Kommune Qeqertalik Meeqqat Inuusuttuaqqallu Isummersorfiat aamma Avannaata Kommunianit peqataasut Aasianni kommunip allaffiata ataatsimiittarfiani borgmesterimut tunniussipput.
Nakuusa meeqqat inuussuttuaqqallu nuna tamakkerlugu ataatsimeersuarnerannit Meeqqat isummersorfiisa kissaataat naalakkersuisunut, borgmesterinut tunniunneqarmat Kommune Qeqertalimmi Meeqqat Isummersorfiat borgmesterimut tunniussipput.
20. november 2020
Borgmeterimut tunniussinermi kommunalbestyrelsimi ilaasortat Naja Kristensen aamma Niels Kristensen najuupput.
Assi saamerlermiit: Kommunalbestyrelsimut ilaasortat: Naja Kristensen aamma Niels Kristensen, borgmester Ane Hansen, Julius Singertat, Tanya K. Petersen, Aviaq Kristoffersen, Josefine Lennert. Meeqqat Isummersorfiat Kommune Qertalimmit sinneri peqataasut video aqqutigalungu tunniussinermi malinnaaqataapput.
“Neriuppugut inersimasut, inuiaqatigiit, Naalakkersuisullu pimmatiginnittarneq pillugu ilisimasaqarnerulissasut, meeqqat tusarnaarneqarnerusariaqarput oqaasiilu upperineqarnerulerlutik.Akitsuutit eqqartorneqartorujussuupput meeqqalli atugaat eqqartorneqaratik, taamaammat neriuppugut kinguneqarluarumaartoq tunniussinerput.
Meeraasugummi tusaaniarneqarutta imaluunniit aperineqartarutta suut amigaatingineringut, ataqqineqarluta kingunerissavaa meeqqat imminnut tatiginerulernerat, siunissaq qaamasoq, meeqqat nuannaartut, imminut tatigineq.”- taama oqaaseqarput kommunip allaffiani najuuttut: Julius Singertat, Tanya K. Petersen, Josefine Lennert, Aviaq Kristoffersen.
Meeqqat oqariartuutaat Kommune Qeqertalimmi kommunalbestyrelsit tigulluartarpaat, siorna meeqqat oqariartuutaat aallaavigalugu atuarfinni oqaloqatiginnittartut pilersinneqarput oqariartuutillu piviusunngortinneqarnissaat siunertaralugu sulisoqarpoq.
