MIO-p Nersornaasiuttagaa 2020 inunnut marlunnut tunniunneqarmat Apannguaq Lynge Tellesen Ikamiuni ilinniartitsisunngorniartoq nersornaatisivoq.

27. november 2020

MIO-p Nersornaasiuttagaa 2020 inunnut marlunnut tunniunneqarmat Apannguaq Lynge Tellesen Ikamiuni ilinniartitsisunngorniartoq nersornaatinnappoq aappaattut nersornaatinnalluni Niviaq Korneliussen. Taakku tamarmik immikkut inuiaqatigiinni malunnaateqarluartumik suliniuteqarsimapput, meeqqat pisinnaatitaaffiisa ilisimaneqarnerulernissaannik kiisalu meeqqat inuuniarnikkut atugaasa pitsanngorsarneqarnissaannik suliaqarsimapput.

MIO-p Nersornaasiuttagaa diplomitaqarpoq kiisalu checkitaqarpoq, nersortaaserneqartut tamarmik immikkut kr. 10.000-inik pissarsissapput, aningaasallu Nuna-Fondenimit aningaasaliissutaapput.

Apannguaq 29-nik ukioqarpoq. Ukioq 2017-mi Ikamiuni Ivilikasiup atuarfiani timelæritut sulilerpoq, ukioq maanna august aallartiffigalugu najugarisaq qimannagu ilinniartitsisunngorniarneq aallartillugu.

”Takorloorsimanngikkaluarakku ilinniartitsisunngorniassallunga, atuarfimmi sulilerama assorujussuaq atuarfimmi sulineq nuannarilersimavara uummateqarfigalugulu”- taama Oqaaseqarpoq Apannguaq lynge Tellesen.

MIO-p nersornaatisitsinera imatut oqaasertaqarpoq:

Ilinniartitsisunngorniaq Ikamiuniittoq Apannguaq Lynge Tellesen. Nunaqarfimmini immikkut ittumik suliniuteqarsimanini pillugu nersornaaserneqarpoq. Meeqqat ikiorserneqarnissamik pisariaqartitsisut sunngiffini allaat atorlugu ikiortarpai, inuttut naleqassusaasa aamma imminnut tatigissusaasa utertitseqqinnissaannut suleqatigisarlugit. Inuiaqatigiinni uagutsitut ittumi, imminnut ungasittunik illoqarfeqarlunilu nunaqarfeqarfiusumi ikiortissarlu ungasissinnaallunilu utaqqinarsinnaasumi najugaqarfiusumi, paqumigisanik oqaluuserinnilersitsisinnaavoq. (Meeqqat pillugit Isumaqatigiissummi artikel 34).

Apannguaq Lynge Tellesen arnaavoq inuusuttoq nukittooq, nunaqarfimmi oqallitsitsilersinnaasoq kiisalu Naalagaaffiit Peqatigiit Meeqqat pillugit Isumaqatigiissutaat pillugu (Artikel 42) meeqqanik inersimasunillu ilinniartitsisartoq. MIO-p saqqummersitai killiliinermut tunngasut atorlugit meeqqanik inersimasunillu sulitilluni sunngiffimminilu ilinniartitsisarpoq. (Meeqqat pillugit Isumaqatigiissummi artikel 12).

Ivilikasiup atuarfiani aqutsisoq Regine Jeremiassen MIO sinnerlugu Apannguamut tunniussivoq.

Ikamiuni atuartitsinermi atuartitsissutit takkuttut meeqqanut atuartitsissutigineqartarput taamatuttaaq meeqqat pisinnaatitaaffii sammineqartarput aamma meeqqat killissamik qaangiiffigitinneq pillugu inuttut inerikkiartornermi atuarlutik sammisaqartarput.

”Apannguaq suliffini ataqqisorujussuuaa ikiuukkumatullunilu, , atuarfimmi artuartut arlaannik sammisaqartissagaangamigit saaffigisarpaanga, maani atuartut 4-8 klassit ataaatsimut atuarput, Apannguup inuttut inerikkiartornermi atuartitsinermini meeqqat pisinnaatitaaffii sammisimavai. tupaallannarlunilu nuannerpoq taamatut nersornaatisilluni.  ” – Taama oqaaseqarpoq atuarfimi aqutsisoq Regine Jeremiassen.

”Meeqqat pisinnaatitaaffii sammiuarnerisigut meeqqat piffissap ingerlanerani pisinnaatitaaffitsik ilisimallualertarpaat, uteqqiisarnerni malunnartarpoq pisinnaatitaaffitik ilikkarluarsimasaraat, nuannarisarpara meeqqat nukarliunerusut meeqqat pisinnaatitaaffii ilisimasaqarfileramikkit meeqqat angajulliit ilaatigut oqarfigisaraat 18-liinissat tikillugu meeraavutit, siornaak angajoqqaat aamma killiliineq, pisinnaatitaaffiit pillugit saqqummiussiffigivagut. Tuppallernaqaaq nunaqarfipput inukitsunnguummat ilimasussimanngilanga nersornaatisinissannut, taamatut meeqqat pisinnaatitaaffii sammisarnerani sunniuteqarnerani nunaqatitsinnit maluginiarneqarsimaneq tuppallernarpoq, nuanneq”- Taama oqaaseqarpoq MIO-p nersornaasiuttagaanik nersornaaserneqartut aappaat Apannguaq Lynge Tellessen Ikamiormiu. 

Apannguaq nersornaaserneqarnerani Kommune Qeqertalimmit pilluaqqungaarparput.

Apannguaq Uia Johannes paniilu Inequ aamma Asa Dorthe.

Apannguup nukaa Malu, Apannguaq, Apannguup arnaa Anine.

Assiliisut: Anine Tellesen aamma Johannes Tellesen.