NAKUUSA nuna tamakkerlugu ataatsimeersuartitsinerani Kommune Qeqertalik Meeqqat Isummersorfiat Aasianni katersuullutik ataatsimeersuaqataapput.

 [Ingen tekst i felt]

9. november 2020

NAKUUSA-mi Meeqqat Isummersorfii kommuniminni sassartut meeqqat 30-vit ataatsimeersuarput sisamanngorneq 5. november 2020 nittartagaq aqqutigalugu.

Aasianni ataatsimeersuarnermi Kommune Qeqertalimmiit arfineq marluk peqataapput. Avannaata Kommunianeersut marluk Aasianni GUX-ernertik peqqutigalugu, Aasianni ataatsimeersuarnermi peqataapput.

Kommune Qeqertalik Meeqqat Isummersorfianit peqataasut:

Saamerlermiit: Julius Singertat. AdoLyngep atuarfia, Josefine Lennert Aasiaat, Aviaq Kristoffersen. Ilulissat, Edvard Sandgreen. Qasigiannguit, Uangaaq Thomsen. Qasigiannguit, Kimmernaq Zeeb. Qeqertarsuaq, Niels Otto Olsen. Qeqertarsuaq, Tanya K. Petersen. Ilulissat, Juliane Jeremiassen. Kitsissuarsuit.

Ataatsimeersuarnermi qulequtarineqarpoq "Ataatsimoornerup pissaanera."

Ataatsimeersuarnermi qulequtarineqarpoq ”Ataatsimoornerup pissaanera”

NAKUUSA ukiut qulissaani ataatsimeersuartitsinerani qulequtaq ”Ataatsimoornerup pissaanera” qulequtarineqarpoq.

Oqallinnermi eqqartorneqarput:

Kinaassuseq.
Assigiinngiiaassuseq.
Nittartakkakkut attaveqaatit.

Eqqartuinermi oqallinnermilu siunertaavoq inuusuttut akaareqatigiilluni, ataqqeqatigiilluni assigiinngissuseq eqqartornerani sammisami pineqartumi sinaakkusiinissamut sakkussat. Maannalu nittartakkakkut attaveqaatit atorneqarluarneranni meeqqat imminnut qanoq pissusilersorfigeqatigiittarnerat sammineqarpoq, inuk qanimut tikillugu attaveqarfigineranit qanoq allaanerutigiva? Oqaatsit allatat nittartakkatigut attaveqaatini pissusilersornerit qanoq sunniisarpat?

Ataatsimeersuarnermi eqqartorneqartut qanoq atorneqassappat?

”NAKUUSA-mi nuna tamakkerlugu Meeqqat Isummersorfiisa ataatsimeersuarnerannut qulequtaasut meeqqat suliaqarfigaat, isummersorfigalugillu. Meeqqat oqariartuutaat angorusutaallu aalajangersaganngortissavagut innersuussutinik imaqartoq, taannalu Naalakkersuisunut kommuninullu anngukkumaarlutigu. Innersuussutit oqartussanut inuiaqatigiinnullu anngunneqarnissaannut meeqqat siunnersuusiorput, taakkualu NAKUUSA-mit ukioq tulliuttoq sulissutigissallutigit.- Taama oqaaseqarpoq Mia Skifte Lynge. NAKUUSA-mi suliniummut aqutsisoq.

Aasianni ataatsimeersuarnermut peqataasut Edvard Sandgreen aamma Ungaaq Thomsen Qasigiannguaneersut ataatsimeersuarnermi peqataasut ataatsimiigiarnertik nuannereqaat.

“Ataatsimiigiarluni nuanneqaaq, siornatigut nuna tamakkerlugu ataatsimeersuarnermi qanimut ataatsimiittarnitsinnit allaaneruvoq, kommuni allaneersut qanimut oqaloqatiginagit, ataatsimeeqatiginagit skærmikkulli isigalugit oqaloqatigiinneq allaaneroqaaq”- taama oqaaseqarpoq Edvard Sandgreen Qasigiarmiu.

Taamaakkaluartoq oqallinneq ingerlalluarpoq:

“Nittartakkatigut pimmatiginnittarneq social media, Tik Tok, Facebook assigisaanilu kommentarit nuanninngitsut takussaasorujussuupput, arlaannik ikkussisoqarpat akerartuinerit, illaruaatiginninnerit nalinginnaalersimapput, aamma social mediatigut assinik paquminartunik imaluunniit meeqqat akunnerminni annersaattut, ingerlaartinneqartartut eqqartukkatta ilagivaat. Tamakku takussaangaarmata kiisa paquminarunnaarlutik nalinginnaasunngortut.

