"Asasakka Aasiammiut Kommune Qeqertalimmilu innuttaasut
Tamatta juulleriartornera allatulaaq misigivarput, nunarsuarmi nualluussuup Coronavirusip tuniluuttorujussuunera pissutigalungu aamma Nunarput ilanngulluni attorneqarmat, aatsaaginnannguaq Nunatta Nakorsaaneqarfianinngaanniit ilisimatinneqarpunga angalasut akornanni, ullut tallimassaani misissuinermi Coronavirusimik tunillatsissimasut inuit marluk Aasianni nassaarineqarsimasut. Taamaattumillu massakkut mattukkallarneqarsimasut taakkua.
Nakorsaanerup paasissutissiinera malillugu taakku juullisioriartut marluk Aasiannut tikinnerminninngaanniit maleruaqqusat maleqqissaarsimavaat, tassalu inunnut akuliussimanngillat, ullut tallimassaani misissorteqqinnerminni paasineqarlutik. Taamaattumik siaruaassimanissaa naatsorsuutigineqanngilaq.
Taamaakkaluartoq immikkut mianersornissarput inassutigerusuppara nalunartut pillugit. Aamma inassutigerusuppara juullikkunni ilaqutariit ikinngutillu, katersuulluni nuannertaraluaqisoq sapinngisamik inuppassuit akornannut akuliunnaveersaaqqullusi aamma immikkut kissaatigerusuppara Nunatta avataaninngaanniit juullisioriartut aamma ullut 14-nit ajunngikkaluarunilluunniit, ullut 14-nit iluani immikkut mianersoqqullugit, inunnullu amerlavallaanut akuliussuunnaveersaaqqullugit. Inassutiginartorujussuuvoq nuanneraluaqisoq ikinnguterpassuit ilaquttallu tikerartut peqatigalungit sapinngisamik inuit amerlavallaat akornannut katersuunnaveersaaqqullusi, aninguilluarnissaput siunertaralugu. Aaammalu inassutigineqartut malilluarisigit tassa sapinngisarput tamaat errukulaarnissaq, assat spritertarnissai taavalu quersorniarutta tallinut quersornissaq aamma maangaannaq qitserarnaveersaarluta.
Atukkagut ulluni makkunani taamaapput, kisianni sapinngisarput tamaat peqataavugut nualluussuup siammatsaaliornera eqqarsaatigalungu, taamaattumik inassuteqaatigineqartut tamaasa malilluarisigit aammalu tamannguassi juullisiorluarnissassinnik kissaappassi aamma neriuppunga peqqissilertorumaartut taakkua Corona virusimik tunillatsissimasut. Tamassi juullisiorluarisi.