qeqertalimmi peqatigiiffinnik ingerlatsisugut tamassi ukiortaami pilluaritsi qujanarlu ukiumut qaangittumut. Qanortorlu ukioq nutaaq manna angusaqarfigilluarsiuk Corunavirus aporfiginagu nutaamik eqqarsarnikkut nutaaliorluarisi.

Borgmesteri Ane Hansen. Kommune Qeqertalik.

GIF Generalsekretæriata Jonas Jensen-ip oqalugiaataa.

Kalaallit Nunaanni Timersoqatigiiffiit kattuffiat Grønland`s Idrætsforbundip Takorluugaq 2030 Nunarsuarmi timimik aalatitsinerpaaq #Aalasa nunatsinni anguniagarivaa. Tamanna anguniarlugu aqqut siulleq periusissiaq atuuttoq ingerlanneqarpoq 2023-mut anguniagaq, pingaarnertut ukkatarineqarluni meeqqat inuusuttuaqqallu aalanerulernissaat, timersorluarnerulernissaat. Kajumissutsimik suliaqartut atugaasa pitsanngorsarneqarnissaat, nunatsinni illup iluani aamma silami timersorfiusartut ullutsinnut naleqqussarneqarnissaat. Ukioq manna 2021 qiteqqunnerani killiffik, anguniakkamut Takorluugaq 2030-mut suliat ingerlasunut nalilersuisoqassaaq, nalilersuineq pereerpat alloriarneq tulleq ingerlanneqassaaq.

Assi: GIF Jonas Jensen, Generalsekretær.

Timersoqatigiiffiit Kattuffiat.

“#Aalasa. Takorluugaq 2030 anguniarlugu innuttaasut amerlanerusut timersornerulertariaqarput, maanna misissuinerit takutippaat inuit sisamaagaangata ataaseq pualavallaartartoq, nunatsinni innuttaasut 27 procentii pualavallaartut. Timersornerulernermi inuttut, inuiaqatigiittut inooriaaseq pitsaanerulertarpoq. Timimik aalatitsinerulernermi nuannaarnerulerneq, ilinniarnerup ingerlanerata pitsaanerulernera, sulinerup pitsaanerulernera anguneqarsinnaammata tassa inuiaqatigiit peqqinnerusut timimik aalatitsinerulernermi pilissammata. Pisariaqarpoq nunatsinni susassaqartuusugut ikioqatigiinnissarput, Naalakkersuisut, kommunini sullissisut, peqatigiiffiit, kattuffiit, kajumissutsimik suliallit, inuillu ataasiakkaarluta tamatta ataatsimut kivitseqatigiittariaqarpugut timersornerup silarsuaani allanngoriartorneq ullutsinni pissutsinut naleqqussartariaqarmat, naleqqussaaffigineqartariaqarmallu”- Taama oqaaseqarpoq Jonas Jensen, Timersoqatigiit Kattuffiani Generalsekretæri.

Nualluut COVID-19 peqqutaalluni nunatsinni timersornermik ataatsimoorluni unammersuarnerit pisinnaannginneranni GIF misissuinerata takutippaa timersortartut timersornissamut kajumissusaat apparsimasoq, aamma timersornermik peqatigiiffinnik ingerlataqartut appariarsimasut. Illuatungaani inuit ataasiakkaat timersornermik aallussinerulersimasut.

Ukioq manna unammersuarnerit pisinnaannginneranni GIF 1,6 mio. KR-nik aningaasaliivoq ukioq 2021 tamakkerlugu atugassanik, GIF-mi ilaasortat peqatigiiffiit aamma kattuffiit, illoqarfinni, nunaqarfinni sumiiffigisaminni timimik aalatitsinerulerniarlutik suliniutiminnut tunngatillugu aningaasanik atugassaminnik qinnuteqarsinnaallutik.

Paasissutissat GIF nittartagaani takukkit:

https://www.gif.gl/gl/aalasa/

Borgmesteri, Jonasilu oqalugiareermata attaveqaat skype aqqutigalungu peqataasut tamarmik imminnut aalaterisarlutik ilassiuupput, apeqquteqarniartut apeqquteqartarlutik. Borgmesteri qujassuteqareermat illoqarfinni nunaqarfinni peqataasut sumiiffigisaminni persuarsiornartumik ataatsimuualaarput ilaatigut Qeqertarsuarmi Regine Svendsen ukiorpassuarni kajumissutsiminik peqatigiiffilerisartoq, peqatigiiffinni arlalinni suliarisartakkani pillugit ilassinninnermi oqalugiarpoq. Ullormilu tassani Timersullammammut tunngatillugu kajumissaatisiani tigullugu.

Regine Svendsen Kommune Qeqertalimmi Timersullaammaap ingerlanneqarnerani kajumissaatinnattuuvoq: Kajumissaat utoqqarnut, Arnaq 2020. Regine utoqqaat peqatigiiffianni “Avalequt”-mi ukiorpaalunngortuni sunniuteqarluarluni ingerlatseqataavoq. Illoqarfimmi aammalu kommunimi annertuumik maluginiarneqartarpoq sulilluarnera peqqutigalugu. Pingaarutilittullu taasariaqarluni timi aalatinnerulernissaanut annertuumik suleqataasarami. Utoqqaat timersorneranni suleqataalluarluni peqataasarpoq, minnerunngittumillu meeqqanut aaqqissuussaqartillugu aalajaalluni suleqataajuaannarluni annertuumik iluaqutaasumik.

“Nuanneqaaq kommunitsinni kajumissaatinnalluni aamma  borgmesterip qaaqqusinera nuannerluinnarpoq, qujavungalu oqaaseqarsinnaagama kajumissutsimik aamma peqatigiiffilerisarnera pillugu.

 Qeqertarsuaq inuttoorujussuunngilaq taamaattumik peqatigiiffittut aningaasanik katersuiniarluni periarfissat atorluartariaqarput, peqatigiiffinni assigiinngitsuni suleqataasarpunga, ilaatigut utoqqaat peqatigiiffiat Avalequt-mi kommuni susassaqartitsinerani ikiuuttarpugut sulilluta meeqqat sammisassaqartinneqarani, arpannerni, inuiattut ullorsiortoqarnerani kaffisortitsinerni, akunnaattuliisunut erinarsornerit, seqernup inuulluaqqunerani nuineranilu persuarsioqataalluta suleqataasarpugut, pisussat eqqumaffigineratigut taamaalilluta peqatigiiffittut aningaasat isertitassat pisarpagut, aamma taamaalilluta Qeqertarsuarmi susassaqartitseqataasarput.

Borgmesterip qaaqqusinera ukiut tamaasa pisalernikoq peqataaffigalugu peqatigiiffinnik suliaqarluni aamma kajumissutsimik suliaqartuulluni nuannertaqaaq, kajumissutsimik suliaqartuusugut nukissamik tunineqaqqittarpugut taamaasilluta, qujanarujussuarlu kajumissaasigaaninnut.”- Taama Oqaaseqarpoq Regine Svendsen, Qeqertarsuarmiu. 

Assit borgmesterip qaaqqusineranit:

Qeqertarsuarmi kommunip allaffiani ataatsimoortut.

Attumi Sullissivimmi ataatsimoortut

Iginniarfimmi ataatsimoortut

Ikamiuni Sullissivimmi ataatsimoortut