Ataatsimeersuarnermi eqqartukkagut naammassillugit ingerlateqqinneqarpata neriuppugut angajoqqaat social medianik atuisunik meerallit, meeqqat social medianik atuinerat nakkutiginerulerumaaraat.

Neriuppugullu ataatsimiissutigut inuiaqatigiinnit tigulluarneqarumaartut aamma suliniutigineqarluarumaartut."- Taama oqaaseqarput. Kommune Qeqertalimmi Meeqqat Isummersorfianit peqataasut Edvard Sandgreen aamma Ungaaq Thomsen Qasigiannguaneersut.

Ulloq ataatsimeersuarneq naggaserlugu Kommune Qeqertalik Meeqqat Isummersorfianit peqataasut borgmesteri Ane Hansen peqatigalugu nereqatigiipput..

Meeqqat innersuussutaat Naalakkersuisunut nunatsinni borgmesterinut tallimaasunut 20. November 2020 tunniunneqassapput.

NAKUUSA pillugu:

NAKUUSA, Meeqqat Isummersorfii.

Meeqqat 13-nit 18-nut ukiullit ilaasortaaffigisarpaat.

Kalaallit Nunaanni Meeqqat Isummersorfii arfineq marluupput. Kommunit tallimaasut tamarmik ataatsimik Meeqqat Isummersorfeqarput, kiisalu Kalaallit Nunaata Kangiani Meeqqat Isummersorfiat, Avanersuarmilu Meeqqat Isummersorfiat.

Meeqqat Isummersorfii tamarmik 15-t angullugit ilaasortaqarsinnaapput.

Meeqqat Isummersorfiini ilaasortat ukiumut ataasiarlutik ataatsimeersuartarput, nalinginnaasumillu meeqqat isummersorfiinit ataatsimik meeqqat tallimat peqataatinneqartarlutik.

NAKUUSAAQQAT:

NAKUUSAAQQAT tassaapput meeqqat atuarfiini atuartut, meeqqat pisinnaatitaaffiinut tunngasunik suliaqartartut.

Nakuusaaqqat qulequttanik nassiussiffigineqartarput takorluugaavorlu atuarfinni Nakuusaaqqat ataatsimiissutigisimasatik eqqartukkatik Kommune Qeqertalik Meeqqat Isummersorfiat -nut ingerlateqqittassasut.

Kommune Qeqertalik Meeqqat Isummersorfia. (MI)= Meeqqat Isummersorfiat

Tassaavoq Kommune Qeqertalimmi meeqqat kommunimi meeqqat inuusuttullu sinnerlugit sassartartut.

Kommune Qeqertalik Meeqqat Isummersorfiata meeqqat atuarfiini Nakuusaaqqakkut ataatsimiissutaat katersorlugit ataatsimiissutigisarpaat.

Kommune Qeqertalik Meeqqat Isummersorfiani ataatsimiinnerit ingerlanneqartarput, ukiullu tamaasa NAKUUSA ataatsimeersuartitsinerani peqataasarlutik.

- Kommune Qeqertalik Meeqqat Isummersorfiat. NAKUUSA-p aaqqissuussaanera malillugu Kommunalbestyrelsinit eqqartugassanik nassitsissinnaapput aamma “Kommune Qeqertalik Meeqqat Isummersorfiat” Kommunalbestyrelsimut eqqartugassanngortitsisinnaavoq.

- Nuna tamakkerlugu NAKUUSA ukiut tamaasa ataatsimeersuarnerani pisinnaatitaaffiit pillugit suliniutaasut, meeqqat oqariartuutaat, isummersuutaat, anguniagaallu Naalakkersuisunut apuunneqartarput, kommuninilu tamani kommunalbestyrelsinut.

NAKUUSA

NAKUUSA UNICEF Danmarkip aamma Namminersorlutik Oqartussat suleqatigiinnermut isumaqatigiissutigaat, NAKUUSA-lu UNICEF Danmarkimit aamma Isumaginninnermut Inatsisinillu Atuutsitsinermut Naalakkersuisoqarfiup aningaasalersorpaat.

Nakuusami sulisut marluusut UNICEF Danmarkip Kalaallit Nunaanni allaffiani sulisut, suliniutip siunertai ineriartortissallugit, piviusunngortissallugit ataqatigiissassallugillu akisussaaffigivaat.

NAKUUSA pillugu paasisaqarnerugit nittartagaa iserfigalugu:

www.nakuusa.gl