Januarip 4-niit ullualunnguit ingerlaneranni Kommune Qeqertalik Naalakkersuisunik ilaasortanik sisamanik tikeraarneqarpoq. Aalisarnermut Piniarnermut Nunalerinermullu Naalakkersuisoq Jens Immanuelsen januarip 4-ni , Nunanut allanut Nukissiuteqarnermullu Naalakkersuisoq Steen Lynge januarip 5-iani, Inuutissarsiornermut Aatsitassanullu Naalakkersuisoq Jens-Frederik Nielsen januarip 11-ani kiisalu Suliffeqarnermut Nukissiutinut Avatangiisinullu Naalakkersuisoq Jess Svane januarip 12-ni tikeraarlutik.
Tikerarneqarnerput atorluarlugu oqaloqatigiinnerit siunniussaqarfiusut ingerlappagut nunarsuaq tamakkerlugu nualluussuup coronavirusip nappaalassutaanerata kingunerisaanik Qallunaat Nunaanni minkit amiisa ajalusoorneritigut puisit amiisa piumaneqarnerulerneranut tunngasumik oqaloqatigiittoqarluni.
Kommune Qeqertalimmiit pingaartipparput puisit amiinik tigooraasut pitsaassusilimmik suliaqarnissaannut aqqutissiueqataassalluta.
Taamaammat puisit amiinik tigooraasut maskiinanik qassaavinnik atortorissaarusersuinissaq atortorissaarutinillu pisariaqartinneqartunik pitsanngorsaanissamut aqqutissiueqataanissaq soqutigaarput, kiisalu assartuussinermi nukissiuteqarnermi avatangiisinillu inatsit pissutigalugu aporfigineqartartut pillugit Naalakkersuisut suleqatiserineqarput.
Puisip amiisa pitsaassusilimmik suliarineqartalernissaanut namminersortunut ingerlatserusuttunut pitsaasumik akilersinnaasumillu ingerlatsilersinnaaneq suleqatigiissutigisariaqaripput kissaatigaarput, taama oqarpoq borgmester Ane Hansen.
Tamatuma saniatigut inuutissarsiornermi takornariaqarnermilu annertusaanissamik assartuussinikkut angallassinikkullu aporfiusut iluarsisassatut isigineqartut Naalakkersuisunut apuunneqarlutik.
”Nuannaarutigaara Kommune Qeqertalimmi aaqqissuussaanerput nutaaq Naalakkersuisunik soqutigineqarluarluni paasisassarsiorfigineqartarmat. Aaqqissuussineq ingerlatarput nunatta sinnerani soqutigineqartoq malugisarparput siammarternissaanullu ammalluta” borgmester Ane Hansen taama unnersiorpoq.
Suliassatsinni tullinnguuttut tassaapput inatsisartut inatsiaanni aporfinngorsimasut iluarsiissutissaannik apuussuinissaq, borgmester Ane Hansen naggaasiivoq.
