Martha Olsen Adelholm ukiuni 43-ni utoqqaat illuani ningiutut atorfeqareerluni 30. september 2020 suliffimmini naggataamik sulilluni soraarninngorpoq. Naalagaaffeqatigiinnerup iluani ukiuni 45-ni sulilluni, praktikkernerit ilanngullugit ukiut 50-sit sulisimalluni.
Kommunit pingasut aqqusaarsimavai: Kangaatsiap Kommunia, Qaasuitsup Kommunia aamma Kommune Qeqertalik.
Pingasunngorneq 18. november 2020 Kangaatsiap allaffiata ataatsimiittarfiani Borgmester Ane Hansen, Kommunalbetsyrelsimut ilaasortaq 2.Viceborgmesteri Hans Aronsen Pisortaanerugallartutut atorfilik aamma Alida C. Rafaelsen Martha Adelholm ukiorpassuani sulisimaneranut qujassuteqarfigivaat.
Martha Qeqertarsuatsiami inunngorpoq ukioq 1954, aqqanilinnik ukioqarluni qatanngutini peqatigalugu Kangaatsiamut atuariartorput, apersortereernermi kingorna Aasiannut atuariartorluni kollegierierpoq. 14-ninik ukioqarluni højere ungdomskolerpoq ukioq ilivitsoq. 1970 mi ukioq ataaseq et års huserpoq ilaqutariinni, Spædbørns hjem Skorsborgimi ukioq siulleq praktikkerpoq, kingorna iggavimmi praktikkerpoq atuarlunilu, Hellerupimi plejehjemmemi utoqqaat illuani praktikkerpoq naammassinissami tungaanut juunip aallaqqaataani 1975 kingorna assistentinngorluni ukiuni marlunni suliffigisamini.
Sulinngiffeqarluni Kangaatsiamut angalanermini Kangaatsiami utoqqaat illuat pisortassarsiortoq qinnuteqarami ningiutut atorfigilerpaa, ukiut 43-rut ningiutut atorfigisimallugu.
Atorfineqqaarami utoqqaat illuanni najugaqarpoq ulloq unnuarlu utoqqaat sullillugit, tassani qitornanilu inuunerannut ilaalluinnarsimavoq utoqqaat sullillugit inooqatigineri, ulloq, unnuarlu nalliuttunilu peqatigisarneri.
”Kingumut qiviarluni eqqaasassat amerlaqaat, sullitarisimasat, suleqatigisimasat eqqaamangaarlugit nuannersorpassuit artornarsinnaasullu sarsuapput, nuannersut eqqaasassat ilagaat utoqqaat illuani najugallit umiarsuaaqqamik Tuullimmik nunaqarfinnut angallattarneri, utoqqaat utoqqaqatitik naapittarneri nuannerluinnartarpoq”- Martha Olsen Adelholm oqarpoq.
Utoqqaat illuani ningiuunermi saniatigut peqatigiiffilerineq ingerlassimavaa arsaattartuni ukiorpassuit aningaaserisuulluni, ukiut ilai kommunalbestyrelsimut ilaasortaalluni, qimarnguiit pilersinneqarmata Kangaatsiami Qimarnguimmi siulittaasuusimalluni matunissaa tikillugu.
”Soqutigisaq aallaavigalugu ilinniaraanni imaluunniit suligaanni qanorsuaq sulisoqarsinnaavoq, suleqatigiilluarneq ineriartortitsinerlu pingaartittuarsimavara. Sulinermilu pingaartutut isigiuarsimavara pingaaruteqartoq inunnik sullissiniaraanni imminut suliarisimanissaq, taamaalilluni inuit ammasumik eqaannerusumillu sullinneqarsinnaammata.”- Martha Olsen Adelholm oqarpoq.
Martha Olsen Adelholm qujassuteqarfigineqarnerani pania, ernutai, ikinngutai najuupput.
”Nunneq taamatut qaaqquneqarluni, tunissuteqarfigineqarluni qujaffigineqarlunilu taamatut isumaqanngikkaluarlunga. Suleqatinnik naggataartinneqarpunga aamma septemberip naanerani. Maanna suliunnaarninni pingaartittuagara peqqissumik inuuneqarneq, timimik aallatsitsineq, imminut paarineq, pingaartumik qiimaneq nuannarisat peqatigalugit ingerlatissavara. Sullitarisimasat, suleqatigisimasat, kommunimi qanimut suleqatigisimasat qanimut suleqatigiilluarsimanitsinnut qujarujuppunga.- Martha Olsen Adelholm naggassiivoq.
