Aasianni innuttaasunut
Soorlu naluneqanngitsoq innuttaasoq ataaseq Covid-19-mik tunillatsissimasoq Danmarkimiit Aasiannut angerlarpoq. Pineqartup tunillatsisimalluni paasinngikkallaramiuk illoqarfimmi inuit assigiinngitsut arlallit najortarsimavai.
Politiit peqqissaartumik misissuereerput tunillatsisimasumullu attaveqarsimasut tamakkerlugit nassaarereerlugit. Inuit tunillatsissimasumik najorneqarsimasut piumaffigineqarput angerlarsimaffimminniiginnaqqullugit. Taakkunannga amerlanerit tallimanngormat Covid-19-mut tunillatsisimasoralutik misissortereerput tamarmillu tunillatsisimanngillat. Taamaalilluta allamik tunillaasuisoqarsimanersoq massakkut ilisimasaqanngilagut. Taamaattorli nalusatsinnik tunillaassuisoqarsimasinnaavoq.
Kikkut tamarmik, ingammik inuit politiinit saaffigineqarsimasut, Covid-19-p ilisarnaataanik maluginninniarnissaat pingaaruteqarpoq. Covid-19-imik tunillatsissimagaani ilisarnaatit suunersut ataani atuarneqarsinnaapput. Nunatsinni Nakorsaaneqarfiup nittartagaani paasissutissat amerlanerit atuarneqarsinnaapput, uani https://nun.gl/. Covid-19-p ilisarnaataanik peqaruit napparsimmavimmukassanngilatit. Aasianni Napparsimmavimmut sianissaatit, oqarasuaatip normuanut uunga 89 22 11
Aasianniittut tamarmik sapaatip akunnerini tulliuttuni mianersornissaminnik innersuunneqarput aamma tunillaassuiffiusunut ingalassimassasut siunnersorneqarlutik. Illoqarfimmi suli tunillatsisimasoqarsinnaavoq. Kikkut tamaasa qanillinaveersaarsigit aamma assamiinaveersaaritsi imaluunniit "eqitaarinaveersaaritsi". Nuannannissamut, ataatsimoornissamut, kaffisortitsinissamut allatulluunniit aaqqissuussinissamut piffissaanngilaq, taakkunanimi inuit allat ataatsimooqatigineqartarput. Pisiniarfinni allanilu naapiffigisartakkassinni immissinnut qanillinaveersaaritsi.
Kikkut tamarmik sapaatip akunnerini tulliuttuni mianersorsimassappata Aasianni tuniluunnissaagaluaq pinngitsoortinneqarsinnaassaaq! Taamaattumik kikkut tamarmik peqqissuunissamik sulialittut ilinniarsimasut siunnersuutaannik qulaani allassimasunik tapersersuinissaat pingaaruteqarpoq.
Utoqqaat illuannut imaluunniit napparsimmavimmi uninngasunut pulaarnissaq massakkut periarfissaanngilaq. Utoqqaat tunillatseratarsinnaanerat arlaannaatigulluunniit perusunngilarput.
Inussiarnersumik inuulluaqqusillunga
Henrik L Hansen
Nunatsinni Nakorsaaneq/Landslæge
Nunatsinni Nakorsaaneqarfik/ Landslægeembedet