Hansine Broberg ukiuni 51-ni pisortani sulereerluni tallimanngorneq 30. oktober 2020 Qeqertarsuarmi kommunip ataatsimiittarfiani ilassinninnertalimmik soraarninngornerani inuulluaqquneqarpoq.
Hansine ukioq 2015-mi ukiut 40-rut sulisimanermini ataqqinartorsuup Dronning Margrethe aappaata nersornaasiuttagaanik fortjenestmedalje sølviusumik saqqarmiulerneqarsimavoq.
Hansine Aamaruutissani 1953-mi inunngortoq, ukiuni 51-ni pisortat suliffeqarfiutaani sulinermini Qeqertarsuarmi suliffeqarfik ataasiinnaq suliffigisimavaa tassa kommunimi, kommunimi ilinniartunngorami socialkontorimi aallartippoq, kingorna immikkoortortaqarfiit assigiinngitsut suliffigisimallugit maanna ilinniarluni aallartiffini suliassaqarfik suliffigisimallugu naggataamik suliffigivaa.
Taamaattoq suliffiata aqqa, taajuutaa sisamariarluni allanngorsimavoq:
Kæmnerkontoret, Godhavn hos Ministeriet for Grønland.
K`ek`ertarssûp Kommunia.
Qaasuitsup Kommunia.
Kommune Qeqertalik.
Hansine Brobergip soraarninngorluni inuulluaqqunerani suleqatai qanigisai, Kommune Qeqertalimmi kommunalbestyrelimut ilaasortat Kristian Broberg aamma Bia A. Broberg najuupput.
”Hansine Kommunimi sulisimaninnut qujanarujussuaq. Suliffinnut tunniusimaqqinnaarlutit sulisimavutit, suliatit sullissinerillu pitsaasumik naammasserusuttarlugit, tamannalu angisuumik ataqqinaatigivat.
Ukiuni amerlasuuni pisortani sulereerlutillu sullissereerputit, siunissami tamanik ajunnginnerpaanik ilaquttasilu kissaappassi”- Taama oqaaseqarpoq Qeqertarsuarmi Sullissivinni pisortaq Bychef Benedikte Mølgaard.
“Qaqutigorujussuaq ukiut taamak amerlatigisut suliffimmi ataatsimi sulisimasut naammattuugassaasarput, nuannaarutigaara Hansine Broberg soraarninngunngilaattaani suleqatitsinnut ilaammat. Sulisoq sullarissoq suliaminullu tunniusimalluinnartoq qujassutissaqarfigeqaarput, kissaappakkillu soraarninngorninni sammerusuttarsimasatit angusaqarfigilluarumaaritit.” Taama oqaaseqarpoq Kommune Qeqertalimmi Borgmesteri Ane Hansen.
